Tual leh Gaal (Zomi leh CNF) ~ Pu Zokhai

Written on 13 January 2012
Zomi Sanggamte,
Tusung CNF te leh Kawl Gamukte’ kilemna bawlna tungtaang kei’ muhna tomno leh Tual leh Gaal kaalthu tomno ka’hongsung nuam-hi.
Amasa-in, Zogam-ah CNF/A te-in bangseem, bangbawl, bang meetna/supna hongtun uhhiam cihthu ataangpi-in I-theihsa hitaleh hong gelhthuah nuam-ing.

CNF/A te-in Zogam adiak-in Tedim Khuapiseh leh Tonzaang Khuapiseh sung-ah neektawm zong-a sumsin Zomite’ tungpan-in avaal akaan-in sum sut uhhi. Lahpakding-in, Thai Blanket aki paksak laai-in Zomite-in Kawlpi pan-in blanket 2 batlaak uh-a, Tonsim-ah zuakleh asumbul apiak zawhteh innkuan kha-1 neekding meet-thei ahihman-in alutang-tawh pua-in pai keengkeeng-a, CNF/A te-in Tonsim Khuapi tunma lamkaal (Ngur Khua, Zo Tlang, Tlang Sam, Zote, Luan Tlang,…) pan-in blanket 2 apua mite’ kiangpan 1-ta laaksak ahihman-in kha-khat neekding lutang-tawh apua Zomite-in kha-khat neekding genloh sumlu nangawn cin zolo-in leiiba dongtuak suakden-uhhi.

Lutang-tawh ahilo sakol-tawh ahihkeileh midangte’ sakol cial-a kuhva-peuh, kabasia-a kipan Seenbawl leh Kawlbawl vannengnengte -peuh Kawlpi pan-in la-in sumsinna abawl Zomite’ tungpan-in percent 10/20 la uh-a, thau-tawh ahihman-in kinial ngamlo-hi. Percentage-a alaak-uhpen sumlu pan-a tuat ngiau-uh ahihman-in van abatlaak, neektawmzong Zomi tampite’ gawl hong meeksak suakden uhhi. Hihpen ataangpi CNF/A te-in Zomite’ tung-ah abawl-uh siatna tampite’ lak-ah neucik hipan laai-hi.

Khua hausate’ tungtawn-in sumtang ngen uh-a, pawlkhatte bang-ah laaidal leh thautang tuunkhawm-in hausate pia-uh ahihman-in piakloh ngamloh ding-in sum ngen uhhi. Sihding sang-in piakding hi maita ahihman-in hausate-in pia uh-a, tua ciang-in gaalkaapte-in hausate man-in thongkhia-in gaam laai-uhhi. Hihbang sum ngetna-pen Zogam sung-a khua tampite-ah bawlden uh-a, Laigam lam-ah ahihleh tuabang sum ngetna avaal akaan-in bawllo ahihlem Hakha lawm/kithuahpih aneite-in theikim dinghi. Vaaikhawtlang, Khuangphah, Nahlan, Vaanzaau, Tuimuii, Bapi, Vapaar-a kipan taangdung suk-a khuate pan-in buhhuum/buhtang ataangtaang aseengseeng-in gumlaak-in amau’ phual-ah kipuak sak-hi. Mipih sapihte’ sum hong gumsuh niloh mite’ neekding antang tampi luting-tawh va-ki puak keengkeeng-hi.

