Kum sawtpi nadam nading tulaitak a nathuak phot in

Kum sawtpi nadam nading tulaitak a nathuak phot in

Tangval khat a gamvakna ah a khe liing in sun kha hi. Liing sut ahihlam a theih ciangin tua liing lakhia dingin kithawi a, ama hihtheihnateng tawh a lakhia hi. Ahi zongin tua liing a vekpi in lakhia khalo ahih manin a sunglam ah naiphual(a liing om laiteng in a khe na sak) hi.

Tua bangteng tawh hun hong bei toto a, tawlkhat khit ciangin tua liing omna mun hong nasia mahmah ahih manin at(operation) bawl hong kul hiau mawk hi. Amah lah ki-at ding cih khawng ut masa hetlo mawk hi. Banghanghiam cihleh ki-atna hanga a thuak ding natna a lauhman ahi hi.

A tawpna ah Siavuante’n “Tu-a na ki-at leh na khantawn in na dam dinga, hih hangin natna le gimna na thuak nawn kei ding hi. Ahi zongin na at khiat kei a, na hici koih zenzen leh na khantawn in hih hangin natna le gimna na thuak den ding hi,” a ci uh hi. Ki-at ding a ut masak ahihloh hangin a khantawn dam ding(hih liing hanga natna le gimna thuak nawnlo ding) cih telzaw ahih manin khapet teta mah in ki-atsak a, damna ngah in tua liing hangin bangmah natna le gimna a thuak ngei nawn kei hi.

Thalakna
I nuntakna ah neuno khat ci-a i awlmawh luat kholloh hoihlohna pawlkhat in i nuntakna buppi hong siasak thei hi.

Tulaitak in nusiat ding, mangngilh ding, taisan ding haksa i sak mahmah thu pawlkhatte’n i nuntakna buppi ah natna le gimna hong tun thei hi.

Ei hong nusia in, hong mangngilh a, lawmdang hong ngaihsan, hong awlmawh zolo, hong khual zolo mi khat khenziau ding haksa sa in i let teta hangin, ei ading natna le gimna, khasiatna le lungneuna bek hong pia ahih manin i khantawn ading telzaw in nusiat huai mite nusia mai ni.

Na lungsim khempeuh tawh na it ngaungau, na ngaih ngaungau, na hihtheihna khempeuh tawh na khual, na deihsak mi khat in nang ii deihsakna le na khualna hong thupi simsak theilo in na lungtang sungah liing bangin hong sun kha hiam? Khei khia mai in…Tua hangin na khantawn natna le gimna tawh na nuntak sangin tulaitak na thuak pak pen nang ading hoihzaw hi.

Khantawn ading i gelna tawh tulaitak khapet teta liangin thuak mai zaw ni… Lungdam, Dong Mung