A thumveina ka sihna ahang in; Son Langh’ cil dawk! ~ Pau Za Mung

A thumveina ka sihna ahang in; Son Langh’ cil dawk! ~ Pau Za Mung

(The most bitter but capsulized in the Sweetest Juvenile-hood Reminiscence)

Thupatna: Sihna bel, nihvei si, cihbang a om ngeikei aa, khatvei bekbek mah aki sithei bekmah ahi hi. Nuntakna lamsang leuleu ah, khatvei bek, khankhat bekmah aki nungta thei kimlai, Ian Flemming in James Bond Movie sungah nihvei bek a nungta( You only live twice)sak hi. Suakna tawh kisai thu ah, LST sungah, nihvei aki suahloh a phamawh sak hi.

Ka cihnopna a telte in, thumvei bek si maw ahong cih dinguh hangin, a tellote in, bang hangin thumvei sithei laizangh ding, ahong cih uh leh, tua in a lamdang ahi kei ding hi.

Tuabang kawmkaalah, kei sagih veitak si ngeizo ingh, ka kici hi. Si ingh ka cihciangin, sihmah tawh ki kimh ka sakluat a hihman ahi hi. Si ingh ka cihna sungah a thumveina ka sihna tawh ki sai ahong ko’ nuam ka hi hi.

Tedim sangpi ah kah

1958- kumin, May kha beikuan pawl dingin, Tedim Kumpi Tan 10- sangpi (Sakollaam, Tedim SHS aki hontuung lam) ah akah dingin, tupna leh ngimna lianpi tawh, ka vanteng aakbawmpi khatin pua in, Lawibual cianggah, ka diip ki sai latlat kawmin, ka suakto leetlaat hi. Banghang hiam cih leh, Tedim in Zomite khuapi ahih zahkhatin, tungin a khua sungah ka luutkaal ding ka ngaklah luatman ahi hi.

Tualai in Kumpi Bawda(khua laaizang, tualpi tung) leh TBA Private Bawda(TBA huang sungmah) nih a om hiaa, kei bel, Kumpi Bawda ah a om ding ka hi hi.

Mangpau ka zaak masakna

Tedim Kumpi Bawda ka tun nitaakin, Tedim sanginnpi leh Bawda ah ana innteek mahmah uu Langh Gin(Langh Gin)in, kuamah sawlloh, kuamah sehloh, ama thukhual leh lungsim picin luatman tawhin, 0600pm pawl dingin, Bawda a tungsa teng, Bawda mai tualah hong ki gualsak in, mangpau vive tawh thu ahong genin, mangpau tawh thu aki gen ka zak masakna ahi hi.

Tuabang ka mangpau zaakna in, lamdang ka sakbek thamloh, tua in ka mailam vai ding tampi hong mukhol sakbek hikei, tha hong pia aa, ahong lawpsak leh ahong tawsawn mahmah khat ahi hi. Tubang ciangin ka ngaihsut kikkik leh, a thupitna ka telzaw saansaan hi.

Tedim tan 10- sangpi ah kah ngawngaw

Tedim ka tunni a ziingciang, ziingsang tuungin, Sangpi lam(Sakollaam lam) zuanin ka paipah laanlaan hi. Sanginn ka tun ciangin, khua aa ka puan  hawih mahmah hi ka cihte midangte lakah hong muall niang’nuang’ pah malam hi. Kei bel, aak, aki puakna bawwm sung panaa aki khahkhia aak ka bang philh phelh hi. Ka khuano lungsimin ahong zawh luat manin, ka ki tuakpih peuhpeuh  te, kei sangin atun a saangzaw, a hawihzaw, a phazaw, a pilzaw leh a siamzaw bangdan ding vive in ka ngaihsun pah hi.

