ZAM Thupuak :: 21 February 2016

UNHCR-CDU Meeting pan Fraud Case vai zaksak kikna :: 18 February 2016 (Thursday) ni in UNHCR zumpi ah CDU makaihna tawh Community makai te ki muhkhopna Meeting kinei a, adiak in RSC pan Ms. Rajni in Fraud Case vaitawh kisai mipi theihhuai thu tampi genkhia hi. Fraud Case pen nam 4 in khen uh hi:

• Identity Fraud: Case or taangthu kibang
• Family Composition: Innkuan mi phazah a maan a gen lohna,
• Age Fraud: Kum phazah a khiam a khan cihte
• Bribery Fraud: Sumlehpaai tawh midangte Card ngahna cih te ahihi.

A tunga Fraud Case teng tawh kizui in 2014 kum akipan thukanna kibawl a, tuciangciang mi 5500 kimu khia hi. Amau khemna tungtawn in daan kipia hi. Pawlkhat kha 3, 6, 9 cih bangin daan piak hun sung kibangsak lo hi. Case honkhat US na tungkhin ahih manin hong kilehkik ding a kingak hi in maban kizom thei nai lo hi. Pawl khat RST pan a kimu pah zong om a, tuate RSC tungto nai lo ahihmanin maban kizom thei nai lo hi. Fraud Case tawh gam thumna tung khinte ahileh mailam ah Citizen/Passport ngetna ah haksatna tuamtuam om thei kha ding hi. RSC tawh kisai khempeuh pen US kumpi thukhenna bek mah kingak lai hi. Tu ciangciang a hoih dingin lametna kinei hi. Fraud Case dinga upmawhna tawh daan kipia te hun ciangtan a khen khit naak leh Commuinty zum panin Email tawh ahi a Laikhak tawh ahizongin UN zum hongzasak hamtang un.

UN Card tuh tampi kibawl a hihman in tulaitak Card tuh a om nawn lohna dingin Card Renew or Card thak ngah peuhmah Biometric System tawh Card kibawlsak ta hi. Biometric System tawh Card a kibawl ciangin khutme sawm teng mai kimeek sakin, tuabek thamlo mit zong Scan sakta uhhi. Hih tawh kisai pawlkhat in lamdangsa in lungnuam lo thei uh hi. Lungnop ding hizaw hi. Bang hang hiam cileh midangin nang Card tawh a kibang Card maanlo hong bawlsak thei nawnlo ding cihna hi a, mailamah buaina tampi tawh na kipelhna ding hizaw hi. Min kibangte min maan tawh a ngah hon khat om khin a, min a kilaihsak nailo zong honkhat mah om hi. Min akilaih lohna ahang pen UN min tawh Bank Card bawlte leh Nausuak lai sunga min omsa tawh akipelh lo ding deihna hang hipi pen hi. UN zumpi sung ciaptehna ah ahihleh min kibangte min maan tawh kilaihsak, ki ciaptehsak khin hi.

Lungdam pihna ~ Sia Hau Suan Khai

ZAM zumpi ah Sia Hau Suan Khai in kum 6 val Zomi te phattuamna ding in itna leh lainatna tawh na asep khit ciangin Pasian geelsa om bangin Malaysia sanga nopzaw ahi Zomi te khuapi Tulsa, USA lam zuanin 16 February 11PM hunin hong lensan hi. Malaysia ah a om sung ama tangthu a tom in suut suk dih ni.

10 October 2009 kum in Malaysia leitang hong siik in Zomi te zumpi ZAM ah hunbit in palai hong sem pah hi. June 2010-August 2013 sung Secretary sem in, 2013 kum a kipan a len dong President hong semto suak hi. President a sep hun sungin Malaysia a Refugee Community om khempeuh lakpan ih Zomi kipawlna ZAM pen UNHCR maipha a ngah pen Best Community-Based Organization Award 2014 hong ngah pih hi. Tua banah UN tawh Meeting neih nate ah a kahkim pen Certificate of Recognition for Full Attendance pahtawina zong hong ngahpih hi. Tua bek hi lo in Zomi naupangte sangkahna ZEC ah siapi a sep hunsung mah in Outstanding Contribution to Learning Centers Award hong ngah leuleu hi. A zomah UN agencies, Government agencies leh NGO te tawh Roundtable Workshop neihna ah Panelist khat dingin atuam vilvel a sapna hong ngah sawnsawn hi. Hih teng hangin Sia Khai in ZAM ah a sep sungin UNHCR leh NGO te maiah Zomi te vang hong pia mahmah hi. Pasian tung leh amah tungah Zomi te kilungdam mahmah hi.

Tua bek hi lo in Zomi nasep neilo tampi nasep zonsak hi. Cina luna huhna kisamte van in zato leh sikhante ah paipih in huh kawikawi hi. Zomi Idol, Zolia & Zotaang, Zomi Cup cihte ah zong mun hong la in Zomi khangnote hong pantah hi. Kum 6 sung ZAM palai a sepna sungah meltheih leh kizoppih Ulian tampi nei ahihmanin vai thupi tampi kihawmin nalian tampi kisem thei hi.

