Siamsin makailui Tg. Dal Mun Mang tawh kisai

Siamsin makailui Tg. Dal Mun Mang tawh kisai

Hih dan thute ah kihel ding pen ka pelh theih laiteng kapel hi. Bang hang hiam cihleh kei pen Kumpi sungah nasem siavuan khat kahi aa hih thupiang ahih leh kumpi nasem siavuan siama tetawh, kumpi zato sungah thupiang khat ahih man hi.

Ahih hangin siamsin khat ka hih ngei na te, keima aituam in lungnop lohna, dahna te leh social media te ah ka min ngiat tawh hong ki tagged in lai hong kikhah ciangin hihvai tawh kisai bangmah semkhiat loh ding hong piang thei lo ahih man in hihdan social media tungah hih lai ka hong at hi.

Kawlkam aa ka at kei aa Tedim kam mah tawh ka hong at ding hi. Kawlte leh namdang te theih ding kisam kasak loh man hi.

Hih lai pen kei ma aituam muh na ahihi. Kei pen Kawlpi zato ah asem ngei/ asem laitak ka hi kei aa mi gensawn leh social media tung pan ka muh te tungtawn in a at ka hihi.

Social media tung pan mah in ” Dai dide ding maw… khat peuh sem lo ding maw..?” hong kici ahih manin Social media tung mahah ka sai om kei aa hih lai ka hong at pah (saisai) hi.

THUPIANG

27-Jan-2020 zan in Mangpi tawh a lawm khat zan vak uh aa ဆိပ်ကမ်းသာလမ်း pan kikhen uh hi. Myoma Bazaar mai ah 11:00 p.m pawl cycle tuah sia aa 11:30 p.m pawlin Kawlpi zatopi ah palik 2 in tun pih uh hi. Zato atun ciangin Admission kihih (zato kilum sak) aa Mannyl (Lu kisu kha cina te aki khai zel zatui namkhat) kikhai sak hi. Tua zatui thawlkhat a bei ciang in (tun social media ah ih muh a meima tawh alupna tungah) zingsang nai 8 dong kihici koih cip hi.

KEI MIMAL(aituam) MUHNA

1. Zato ngeina bangmah in Admission ahih uh hi. Police case ci in seal na khen pah uh hi. (A maan te Social media ah alai dal in kimu thei hi).

2. Self Injured ci-in na ciamteh uh hi. (Zato atun lai in ih Mangpi in “keima thu in ka puk aa ka liam hi” ci hikha thei ding hi.)

3. Admission lai tungah siavuan khat ii sign kimu thei ahih man in siavuan in khat vei bel en hamtang ci-in kituat thei hi. Zatui tawlkhat khai hi ci in kinai pih pawlkhat in gen hi.

4. Siavuan/ siama khat in en leh akisam Xray te CT Scan te zaih ding in sawl/vaihawm ding aa, ahih hangin amah a kha ding a mah azawng ding mi/ nasem om lo ahih man in kizaih theih leh hih sak.theih om lo dan a suak hiding hi. Emergency CT scan zaih theih ding policy/protocol kician zatopi in nei lo hiding hi.

5. “Mangpi ii puan sungsilh ah TU cih lai ki at sam hiven. Tua bek na en lo uh aa…” ci in hawm thawh na zong a om hi. Cina te puan mawk suah sak ding pen angeina hilo hi. Bang hanghiam cih leh Mangpi zato atun in tei in pau sitset thei ahih man hi.

6. Social Media tungah aki at mahmah ahi “ပိုင်ရှင်မဲ့” cih kammal vai. Zato ah Mangpi atun lai in inn aa te na theisak kei un cih dan kammal pau ci hi. Lu kisu kha cina khat ii thugen pen 100 ah 100 aman in kila lo hi. Siavuan siamah te pen social workers te hilo aa health care providers te ahih lam phawk huai hi. Hih mun ah na asem ding in zato te ah “ဆေးလူမှူဆက်ဆံရေး” ci in nasem pawl.kikoih aa hih te in hih dan hun ciang in na asem.ding uh hi. Ahih hang in hih na asem te in zum hun a nei uh aa tua lo in sep sak lo zel uh hi.