Hihciang bek-tawh lungkim naaisaailo uhhi. Khuate pan-in mi guukmat (kidnap)-in sum tampipi ngen uh-a, “piak keileh thah” ding-in thukhah-uh ahihman-in innlehlo pai liang-in Zomite kitanh uhhi. Ka’ phawkpak thu-ah, Laaitui Khua pan-in mi 3 guukmat-in sum tuulza-10 tawh tatding thukhah uh-a, haksa pipi-in kitanh-hi. Kaapteel Khua pan-in mi 5 guukmat uh-a, sum tuulza-20 tawh kitanhsak uhhi. Phartlang khua pan-in Muizawl-khuasuak Pa Ngul Mung’ tanu ahi I-sanggamnu siamah Ciin-zong guukmat uh-a, a camp uh-ah sawtpi keem uhhi. Mizoram vaaipua ZRO upa khat-in theihngawhsakna leh thupiakna bawl keileh a-uut bang-uh’n tua I-sanggamnu bawlding-uh kician mahmah-hi.  Tuabang-in Zomite’ supna baaina ding-in naakpi-in helsia uh-a, Zomite-in khua-ul sisan-tawh athalawh ngiatngiat sumte-tawh gamdang apai CNF/A member tampi a-omlam I-theikim dinghi.

Tuaciang-tawh lungkim deksuailo uhhi. Khangno tuailaaite amau’ sung-ah aluut ding-in pumkaih uh-a, 1999 kum Ciau tuikhan hun-in akaih-uh mi 4 lakpan-in nih alehtaai ciang-in Ciau guun akaantan laaitak kaaplum uh-a, “tui-in taai-hi” ciziau uhhi. Agei-a alehtaai ngamlo (anua ciang-a ataaisim) khat-in agenna-ah, “Thau-tawi lecin na’khua, khuakiim khuapaam-ah hongki kihta mahmah-in buu-kyah mahmahding” cihtawh zol uh-a, ahizong-in kizozolo ahihman-in ataaisim ahihi.

Gaaltaai lamsang-ah CNF makaai-mah ahi Dr Sui Khar pahphot-in UNHCR phu-thei ahihziak-in CNF te’ hang-a gaalkaapte’ bawlsiatna athuak, dongtuak taktak Zomite naakpi-in hong deiidan sawnsawn-a, gam thumna tunnading hipeuhleh ci-in Malay leh India-a CRC (CNF te’ pawlhiang)-ah aki pumpiak Zomi khatlehnih a-omteei hang-in Zomi ataangpi-in deiidanna thuak-hi.

Hih agamtatzia-uh tawmnocik etpak bekbek-in CNF/A mawkpen Zomite’ ading-in bang-hiam cih ataangpi-in kimu thei-hi. Sumsut, misuam cih longaal bangci minphuah sakding I-hihiam? Tua pipi-mah amau’ mapanna-ah akihel Zomi a-omleh Zomite’ Judas Iscariot ahihna kician mahmah dinghi. Hithei ngeelngeel hileh Zogam Khuapite-a upaphual aphuhsawm zenzen hang-in kuamah-in inn saapsak keileh-a, kuamah-in leitang zuak keileh bang gamtaang theiding ahihiam? Azenzen-in nidangpek-a Laimi khatpeuh-in hong leisa leitang/inn hong saap zenzenlehzong tua leitang/inn suksiatding haksa lualo ding-hi.

Zomite’ sung-a akhasiat-huai mahmah khat-ah, Zomi leh Zomi kitawng kina-in kithat giapgiap napi-in hihbang I-gaalte, gawl hongmeek thapaaite, sum hongsut thapaaite’ hongbawl bangbang I-dawh dide mawkpen ahiding mahhiam cih minam sung-ah lungngaihhuai mahmah dinghi. Abeisa Ma-Sah-Lah hunpek pan-in Zogam khanglam pan-a hongkuan palikte-bangpen hong eengtat mahmah, gamhtat mahmah himahtaleh Zomite-in bangmah cih hetlo-a koih pikpek, abawl bangbang thuak keeikaai pongmawk, Pasian’ thuzuui lua-hiam cilehanglah khuapih tuipih unau sanggam, lawmta nangawn kikheem giapgiap, kine giapgiap veve-… Khanlawhhuh mahmah ta-hi, Zomi-aw! Sanggam Vaangteh khuami pawlkhat naakpi-a ka’ angtanpih pawlkhat-pen; Taungpai palikte-in Tuidiil Khua nawl-ah sum mawknget uh-a, tua sanggamte-in palik 6 that-in Mongshu (mai-shou) –ah bu uhhi. Tuate omlaai hileh Zomite’ tung-a sum hong gumsuh niloh CNF te ahoihkhomkhat that thei khading ahihman-in mi paammaih mahmahte ahi uhhi. Hihbang I-cih ciang-in tualthat ding-a kihaanthawn hilo-in gaalthat ding-a kihaanthawn I-hihi. Tual leh gaal theih kuul-hi.