Ih muan mahmah leh ih it mahmah Sia Khai in kum 6 sung sinsen Zomi te hong pattahna hangin ama tungah lungdamna lianpi ih pulaak hi. A tuntunna ah Pasian in na ompih tawntung hen la, thupha pia in Zomi te ading na lianpi asem zomtoto zoding in mazan daupaina leh cidamna hong piaksak ta hen.

• ZAM zumah leitheih tuamtuam
• (1) English to Zomi Dictionary RM50
• Zolai Siangtho RM50
• Kawllai Siangtho RM30
• Galhiam Labu RM30
• ZYA Tin Jubilee Magazine RM50
• Zogam, Zomi tangthu RM20
• Namsiaza RM20
• Zomi DVD/VCD tuamtaum 1 teh RM10

ZOMI CUP 2016 NUAMTAK KIZO :: Zomi Cup 2016 February 8-13 kikal ni 6 sung kimawlna noptak in kizo thei hi. Tukum Team/Khua 25 kipha in puai 74 pha hi. February 8 ni zingsang nai 10:30 in honpawi nasiatak in kibawl in Rev. Dr. JM Ngul Khan Pau te nupa leh Dr. Hau Za Cin (ZIS President, LZI Secretary) te nupa hong kihel thei uh hi. Dr. Hau Za Cin in kimawl khempeuh kiciamna hong makaih khit ciangin Rev. Dr. Ngul Khan Pau in kimawl khangnote thapiakna hong neih sak hi. Zomi Cup 2016 zawh theihna dingin, ma hong panpih khua (25) makai, kimawlna makai khempeuh tungah lungdam mahmah hi. Sum le pai, thatang vaihawm haksak nate puazo, thuakzo bekthamlo in, thu leh la a ki vaihawm bangbang zuih zawhna nei na hih manun mai lamah zong hih dan lungsim hoihte kep tawntung ding thupi mahmah hi. Na hanciamna uh, na supna baina uh, na sepkhop theihna te, na thuakzawhna uh, lungdam zia nazat siamna uh leh na angtanpih siamna te hangun a kibawl mimal khempeuh tungah lungdam mahmah hi.

Ka khuapih tuipih vaihawmna ci-in Malaysia sung pan hita leh gam tuamtuam pan hita leh sumtang mahmah tawh tha apia sanggam khempeuh tungah zong lungdam mahmah hi. Zomi Cup 2016 a kipat a tawp dong zingsang khua vakma pan sun nisa sung khuamui dong hamciam tak a hong seppih ZAM palai khempeuh tung leh Pa Dai Za Kam (Pangsak) tungah lungdam mahmah hi. Zomi Cup 2016 sung tawntung sun nisa nuai ah video record hong neih sak bek thamlo in zanteh tua teng mah hong edit sak pah a leitung bup Zomi te et theih ding a hong khah khiat sak Zomi Daily Media leh man hong zaihsak Tg. Khampu tungah zong lungdam mahmah hi. Kilawmtatna kimawl ahih mah bangin siamna bek kidemna hilo, thumanna leh dikna kidemna zong ahi hi. Hih hunsung ki lungkim lohna, ki pau khialhna a om leh khua khat le khua khat lungsim sungah kikoihlo in Zomi Cup 2016 zawh tawh siangkhawm sakin beisak ni. Zomi Nam Ni pahtawina ih bawl ahih mah bangin Zomi Nam Ni ciangin nong kihelkim na dingun kong zawn lai uh hi.

Puankhui set kikawm thei :: Puankhui set kawm nuam na om uh leh ZAM zumpi ah ki dong thei hi. Kizopna ding : Cii Cing 0111 2828 482

Na omna (address) a maanin pia in :: Zato paina, zum khat peuhpeuh paina ah na omna hong kidot ciangin na omna mun address mah pia pah lel in. Na om ngeilohnapi na lawmte inn, kipawlna zum, biakinn cihte na piak leh nang adingin buaihuai zaw bek thamlo in supna hong tungzaw ding hi.

Kidawm ciat ni! :: Tusung teng Malaysia mun khempeuh phialah mat leh hen omden ahih manin Zomi te ih hawhna ih ciahna ah kidawm in pilvang ciat ni. UN Card nei tawh neilo tawh man uh ahih manin a kisam lua ahih kei naak leh vaak loh theih kisin ni.

Palik te’n sum zonna’n hong nei :: Malaysia gamsung mun tuamtuam ah operasi leh lamkhakna om kawikawi in adiakdiak in, Kota Raya, Pasar Seni, Pudu, Pudu Plaza, Bangsa, Kota Damansara, China Town, Genting Klang, Setapak, Mid Valley, SS2 cih tengah palikte tam mahmah hi. Vak ding leh zong tua munte pelh sawm ni. Sum na piakpiak zawh kei ding a leh vak kei zaw in bang hang hiam cih leh palik te’n sum zon na’n hong nei uh hi.

• Lungdamkohna
• Rev. Dr. Ngul Khan Pau (India) te nupa in ZAM adingin US $100 hong piakhia ahih manin ki lungdam mahmah hi.
• Thang Sawm Tung Nung (Tuithang) in Thupuak bawlna ding RM50 hong pia a kilungdam mahmah hi.
• ZAM nasepnate tha napiaknop leh hong kisang ding hi.

Note :: PDF tawh na simnop leh
Hih link >>> PDF File tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.

Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh Zomi Daily website tungpan kongsuaksak zelzel uhhi.