Malaysia, Cameron Highlands ah mencim in Myanmar gammi 3 si

Malaysia, Cameron Highlands ah mencim in Myanmar gammi 3 si

Malaysia gamsung Cameron Highlands ah guahtui tamluatna hangin mencim a, Myanmar gammi 3 si cih NTS pan kiza hi. Tuni Sunday ni in thupiang hi a, Cameron Highlands, Kuala Terla, Kampung Tiga, Batu 49 aom innkhat mencim in atolhkhia ahihi.

Guahtui tamluatna hangin innkhat akicim, lei atolhkhia kici a, asihlawh Myanmar gammi 3 te lakah numei 2 leh pasal khat kihelkha uhhi. Tuate pen kum 23 leh kum 34 gualpawl hi uh a, ageinai aom Farm te ah lokho nasem in aom uh kici hi.

Hihvai tawh kisai in kumpi thunei ahi Cameron Highlands police chief Deputy Superintendent Ashari Abu Samah in agenkhiatna ah Police te’n zingsang 10:40am hunpawl in mencim leitolh buaina om cih hongki zasak hi ci’n genkhia hi.

Khuasung mite khatin phone tawh hongzasak in, kalawmte mi 3 mencim leitolh in hong vulhnelh cipsak hi ci’n honggen cihi.

Tuaciangin tuabangin aki vulhnelhkha te azongdingin Search & Rescue Operation kipanpah hi. Tuabangin azongkhiading te lakah District Police Headquarters panin Officer mi 3 leh adang Personnel mi 7, Fire & Rescue Department panin Officer mi 2 leh adang Personnel 16 te’n aki vuknelhkha te azongkhiading in kipanpah uhhi.

Zingsanglam 11:30am hunpawl in aki vuknelhkha numei 2 te alawmte’n mukhiathei uh a, tua numei 2 tepen anih in sikhinta uhhi.

Ahi zongin adang aki vuknelhkha pasal khatpen kimuzo pahlo ahih manin Search & Rescue Team te’n zongpah ngeingai uhhi. Asawtlo in mencim leitolh ii vukcipkhak khempeuh ki mukhia hi.

Tua mencim leitolh in anawkkhiat innpen kumpi te theihpihna omlo, phalna omlo in illegal in akilam cisawnsawn hi. Mencip laitak in buksung ah nasemte a ihmut laitak hi a, guahtui tamluatna hangin tua bukpen kicim in leitawh atolhsukkhawm ahihi.

More: Myanmar, Mawlamyine ah guahtui tamluatna hangin leitolh in Pagoda kisia

Tuabangin atuahsia asi Myanmar gammi 3 tepen Aung Thong (Kum 23), leh azi Naing Vai (kum 23), tuaban ah adang numei Mu Aye Aye (kum 34) cihte kihel uhhi. Tua asi mi 3 tepen apumpi tungah bangmah ID (identification document) omlo ahih manin, athu akicing in kitheician nailo hi.

Ahi zongin tua asi mi 3 te ii aluanghawm pen Tanah Rata aom Sultanah Hajjah Kalsom Hospital ah Postmortem bawlding in kipuak cih kiza hi. Sawltak #zomidaily