Jordan Gungal aom Zaatari Refugee Camp

Jordan gungal aom Zaatari Refugee Camp

Syria gamsung ah 2011 kum Civil War hongpian ciangin Syria gammi te tampitak agampan in galtai in hong pusuakkhia ngaingei uhhi. Tuabangin Syria gampan ataikhia pen 3.5 Million val bang phading in ki ciamteh hi.

Hih Syria gampan hongtaikhia tepen agamveng uh ahi Turkey, Lebanon, Jordan, Iraq cih gamtuamtuam ah hongki thehthang uh a, gamgidung tengah giahphual hongsat uhhi. Tuate pen galtai ihcihcih Refugee mah hong himawk uh a, United Nations te panpihna tawh tawmvei abelhpak dingun Refugee Camp hongbawltawm uhhi.

Tua Refugee Camp tuamtuam aom sungpan Jordan gam, Mafraq khualnawl aom Zaatari Refugee Camp pen mitam mahmah phadiak a, asawtciangin khuakhat hongsuakphial mawk hi.

Zaatari Refugee Camp pen 3.3 Square Kilometer bang zai ahih manin leitung ah Refugee Camp agolpen nihna hongsuakta hi. (Leitung ah Refugee Camp agolpen ahihleh Africa Kenya gam aom Dadaab ahihi)

Zaatari Refugee Camp pen 2012 July kha in akipankhia hi a, hih Camp ah aom ngei Refugee mi 430,000 valkhin hi. Zomi te kammal zatdanleh gamthumna akipuak zong honkhatmah omsam a, ahi zongin hih Zaatari Refugee Camp ah ateengsuak bekbekzong mi 83,000 val phamawk ahih manin, hih munpen Jordan gamsung ah khuapi alianpen lina in hongki ciamteh tamawk hi.

Jordan Gungal ah dahna kahna hagawina te aom nawnloding ihsakleh Zomi te mahbang in Refugee galtai ana omveve hihtuak mawk hi. ZD Sawltak