I-khua I-tui a-enzo ngapzong hilo, I-mipih I-sapih dongtuakte nangawn ahuhzo ngapzong hilo, athukhualpi bangkeek-in Chinism/Chinisation lamkhawng gen pualpual pongmawk, “CNF-zong Zomite’ gaalkaapte mah-hi” mawkcih, lungsim zaii mahmah daankhat-in, “Chin hihang, Chin-ah luut-in makaai panmunte va’leending” mawkcih, amau aluutnuamlah hi tuanlo, a-Zomite’ lak bek-a adawk kiukiau leltak, a-Chin kipawlna-a ava thuukluut-a Zomite’  ading-in satanh/sabaak ava-phu ngamlah hituanlo, hihbang-tawh I-minam hong valhtumnuam mite’ ading-in lampi hon saksak laaiding I-hihiam? Naakpi-in ngaihsut-huai luata-hi.

Israel-mite Pasian-in agawt laaitak agawt hang-in, agawt hunlo-in namdangte’ simmawhding aphallo, namdangte ado ding-a asawl Pasian tuni-a I-biakpenmah ahihiam cihzong kisittel-huai mahmah lohiam? Zomi Biakna lam-a makaaite-zong I-ki tou (challenge) hunta-hi. “Hong-uk kumpite’ thu mang-un” cih Laai Siangtho Luui sung-a laaigelhpa I-thei uhhiam? Tuni ciangdong tua kammal azuui ding-in Pasian-in hongdeih ahidinghiam? Hikei! Tuma kum 2000 kiim-in Peter Simon-a kipan nungzuuipite-in te-in amaan thute mang-in amaanlote mang tuanlo-uh ahihman-in thahna athuak-uh ahihi. Thumaan pulaak-hun, thumaan sep-hun hita-hi. Sumpi piakding bekbek-khawng haanthawn denkeei pong-in sumpi zeekna lam-ah sumpi bang-in zeekthei ngaplo, eima’ business sumbang-a zeek leldingkhawng biakinn-ah ki haanthothot sang-in itna thu-mah bulphuh-a kipat-huai mahmahta hilo-hiam? Nungzuuipite bang-in thumaanthutak leh itna’ ading si-ngam-a panna lamsang maaingat huaita hilo-hiam? Eileh-ei kikheemkheem laaiding I-hihiam?

Minam nasep-pen kipawlna minbek-tawh akiseemthei hilo-in mimal kim-in septheih hi-a, muiibunh zawlaai-hi. Gentehna-in, Zomi kipawlna min khat-tawh CNF te-in Zogam-a upaphual aphuhding I-va khaam sang-in akhuakhua-a Zomite-in innmun logam nana-zuak keiziauleh naakpi-in muiibunh dinghi. Ahizong-in minam lamsang hihbangciang kitel naailo ahihman-in I-khuapih I-tuipihte-in tuabang-a ana-kikhal kholh nading-in kipawlna min-tawh zaaksakna leh hilhcianna piakding kisam khading-hi. Bangbang ahizong-in minam vaai-pen naakpi-in sosaan hunta-a, veengta paamta lawmta kipaampaihpaih hunte, ki-el-el hunte, kisimmawh kizawnsak hunte beisak-hun mahmahta hilo-hiam?