Tan 7-B ah

Tan 7- A leh B classes in aki khenhna ah, tupna leh ngimna, ngaihsutna mel nei tuanlopi in B- class ka tungkha zenzen hi. Tutna ding ahong ki seh ciangin zong, kuamah meltheih dang ki neilo ahih manin, ahong ki sawlna leh ahong ki sehnana ah ka tu pahlel hi. Tuabangaa ahong ki sawlna in, class sungah aki lut ciangin taklam pangh hi’n, a maigual pan sim agual thumna ah ka tu hi. Ko mai ah numeite gual nihin a tu uh hi.

Ka tutna zong

Tuabangaa ka tutna uh ah, ka veilam a nawlnung belah, Zuk Liang (Tedim Nguai-daih Vuandok, Pu Hlun Chiang’ tapa), a zomah kei, ka taklam ah, Mangbawi(SKM-USA), Enno(Rev. Dr.PKE), a nawlnung penah Khambawi (Rev.Dr.HLK) cihbangin gualkhat ah ngatak ka tukhawm uh hi.

Ko mai, a gualnihna ah, Dozen(CDZ-USA), Niingno(Mrs.Dr. Cin Khen Mang), Khannu(Mrs. Decon Ngul Khua Pau), Kuaknu( Mrs. Vung Tual) leha nawlnung penah, Suancing(Niang Suan Cing) atuu hi. Agual masa belah, Haukaang(Cing Ngaih Hau), Ngaihno(Mrs. Dr. Sian Za Kham), Niangpi ( Mrs. Thawng Do Zam), Vungno(Niang Ngaih Vung) te atuu uh hi.

Ka omna uhin

Tualai in, kei Kumpi Bawda ah, Enno, Khan Lian(Zuasiam Langhnote’ pa), Zel Thiau, Do lIan(DDL) leh Vum Do Paute ect….; pawl bel, TBA Bawda ah a omuh hi. Tuabang kawmkaalah, kei leh Enno bel sang kahloh hun sung nangawnin ka ki khawlthei uh hi. Ki khawllua kisa in, weekend sangkhak ciang bangin sum ka thalawh khawmthei lai uh hi. A tawpna ah, zawwl bangin ka ki manliang uh hi.

Tuabang ka hihna uh tungtawnin, aman zong a lungsim khempeuh hong im hetlo, lamdang nono ka sak ding khawng zong hong gen, hong hawmsawn theizel hi.

Tuabangte lakah khatin

d r m f s l t d’; d’ t l s f m r d aki ci bel, aman a la mal tawh aki bulhaa ahong hilhin ah, d r m f Son Langh cil dawk’; dawk’ hi cileng tumkik zel hi; ahi hi. Hihbangaa ahong hilh bel, lamdang salua, paakta lua, diksa lua ka hihmanin, keiguak bangin ka ommuan bangin ka sasa mai hi. Weekend holiday khua ah ka ciah bang ciangin khua aa lawmte bang ka hilh kawikawi zawlai hi. Amau zong diksa in a paakta mahmahtek uh hi.

A thumveina ka sih ni dingin

Holiday nikhat, sunkimin lawmdangteng khuasungah vakvek uhin, kei leh Thang Suan Langh( Thaangzaangte, Mogok Gem Dealers, Thang Sian Pau leh Kai Za Dalte pano- ko bel uu Suan Langh ka cihuh) Bawda ah ka om bekuh hi. Ka nihtuakun, sunkimin, Bawda sung, aki hal simpian ka omna muntuakuh ah, lai en, laibawlin daai khipkhep in ka om hiithiat uh hi.

Cimhlua

A sawtsim pian ciangin, kei zong cimlua ka hih manin, ka khe thuang in, ka khut anihin, van lamah zanhto in, ki dok, ki zanh kawmto sa in, a ngaih simthamhin, “ d r m f Son Langh cil dawk’; dawk’ hi cileng tumkik zel hi,” ci’n ka sak man nailo liangin, “ villvill!, villvill!” ci’n keilam manawhin ahong gingphei, vatvat, ka bil hong nawlin, ka mai aa kawwm khauhtakin, ” phekh!,” ci’n hong khaphei daap mah hi.