7. “Tua hun lai aa cina en siavuan siamah te in Mangpi ii Lim la pak in group tuamtuam ah hong khah le uh kithei pah ding hi” aci pawlkhat mu ingh. Siavuan siamah te in cina khat peuh ii lim a lak leh interdepartmental thu kikupna leh record bek ding hi aa mite mai ah mipi theih ding in khah khia leh tua siavuan siamah a khial ding hi.

8. “Mangpi ading puanza khat bek zato in pialo..”. Himah hi. U lian te hong pai ciangbek ading puanza a kang sitset te bizu sungah kiseng aa hih dan zan hun ciang in bizu tawh a len te zum kah lo uh aa zan in zum a kah phial zong bizu tawh hong hon dihdih lo ding uh hi. Tungsiah phalna ngah lo ci ding uh hi. Hih in Kawlgam ngeina hi. Hih dan cina te ading a sem ding social worker kisam hi. Zatopi in a vai hawm kul hi.

9. “Sanggam khat, u le nau khat bangin tuat lo maw.. tua siavuan te mahmah..”. Himah hi. Sanggam te u leh nau te aki nusia aa cina a kikhoi a ki en hizaw ahih man in hih dan kammal ahih leh (kei ma aituam in sensitive lua ahih man in) ka za dah hi.

10. “Mangpi pen mawtaw in taih hi” a ci om hi. A cycle lah (social media aa man sungah) kisiat luat na om lo hi. [Mi te ii up mawh gen]

11. Mangpi in zu dawn sa in cycle hawl hi ci uh hi. (Zato ah hih kisit cih na record kimu lo hi.Ahih hang Post mortem ahih na ah bel agil pi sungaa tuite National Laboratory ah puak ding uh hi. A result a kha in sawt thei ding hi]

12. Mangpi in cycle lukhu khu lo hi ci uh hi. (ရင်ခွဲစစ်ဆေး na ah alu guh kitam cih na za sim ingh. Lukhu khulo acih uh man thei ding hi. Cycle Lukhu na khu zenzen leh hizah hilo ding hi.)

13. “Siavuan/siamah te in 11:30 p.m pan 8:00 a.m sung bang hih… cina hicih a nusiat liang uh…?”. Thei keng. Tua hun lian aa a om hi kei ingh.

At toto laileng tampi om lai hi. Hizah tawh khawl phot ning. Ih etna kiu kibang lo tek ahih man in ih muhna kibang lo ding hi. Kawlpi zatopi khialhna tam mahmah hi.

Mipi in siavuan siamahte ahawm thawh mah bangin siavuan siamah te lampan zong mipi ahawmthawhna om aa mipi ii muhloh amau septheihna ii apualam nate tampi a om hi.

Anusiat innkuan pihte tawh ih dah khawm hi. Mangpi in hong nusia khin hi.

Hihvai tawh a kitom nuam, deihlohna a lak nuam, sum deih siavuan, huaiham siamah ci aa a awng awng mipawlkhat social media tungah ihmu hi.

Tuabang mite ka hong siang gen nuam hi. Kawlpi Zatopi bek ii thanemna leh khialhna hi kei. Na om na uh Kawlgam mun tampi aa zato te ah a hi ci pi ahihi.

Kawlpi zato ii khialhna deihloh lahna, lungphona neih ding lel bek hanciam pen Mangpi nuntakna khat a sim mawh bawl hizaw nu teh. Ahih sawm takpi na hih vua leh Kawlpi bek hilo Zato khempeuh ading hih zaw un.

Na hih takpi uh leh azenzen in motor cycle na zat uh leh lukhu khu un la zu dawn het lo leh lungsim teitak in, pilvang tak in sem un. Hihdan in kikhelna na khatpeuh na hihzawh sawm loh ding ahih leh dai tak in om zaw un. Sihlawh zah aa anat laitak anu apa kinaipih te theisak nuam lo in a thuak cip ahi ih lawm… Mangpi… a lungnop zaw ding hi… Nung Mun Thawn