“Hong pawlpih lote, na’gaal-uh ahihi”, cihciangbek hilo-in hong pawlpihloh genloh hong gawlmeek, hongthat, neihlehlam hong gumsuh mite I-gaal hilo dingmaw? Tuni-in Zomi veve hiate pawl leh huate pawl khawngpeuh gaal-in kibawlbawl-hun hi-nawnlo, hong netum, hong valhtum ding-a ma-tampi ala khinsate I-gaal hizaw buanglo dingmaw? Banghang-in hihzah liang-in “haii” laailaaiding I-hihiam? I-minam hihbang-in hongki nelhsiah gawp kimlaai, “Gualzopente I-hihi” cici ngamlaaiding I-hihiam? “Tuabel kha lamsang hi-e” kici khading-hi. Hong deiidan leh hong simmawh mite-in Pasian’ thu ziak-a hong deiidan leh hong simmawh ahihleh tua la I-sak maanmah dinghi. Pasian’ thu hang-a hongki deiidan/hongki simmawh ahihkei-a minam kibatloh ziak-a hongki deiidan hongki simmawh ahihleh tua la-leh ei’ Pasian’ thu (kha lamsang I-cih) kinaaksai lohlua-hi. Minam kideiidanna leh sila kineihna khempeuh adeihlo Pasian bia kicici kawm-in hong bawlsia minamte’ nuai-ah luut kawkaw teeiteeiding I-hihiam?

Israel mite-a kipan akhangkhin Mikaangte khempeuh Hell khuuksung tunggai ding-in I-seh dinghiam? Gaaldote vive, agam-agam, aminam aminam-a gaaldo vive ahi-uhhi. Hell sung tungding-a I-sehleh amau’ hong puakkhiat Hotkhiatna Thuthang bang-in kimang tuandinghiam? Naakpi-in khanlawh hunta-hi. Tuhun-a I-een mahmah gamliante Pasian athei masate (Seen, Japan leh Russia lobuang) hi-a, gaaldo masate-zong hi-uhhi. Amaute’ sang-a Pasian’ thu lam-ah a level saangzaw bang-in kingaihsun laailaaikha I-hihiam? Abul om-a, adawn om-hi. Abul kip-a, adawn huih-in muut-in huang zawsop-hi. “Gaaldona awng-un, gaal naaizo en-un, Topa’ dial khaai-un saangtak-in,” I-cihding hunta hilo-hiam? Taksa leh kha kikhen ngeilo-hi. Kha ahin man-in pumpi taksa ahing hi-a, kha a-om nawnloh ciang-in pumpi-zong kimanna nei nawnlo-in niinpa suak lel-hi. Athuukpi akigenna-ah taksa deihna leh kha deihna kido cihpen adaiilam pan-in enpak lehang, lunggulhna/huaihamna (Mangmuhna sung-a milim biakna-in huaihamna ahihi acihden)-leh kha’ deihna kido agennopna hi-a, adang taksa’ kisap thuguipite paihna hilo-hi. Huaihamna-in siatna bulpi ahihman-in kha’ deihna-tawh akido cihciang hi-a, gentehna pak-in; zudawn/zukhamna kha-in hong deihsakloh mahbang-in taksa inzong deihlo-a, gong-in aduhbek ahihi. Zuaugenna kha-in mudah-a, pumpi’ ading inzong hoih tuanlo-in gaal hauhna leh vaangbeina hi-a pumpi mahmah’ ading sia-hi, tuapen kam leh lungsim kipawl-a sepna hi-a, pumpi leh kha lamsang-ah huaihamna leh huaihamna kepzawhna longaal pumpi leh kha’ kidona omlo-hi. Tua ahihman-in taangtawngpek pan-in Pasian-in minam kalsuanna lamsang-ah ama’ khutma kilanghsak den-hi.

