Ih nuntakna ah a thupi penpen thute ~ Khup Lian Thang

Ih nuntakna ah a thupi penpen thute ~ Khup Lian Thang

Leitung nuntakna ah khat veivei ciangin na om muanin lungkia thei, khat veivei na deih na-ut khat na ngahteh lungdamin na lawp gawp thei leuleu hi. Mihau, milian leh pilna siamna neite bek thupi na sa kha thei aa, amau’ cih bangbang bek thupi na sa kha thei zel ding hi. Tu laitak in nang le nang’ dinmun, na nasep, na hihnate thupi lo na sa kha thei zel ding hi. Midang khat’ nasep na, amau pianzia leh ahih nate peuh eng in na om thei zel ding hi. Tua bangin mite nuntakna eng in, mi dangte bek thupi sa in, mite’ nasep na leh sum ngahna bek thupi na sak lai siah pen na nuntakna ah lungnopna taktak om ngeilo ding hi.

Tua bangin na om zenzen leh pen a tawntungin mite a eng a haza leh mite’ huzap nuai ah a om den ding mikhat na gige ding hi. Tua in, nang leh nang ki neumuhna hong piangsak dinga, tua in mi dangte hazatna leh muhdahna lam ah lam hong pialsak ding hi. Nang leh nang ki neumuh in mite na muhdahna hangin, thu le la na khat peuhpeuh ah siangtakin na mu theikei dinga, khuamial sunga lampai na bang kha den ding hi. Anuai aa Russia te lai-at siam Leo Tolstoy (1828-1910) ii tangthu tomno tawh khatvei na nuntakna a lungngai kik dingin kong zawn hi.

Nuntakna ah a thupi pen thu thum

A pil mahmah leh a vangnei mahmah kumpi pa khat in anuntakna ah kisam a sak leh a theih nop velval thu thum om den hi. (1) Ka nuntak sungin bang “HUN” pen na khat peuhpeuh ka sepna dingin athupi pen hi ding hiam? (2) Kei aa dingin “KUA” thugen ngai-in “KUA” tawh na kasep khop ding a thupi penpen hi ding hiam ? (3) Ka nuntak hun sungin “BANG NA SEP” sep ding hoihpen leh thupi pen ding hiam?, cih dotna thum in kumpi pa a lungkham sak mahmah hi. Tua thu thum a theih zawhlohna hangin a om nuamlo ihmu theilo in, lungnop takin om theilo hi. Ama’ mipilte sam in tua thu thum pen bang hi ding hiam ci in a dong hi.

A mipil ten, nang aa dingin hun thupi pen na theihnop leh Calendar ah hun thupi na sak diakte hoihtak ciapteh zel inla tua tungtawn in hun thupi pen khat tel lecin, nang aa dingin a hun hoihpen na thei ding hi. A nihna dotna aa dingin, na kumpi galkap te tawh nasem khawm lecin, ahih kei leh na thudotpi te tungah kinga inla amau cih bangbang hoihtak mang lecin, amau pen nang aa ding leh na gam aa dingin a thupi pen mite hikha ding hi. A tawpna aa dingin pen anihna dan mah in na mipil te, na biakna siate dong inla amau ngaihsut piakna tungtawn in nasem lecin ci-in mipil tampi in dawnna tampi, ngaihsut piakna tampi a gen uh hi. Ahih hangin kumpi pa pen tua dawnna leh ngaihsut piakna tetawh lungkim theilo hi.

Kumpi pa zong a mipilte’ ngaihsut piaknate tawh lungkim theilo ahih manin gamlak aa om mipil putek khat kiangah thu dong dingin hong pai khia hi. A galkapte lamkal ah khawlsak in amah bek tua gamlak ah a va pai hi. Mipil pa’ omna a tun ciangin tua mipil pa in bawng tha zangin lo a khawhkhawh laitak tawh kituak hi. Mipil pa’ kiangah kumpi pa in atung aa a theih nop mahmah thu thum hong dong hi.

Mipil pa in kumpi pa’ dotna dawng lo-in a nasep maban a zom hithiat lel hi. Kumpi pa in a et ciangin mipil putek pa pen a nasep tawl mahmah ta cih thei ahih manin, om theilo in nasep a va huh hi. Mipil putek pa’ lo khawhna a huhna hangin kumpi pa pen a innlam ciah hun ding hong zekai ta hi. Tua ahih manin inn lam ciah nawnlo in mipil pa’ kiangah tua zan a giak dingin khensat hi.

Nitum kuan nasep a khawlkuan ciangin tangval khat aliam neinai sa in a mau’ lo khawhna lam zuan in hong pai hi. Nak liamlua ahih manin lo-lai a tun ma in tua tangval pa in khua hong phawk nawnlo a, kumpi pa leh mipil pa in lo-buk ah a ciahpih uh hi. Kumpi pa in a kumpi puan balkek in tangvalpa’ liamma te hoihtak in a bawlsak hi. Zingsang khua hong vak ciangin tua tangval pa zong a liamma pan nuamtuam ta ahih manin hong khanglo ta hi. A kim leh apam a et leh kumpi pa leh mipil putek pa in amah hoihtak khoi-in a liammate a puahsakna hong thei hi.

Tua ciangin tangval pa hong kap in kumpi pa kiangah amawh nate amaisak na dingin hong thum mawk hi. Kumpi pa in lamdang sa in, bang hangin mawhmaina hong ngen laizang na hi hiam, ken lah na liamma bek hong bawlsak hi ing, bangmah nong thumna ding omlo hi a ci hi. Tua tangval pa in, “Kumpi pa aw, hunkhat lai-in na galkap te in ka inn hongsut bek thamlo in, ka sanggam pa zong hong thahsak hi.

Tua hangin ka sanggam pa’ phu a la kik dingin ka khensat hi. Hih gamlak ah nong pai na thu ka zak ciangin, nong ciahkik lam teh hong suamlum ding ci-in gelna tawh lamkal sawlbawk khawm pan in kong ngak hi. Kong ngakngak leh nanglah hong ciah kik theilo na hih manin tua kong pan simna sawlbawk pan ka pusuah ciangin na galkapte tawh kituak kha ka hih manin hih bangin liamma a ngah ka hi hi.

Ken ka hihleh nang a that dingin hong pang himah ta leng nang na hihleh ka liamma nong bawlsak aa hoihtak in nong khoina hangin ka nuntakna a beilo a hi hi” ci-in khitui tak keuhkeuh sa in mawhmaina ding a ngen hi. Kumpi pa in zong tangval pa’ mawhna a maisakna gen aa, anih un kikawi in tangval pa in zong kumpi pa tungah a khantawn in a thu maan na ding kamciam a pia hi. