Cil phengsiat kei in (Don’t Spit) ~ Evan. Suangh Dal

Cil pheng siat kei in (Don’t Spit) ~ Evan. Suangh Dal

Cil pheng siat, nap dik dada, mi’ an nek khual lo-a khaksawh la duadua, mi’ muhna ah kam hum lopi-a ham beba, a nawl khat ah pai kiangkiang lopi-a mi’ lakah hatchiai zaizai, tua ci kon kici lehang a kiphasak, a kisiangtho sak, a kihau sak, a kigamdang pai sak a kici lai i tual sung khuasak zia hih Covid=19 huhau bek mah in hong puahpha zo bek ding na hi pian thong.

Tun a kuama peuh mi’ lak ah khuh pak bek zong kisuang thei pianpian ta. Ni danga tua ci khuh zaizai lo ding nai ve Sya. Tua khawng ah na cil sia ziau ziau kei oh Pu khawng kici leh a kiphasak hi, a kisiangtho sak hi, a kihau sak hi icihte pawl kiphat sak vai, kisiangtho sak vai, kihauh sak vai, kipil sak vai, kizahtak loh vai ahih het loh lam i sin toto ta ding hi.

Tanglai-in misi sawt vei pipi kikoih-a misi gei-a a sithu a nulnulte buhman lom a kipiak teh a khut sil cih thadah tawm a nul bek zong kisiangtho sak, itna nei kei kici uh hi.

Tuhun ah zong i pi i pu TB vei khat, naupangte tawh kinaih sak loh ding, kep sak loh ding, tawi sak loh ding, an muap sak loh ding, i tano TB vei dam lo khat a lawmte tawh kineh sak lo-a tuam kep ding (social distance), kidop sak ding khawng kiphatsakna, it lohna, deidanna ih sakte sak nawn loh theih nadingin hih i kidop Covid=19 tuah thu in i mit te ak bang hong keuh sak ding hi.

Sen’ bawl ka Sola battery uh khal teh nisa lua ahih manin a puak khap loh ding ginna-in sun sung tawmvei ta ka meite uh vaksa in ka koih thei zel uh hi. Tua pen ka inn lak nunote khat hong hawh citciat-a na mei khak in hong ci lan hi. A thu gen ta leng hong ngai tuan lo hi. Kihauhsakna, kiphatsakna dan khat in mu pong mawk ahih manin a thu mangin ka khak-a ama ciah khit teh ka hong kik hi. Khat veivei kihau sak, kipil sak, kisiangtho sak, kisen sang sak khawng ih kicih cih pong mawkte pen i tual thu theihna (civilization) a niam luat man na hi zaw gige thei hi.

Bangbang hileh na cil mawk siat ken. Mi’ lakah, mi’ mai ngat-in hetchiai zaizai ken. Kidal kihung kawmsa-in khuh in. Covid ta se keh, cil khawng khak sawh khawng ek sangin kikih zaw hi. Pa na khaksawh pheng siat kei o hong kicih leh awaw ci pah lel in.

Cil mawk siat ziauziau lo, Khakkhawh mawk siat ziauziau lo tual ihih zawh nading hanciam ni aw… Don’t spit. Na cil sia ken. Evan. Suangh Dal