Phekh! acih, zathei lai

Huihpi nungg, guahpi zu in, vaan agin ciangin, KEEK akhiat lamtak ih zaak nak leh, KEEK in hong khalo ahih lamtak aki theih mahbangin; Khatvei, galkap sungaa gamkuan(front line) aa paite khatin ahong gen ngei thu in; a gamsung kuanna uh ah gal tamlua mahmah in aki kap uh leh, thau khatvei ging, a kiangaa a lawmte khat tuukpah lian!, khatvei ging leuleu khat mah tuukpah leuleu; tuabang vive tawh ahih ciangin amah zong tuabang lakah ki lamen simsim ahi tam maw, thau khat vei agin kik ciangin amah ahi taam ci’n, a lu a khut tawh a zawtvat leh, si baangbuanglo ahih manin amah kha buanglo ahih lamtak ki telpan hi, ci hi. Tuabang keekmah hing ei! kei zong; a ging zalai buang ka hih ciangin a sinailo ka hih lamtak ka ki telpah hi.

Si ingh ka cihtheihna in

1990 huam sungin ah, Singapore ah Zomite tampitak “o- overstay” tawh in legally ahih loh hangin ki omthei maimai hi. Ahi zongin, hunkhat takciangin ICA(Immigration Control Authority)te’n, tuabangaa illegaly aa omte campaign bawlin, a man uh hi. Tuabangaa a matte uh, thukhen zumah thu bawl pahpah uh hi. Thu aki sitzawhuh ciangin, saatdaan 16- vei bekthamlo, thong zong aki khialai hi.

Tuabangte lakah meltheihte khat zong aki helaa, tua pa in ahong genkik na ah, “ tuabangaa saatdaan ahong kipiak ciangin, ahong ki sat taktak sang in, “ vill! vill!” ci aa, ciingciang tawh ahong ki ngim mahmahin, nasa zaw kaanlai ingh,” ci hi.

Kei zong, ka sih sangbangin na ka sak zawkkaan lai mahbangin, a si mahaa aki ngaihsun ka hi hi. Tua ahih mahbangin, “ A thumvei na ka sihna,” aci ka hi hi.

Telgenna

Hihbang thu in thusia hi peuhmahlo hi. Uu Suan Langh in, mihawih mahmah, a kam tam hetlo, thu a ngaihsun ngeuu-ngauu nilohte nam ahi hi. A hundangin zong, aki ensan ngei cihbang zong hi peuhmah lo, aki it aki ngailua hi unghaa, aman zong hong nau bawl( amah tan 10-hi’n, kei tan 7-) tawntung ahi hi. Hihbang a piantheihna ka ngaihsut kikkik ciangin anuai aa thunihte hang hikha dingin ka ummawh hi.

• (a). Aman hihbang la zangeilo ahi ding hi.
• (b). Ama minno, Suan Langh,” ahi kimlai, “ Son Langh,” ka cih pen, amah aci sakha hi hamhtangh dingin ka um hi.

NB:- Hih thu tawh kisai in, bangmah ki genkikna ka ki nei nawnkei uh hi.

Sihloh phamawh

Uu Suan Langh’ tutphahin, 2”x6”x 12” singpeek, atuacia mah adawn lamtuak aa a khe dingaa aki bulh hiaa, a gikna in 20lbs bang hiding, sing tut phah ahi hi. Tua in hong kha takpi hileh, na zong sa beeklo in, ka omna ah a tuukpah lian ding ka hi hi.

Thu khuphna

Ka lawmpa in ahong piak, zanghthei hileng ka nuntak pih ding kimlai, ka zatdan ka tuakloh manin, “ A thumveina, sihna,” in ka nei hi. (Excerpt from Pau Za Mung’s Memoirs)