Ngaihsutna le Lungkhamna ~ Job Cinpi

Ngaihsutna le Lungkhamna ~ Job Cinpi

Leitung mi khempeuh pilnuam uh a, thei nuam-in gualzo nuam tek uh hi. Tua manin pilna le siamna zong den uh a, khangkhat khit khangkhat pil semsem-in muhna thak le theihna thak tampi neithuah-in muthuah uhhi. A beisa kum tawmkhat lai-in mipil misiamte i cih pen a pianpih khuak uh tawh kisai hi a, a pil a siam i cihte pen a ngaihsutna khuak kilamzia uh a tuam pian ngiat uh hi, ci-in kium in kisang hi.

Ahi zongin mihingte pilna a san zia tawh kizui mahin muhna le sanna dang khat hong mukhia leuleu uh a, pianpih khuak kilam zia a hoihna in gualzawh matutna ding ngaihsutna hoih pia thei lo hi, cih thu ahi hi.

Pilna i cih pen zonga sin ding ahi manin, a zong zo a sin zote in pilna ngah uh hi. Tua mah bangin ngaihsutna khuak hoih i cih zong i pianpih khuak kilam zia in thu khen lo a, ngaihsutna khuak i cih pen i zatmunnna tungah kinga-in kikhel thei hi, ci uh hi. Leitung bup zel a minthang i cih mi pawlkhatte a neu lai-un a pil a siamte bekbek hi lo uh hi.

Laisim a thu a ciamtehte in thu thei pah uh a, a simsa thute a lungngai te in thuthak mu uh hi. A theihsa thu le la tampite kaikhawm-in a ngaihsun tuah mite in paunak phuankhia zo uh a, tua bang mite thungaihsut hat kici hi. Bang mah ngaihsun lopi thu a thei tawm kua mah om lo hi.

Khangthak pilna lamah a khangto mahmah America te in khangthak pilna thupisak mahmah uh ahi manin, School of Thinking sang na nei uh hi. Thu ngaihsutzia pen sin thei hi a, a mun a gam, a hun a nai tawh kisai loin a munmun a hunhun ah kisin thei hi. Na sang kahna ah na lawmte bangin setbing tawh na pai zawh kei a leh thungaihsut hun sawt a ngah zawin kiciamteh pah in.

Thu bangci ngaihsut ding cih pen haksa a sa mi pawlkhat om thei uh a, thu ngaihsut i cih pen a lamdangpi hi loin, mawtaw, saikel tawh sangkah te le khe guak bek a sangkahte a pilna, a siamna uh a kilamdanzia , a hoih a pha nam nga nam guk tuak bang limtakin sittel inla ngaihsun in.

Thu khatpeuh ngaihsutna ah thungaihsun i cih pen siat ngaisutna ahi loh oam theihtel ding kisam pha mahmah hi. Mi pawlkhatte thu a lim ngaihsut mahmah tawh a kibat uh hangin ama thu ngaihsut pen a siat ngaihsut ahi lam phawk kha lo uh ahi manin, lungkhamna bek ngah lel uh hi.

Gentehna, Leiba thu a ngaihsun mi nih. A kha in, ka leiba bangci cih leng loh zo ding ci-in sum ngah nading la.pi zongin ngaihsun hi. A khatzaw ahi leh ka leiba loh zo kei leng ka inn ka loteng pai ding ci leng, tua leiba ka lak neih sese, ka inn ka loteng pai leh ka zi ka tate bangci cih peuhmah ding ci-in a leiba thu bekbek ngaihsun hi.

Bang thu ngaihsun na hiam ci-in a nih un dong le hang ka leiba uh a ngaihsun ka hi uh hi, ci tuak ding uh hi. Ahi zongin a khatzaw pen thu ngaihsun hi loin a lungkham ahi lam kua kitheihpih lo hi. Ka gen theih zel mah bangin khuaksa lianga thu ngaihsun zo om lo hi. Ahi hangin khua bek hi lo, ci- nat lawh lianga lungkham mi tampi kiom mawk hi. Lungdam, Job Cinpi