Lungsim an

Lungsim an

Nikhat tawmvei sung na a sem pumpi a’ding tawlngakna kisam a hileh nai 24 sung na a sem lungsim a’dingin tawlngakna kisam zaw ding hi.

Mitampi te in lungsim in tawlngakna a kisaplamngaihsut in neikhalo thei uh hi. Lungsim tawlngakna pen pumpi tawldam nading, pumpi cidamna ding, lungsim cidam nading, lungsim nosuah nadingin thupi mahmah hi.

Lungsim tawlngak nadingin gamdaina mun thupi hi. Gamdaina mun ah daitak in om ding hi. Tutna (kalathai) tungah tu ding hi. Na khut te a nuai lam ah khia suk ding hi. Tua a hihkei leh suakta tak in lumsuk ding hi. Phei (khe) ki paitheh in zongh ki tu thei hi.

Khut te phei tungah koih ding aa khuk san leh kiu san ki tuak sak ding hi. Khutpi leh mezom ki tuahsak ding hi. Tuadan in suaktak tak in omna la masa ding hi.

Tua khitciangin mitsi ding hi. Gilpi sung a dimdongin huih damtak in dik ding hi. Gilpi sungah second 3 bang koihphot ding hi. Tuaciangin damtak in nakpan in pusuaksak ding hi. Tuabang 10 vei bang hihmasa ding hi.
Tua kawmkawm in na mitkha sungah thuhoih koih ding hi. Na lungsim thungaihsutna khahzau lo ding hi. Na deih leh na lunggulh nate tungbek ah na lungsim om sak in.

Na huih dik kawm in na guhletang sungah tawldamna, thathak, nosuahna te hong lut bangin ngaihsun in. Na sungpan in tawlna, buaina, lungkhamna te a pusuak siat bangin na mitkha ah bawl in.

Na nuntakna sungah hong piangleh na ut te ngaihsun in. Hong piangtaktak bangin lungdam in.

Tuabangin hihleh cin na khepi dawmdongah tawldamna hong lutlam na theipah lel ding hi. Na lungsim na pumpi hong nosuah pah ding hi.

Tua pen lungsim tawldam nadingin a hoihpen khat a hihi. Tuapen sawtpi sung sep a kul hilo aa nikhat in minute 6-15 sung (na hunngahdan) hileh kicing hi.

Pumpi tawlngakna huntomna na neihsungin hibangin sempak in. Huihdikna leh lungsim kepcingna a thupi pen a hihi. Na pumpi a tawlmahmah ciang, nasep tamlua in na lungsim in bangmah a kiplet theihloh ciangin hih sepzia bawlpak in.

Minute 15 sung bekbek kiciantak in semthei lecin tuapen zankhat ihmutna tawh kikim hi ci in mipil te in ngen hi.

Sinpah theih hi. Hihlaiat pa in hong khemlo hi.

Lawm

Mite lak ah na lawmte mintawh ciamnuih bawl kei in. A melpianzia khat peuhpeuh tawh ciamnuih niloh kei in.

A tuntomna, a tunsauna te ciamnuihsan kei in. A nu le a pa mintawh ciamnuih kei in. A awsuah tawh ciamnuih bawl kei in.

A pilna a haina tawhzongh ciamnuih kei in. Mite lak ah ciamnuih na bawllai tak hong nuihsankha mah ding hi.

Na muhna ah nui mahding aa na muhlohna a lungsimsungah na kapsim thei hi. Tuapen lawm hihna pen hong susia galkhat tawh kibang thei hi.

Sumbawlna dingin sum kisam hi. Pil sin nadingin sum kisam hi. Pilna leh hauhna te zahmah in a thupi lawm ngah nadingin sum kisamlo leuleu hi.

Lawm ngah nadingin kammal leh maipuak thupi hi. Na maitai inla na kam hoihtak zanghsiam lecin lawmhoih tampi na ngah thei hi. Lawmhoih tam na neih semsem leh na gamgi a zaizawsemsem hipah hi. Siamsin Library