Malaysia, Suria KLCC inndawl 6 na panin pasal khat lenkhiatsawm

Malaysia, Suria KLCC inndawl 6 na panin pasal khat lenkhiatsawm

Malaysia, Suria KLCC innsangtung panin zanni Saturday ni in pasalkhat lenkhiatsawm cih NST pan kiza hi. Tua alenkhiat sawmpa pen kum 49 aphakhin khat hi a, zanni Saturday nitaklam 4:50pm hunpawl in thupiang ahihi.

Tuapa pen Suria KLCC asunglam aom Books Kinokuniya kici laibu zuakna amailian aom Corridor panin alenkhiatsawm ahihi. (NST te’n inndawl 6 na acih hangin, Books Kinokuniya mai ahihleh inndawl 4 na hizaw khading hi)

Tuapa pen kihehsak mahmah a, angeinai ah khatpeuh in hongnehphei khakleh ka lengkhiading, kia tuaksukding hi ci’n mipite lauthawngsak mahmah hi. Khatveivei mikhatpeuh in atuahsukloh nadingin agenpih ciangin akhe alangkhat bektawh Corridor akeukhat sikin, akhutzong alangkhat bektawh Corridor Barrier lensa in omzel hi.

Suria KLCC pen gamtuamtuam pan gamdangmi Tourist khualzin tuamtuamte bekthamlo, Malaysia gammi te mahmahzong alimpai mahmahna munthupi khat ahih manin, vanlei vanzuak in apai mipi kitam mahmah a, ki en zihziah hi. Tua pasalpa atuahsuk zenzenleh amanding inzong anuaidawl ah Fire and Rescue Department pan Firefighter honkhat in ngen “Net” dawhsa in amanding in akigingsa in om uhhi.

Tuabangin nai 2 val sungbang atuakding in akithawithawi khitciangin Fire and Rescue Department leh Police te’n limtak in hopih uh a, anunung ah atuahsukma in mancipthei, honkhiathei uhhi. Tuaciangin Shopping Mall sung aom mipi te lungdam in mihing khat ii anuntakna ahonkhia kumpi thunei te’n thapiakna in ki awngziahziah hi.

Hihvai tawh kisai in palik kumpi thunei ahi Dang Wangi district police chief Shaharuddin Abdulah inzong hih buaina thupiang pen atakpi mahhi ci’n gencianna neikhia hi.

City Fire and Rescue Department director Nordin Pauzi in agenna ah hih buaina thupiang aom ciangin nitaklam 4:52pm hunpawl in huhngetna Distress Call hongki zasak hi ci’n genkhia hi. Tuaciang in Jalan TUn Razak leh Hang Tuah Station panin Firefighter akigawm in mi 15 te’n aphual ah kidelhpah cihi.

Aphual akitun ciangin Suria KLCC inndawn panin pasalkhat atuahsuksawm kimu ahih manin, amanlang in anuai ah ngen “Net” kidawhpah in, atuahsukleh mattheih nadingin ki hanciampah hi ci’n genkhia hi.

Nitaklam 7:03pm hunciangin tuapa pen atuahsuk, alensukloh nadingin ki genpihthei a, tuakhit ciangin Police te’n asepding aombangin avaihawm nadingin Police te khutsung ah ki apthei hi. Tua alenkhiatsawmpa pen sumvaitawh kisai in leibat “Debt problem” honkhat neihiding in ki ummawh cih kiza hi. ZD Sawltak #zomidaily