Laai Siangtho Thuciam Luui khempeuh ataangpi Israel-te’ minam kalsuanzia hi-a, tual leh gaalthu vive ahihi. Moses-in ama’ minam a-it vilvel man-in Egypt mite khat thatlum-a, Pasian-in tualthatpa-in ciamteh lo-hi. Canaan Gam aluahlohna aziakzong mithahna ziak hilo-in tuiphuul nading-a Suangtum khatvei asaatding nihvei saat-in haamsiatkam paukha ahihmanbek hi-a, Pasian-in gaalthatte tualthat cilo-hi. Minam a-it mite Pasian-in kumpi, makaai, kamsaang ding-in teel zawsop-a, minam asutuah, minam abuaisak, minam akhenkhia, minam alehheek mite mulkimhuai thahna tuamtuam-tawh that zaw-hi. Hotkhiatna nungsang nangawn-in Peter Simon; Gamhtat lel-hi. A’ Topa amatsawm siampilianpa’ naseempa namsaau-tawh avaat pahgiap mipa ahihi. “Hihpa gamhtat mawkven dokkiik ning-eih” cilo-in, “Ka’ tuute na-khoi ta-in” ci-in Vaan Kumpipa-in mawhpuakna lianpi pia veve-hi. Tua khinnung nangawn-in Jewlote (Jews ahilo mite)’ kiang-a hawhding nangawn a-uutlo tiuteu khat ahihi (Pasian-in ganhing namkim limte lak-a, “Go inla ne-in” ci-in zol tangtang laai-hi). Khauh masa photphot-a, Pasian-in kisam sa ahihman-in zol lel-hi. Nungzuuipi Pasian’ itpa inzong, “Amuhtheih a-u a-nau a-itlo mi-in muhloh Pasian it-ing acihleh mizuau ahihi” ci-hi.

Taangzaii nuamlua kisa-in I-sanggamte hong thahsak, hong gawlmeeksak, sum hong suhsak mite-khawng ahuam bangkeek khat-a I-paupau tepawl-in Pasian’ thuzuui ngeelngeeltebang deuhdeuh Pasian-in agawtding hun hongtung dinghy, banghanghiam cihleh kampau thupi mahmah-a, “Hotkhiatna kampau-tawh kisaang” (St Paul) ahih mahbang-in kampau mah-tawh Pasiankosiatna (Blasphemy) kibawl den-hi. Hiamgamhna-tawh hong bawlte hiamgamhna mahtawh thukding cihna hikhin saamlo-a, tuabangte pilna-tawh kidaalkhol thei-a, pankhopna-tawh kikhuplet thei-hi. Pil hun-in pankhop hunta cihna ahihi. Thauvuui thautang-tawh singkhuah suangtum-tawh kuan pahni cihna hilo-hi. Pilna leh pankhopna-tawh gaaldo kipatding hun-in hongkhen man-in dingkhia loding I-hihiam?

ZBC 295 sung-ah;

Taang 1na
: Gaal dona awng-un, Gaal naaizo en-un!
Topa’ dial khai-un, saangtak-in;
Gaaldaal silh unla, kiptak ding unla: (Gaaldaal: thumaanna leh muanhuaina)
Laai Siangtho’ hilhna na’ siiksan-un!

Taang 2na
: Eima’ lam mah-in zoding theikhol-in gaalte ngaapthawh-in I-kuan-hi: I-lumleh I-dial nii-ah tee-zialzial, thumaan-in thukhial lel ngeilo-hi!
(Thumaan-in thukhial lel ngeilo-hi; atung-a hongki bawlsiatna khempeuh thumaan I-ci dinghiam? Akhial I-ci zawdinghiam? Khial I-cihleh akhial nuai-ah banghang-in surrender-in va-nuailuut teeiteeiding I-hihiam?).

ZBC 291:

Taang 1na-
Aw, lawmte-aw, dialpeii en-un, vaanlaai-a kikhai;
Hong huhding Maangpa hong kuandingnI-zawhna anaai: (Kuan keilehang hong huhding hongkuan theilo-hi: ei kuanlo-in hong huhding Maangpa bek kuansak sawmsawm nawnkei lehang).

