Malaysia gamsung ansai te ah gammi tebek anhuanding in kizatsawm

Malaysia gamsung ansai te ah gammi tebek anhuanding in kizatsawm

Malaysia gamsung aom ansai “Food Premises” khempeuh ah maikum 2019 January 01 ni akipan anhuan nasem dingin gamdangmi kiphal nawnloding, Local Malaysian gammi tebek ki semsakding cih ki tangkokhia hi.

Zanni in Malaysia Human Resources Minister M. Kulasegaran in atangkokhiat hi a, tuabangthu aki tangkokhiatna tungtawn in ansainei Restaurant leh Coffee Shop Owner te lunghimawh mahmah uhhi.

Malaysian Muslim Restaurant Ow­­ners Association president Ayoob Khan Muhamad Yakub inzong hih tangkona tungtawn in lamdang kasavat a, ka linglawng mahmah hi ci’n genkhia hi. Tuaban ah hihbangvai pen Government in Stakeholders tetawh kikumphot in, tuakhit ciangin vaihawmding kisam hi ci’n genkhia hi.

Indian Muslim Restaurants te ah Malaysia gammi te nasemding in cialding pen hamsa mahmah hi. Tua ahih manin atamzaw Indian Muslim Restaurants tepen gampualam South Indian panin kikawm in na kisemsak hi.

South India gampanin anhuan nasem akicial tepen khasum zong tamluapi piakkullo in, tuaban ah nasepzia pen amautawh lempen hi ci’n President Ayoob in genkhia hi.

Malaysia-Singapore Coffee Shop Proprietors General Association president Ho Su Mong inzong hihvai tawh kisai in ahun tomnosung in Local Malaysian gammibek anhuansakding cihpen hamsa mahmahding hi. An hoihtak ahuantheiding pen kumkhat kumnih sungbang hoihtak sinsakphot kul uhhi.

Maikumthak ah Local tebek an huansakding cihpen ahun tomlua mahmah hi. Ataktak in Local Cook akicing in kingahthei hileh kisemsaknuam mahmah hi ci’n genkhia hi.

Lamgei ansai neuneu, Hawker, Street Food Stall te ah ahihleh anhuan mikhat khawngbek hilel a, tuate adingin bangmah aphamawhlua omloding hi. Ahi zongin ansai agolpi te ah anhuan nasem tampi akicial ahih manin tuate adingin baihvatlo dinghi ci’n genbeh hi.

Tuabek thamlo Malaysian gammi tepen Blue Collar Job nasep ahi anhuan “Cook” cihkhawngpen a utlua tamlo uh a, a utsunsun tezong khasum tampipi ngen uhhi.

Adiakdiak in Johor Baru khawng aom Coffee Shop te ah anhuan nasemdingpen khasum RM3000, RM4000 bang kipia hi. Ahi zongin Local Malaysian te’n tuazah khasum tawh asep uhsangin Singapore ah paiphei in nasem le uh khasum tamzawlai ahih manin, Malaysian te kuamah in Johor Baru ah semnuamlo uhhi ci’n genkhia hi.

More: Poland gampan €50 Million leitawi in Myanmar gamsung ah zatding meiphelh mawtaw 65 kileiding

Malaysia gamsung aom ansai te ah Local gammi tebek anhuan sakding cihvaitawh kisai in tulaitak kiciak ngeingai hi. Tuabangin Local Malaysian tebek anhuan nasemding in kizang takpileh gamdangmi te tampitak in nasep aki suplawh theiding dinmun himawk hi. Malaysia gamsung ansai Local Restaurant te ah nasem tepen gamdangmi vive hizaw uhhi. Adiakdiak in Indonesia, Bangladesh, Myanmar, India cihpan gamdangmi nasem tamphadiak a, Malaysian gammi te’n semnuamlo ahih manin Cook, Waiter, Cleaner cihtepen gamdangmi te vive in asemzaw ahihi. Anhuansiam Cook, Chef te’n nasepdang ngaihsut pianpian akul khadiam? Sawltak #zomidaily