Nang le nang kimuang in ~ Job Cinpi

Nang le nang kimuang in ~ Job Cinpi

Ei le ei kimuan ding ka gen ciangin kiphatsakna tawh kimuan ding a gen nuam ka hi kei hi. Na khatpeuh na sep ngam lohna, na kipat ngam lohna a hang pen nang le nang na kimuanna a om loh man hi thei gige hi. Pasian in hong zawhpih ding hi, ci-in na upna zong nang le nang na kipuanna mah ahi hi. Bang hang hiam cih leh Pasian in hong zawhpih ding hi, cih zah dongin na upna tungah kipuanna na neih man ahi hi.

A upna tungah kimuanna a nei lo mi peuhmah in Pasian muang ing a cih hangin, hi zo taktak diam, piang zo taktak diam, ci-in lung-iang den ding uh hi. Kei bang lel tak Pasian in zong hong zang nuam ken teh, zat tak hong sa ken teh na cihcih leh na cihna mun ciang bekah na om ding hi. Na up na muan ngam zah na ngah cih pen a kipan lo, a kithawi lote adinga kigen hi lo hi.

Na thugen na lagen khat hong kithusim loh ciangin ka thugen thupi lo ahi diam ci-in lungkia pah kei in, mi khempeuh in anlim duh lo a, naungek khat an ham a tahtah zong na hi kha thei hi. Zatang khat tawh natna khempeuh kituak lo ding hi. Tua pen na theihsiam ding kisam hi. Tua zatang kem cing peuh le cin a kisam khatpeuh adingin a hoih pen zatang suak ding hi.

Dam nuam napi zatang khum bekbek a ne nuamte pen naupangnote ahi uh hi. Na bawl khiat zatang a ne khate in lim kei, khum kei hong cihsan hangin lunghimawh kha kei in, naupang zatui lo buang zatang lim om pha lo hi. A natna uh a dam ciangin na zatui a hoihna thei kik lel ding uh hi.

Na pa’ min hangin mi tul za tampi in hong theih manin kisathei kha kei in. Tua pen na pa hihna hang hi a, nang’ hihna hang ahi kei hi. Nang hangin na innkuanpihte khempeuh hong kitheih ding lunggulh huai zaw hi.

Mihing nuntakna sungah na vawh bangin na at ding hi, cih Pasian kammal pen sepna bawlna ah a thupi mahmah khat ahih lam phawk den in. Ahi zongin mi khempeuh in a vawh bangun a ngah a at kik ding hun uh kibang kim lo thei hi. A dam sung a at kik pah a om mah bangin a kha un a thuak ding pawlkhat na om uh hi.

Mi tampi lakah nang tektek a tuampian ding, bang mah a kibang lo dingin Pasian hong bawl khial hi, cih lungsim na neih leh gen ding dang a om nawn kei hi. Job Cinpi (Zomi laisim nuamte)