Joshua-in, “Pasian-in do ding-a, eite-in I-en dinghi,” ci mah-hi. Amahleh agaalkaapte akuan uhhia-leh? Ngilngeek tak-a genna hi-a, amahleh agaalkaapte kuanto, phuulto, nawkto-in do uh-a, Pasian-in amau’ sepna (acihtaaklo, thahaatna neucik, bangmah thamlo-mah)-ah panpih, kihelpih, dopih ahihman-in gaalzo uhhi. Joshua-in akampau khitsa bang-in kuanto-in en hiit-hiat peuhmah lo-hi. Do-hi. Pasian-in do-pih pahhi. Upna-tawh kalsuanna-pen eima’ hih khomkhom-a kipatkhiatna hi-a, akipankhia mite Pasian-in kisam asak zil-in uplahhuai zahdong-in huh-hi. Gaaldo lo-in gaalzo kisuak theilo dinghi. Thumaan I-gen loh-in thumaan ama’ thu-a hongpai theiding hilo-hi.

Bawlsiatna sungpan-in I-pusuah mateng suaktate I-suak ngeikei dinghi. Eimahmah I-kitom, I-paikhiat loh-in hong simmawh hong heencip mite-in hong tuah kiingkiing-in suahtaakna-ah hongkoih ngeilo dinghi. I-kam sung-ah an hong kikoih phialmahleh I-valhsuk loh-in I-gil avah keiding-hi. Sahkhualumlehna (Revolution) lo-in minam khat khangto ngeilo dinghi. I-minam paukam leh ngeinate eimah-in I-sepsuah (practice) loh-in I-pau hong pau-siamsak, I-ngeina honghilh ding-in Pasian hong tuaksuk lodinghi. I-minam eimah-in I-tawisaan keileh “Hih Zomite minamlian ahihi” ci-in namdangte’ kiang-ah agen kawikawi ding-in Pasian hong kumsuk lodinghi. Eimahmah I-kipat ciang-in Pasian-in hong panpihding hipan-hi.

Leitang’ sang-in (kaalhelhpak lehang) sisan-tawh lungngaihding thupi zaw-hi. Chin State I-huamnop hang-in Khalkha khangsiah-a mite I-huamzo ngeikei dinghi, banghanghiam cihleh Tedim Tonzaang lingleng sung-ateng nangawn sungpan-in Zomi kicihding azahpih tampi omlaai-hi. International boundaries –in hongkhen hang-in Manipur State enpak lehang kampheen akuullo, nau-minphuahzia, pilehpu lawhzia, min kitapzia, ngeina ataangpi I-kibatpih I-sanggamte huam-a thugenna leh lasakna-in sisan-tawh thugenna hizaw-a, muiibunhzaw khadinghi. Ngeina, minlehpuam-a kipan kibatna a-om hetlo minamte Chin State khanglam-ah ateen man-in I-sanggamte naak-hihloh lua-hi. Paite, Simte, Vaaiphei, Kuki, Thahdo, Gangte-a kipan behlehboung-a akiman, ngeina leh sahkhua kibatpih I-sanggamte Chin State pua lam-ah ateen man-in minam vaai-a I-paihtuam nading omlo-hi. Tuhun-in gamseh nih gawm-a leitang’ ading gaalphuang ding-hun hilo himahleh sisan-tawh thugending, minam hihna koikoi-ah teeng talehang I-lapsaang ciatding longal I-minam abawlsia mite-peuh va’pop mawkmawk zahding-a haii hunding hi nawnlo-hi. Atung-a hongki pulaak khinsa mahbang-in pil hunta-a, pankhop hunta-hi.

Minam khat-a Zomi abawl Pasian’ minthanna ding-in I-minam hihna nungtakiik sakni!

Zokhai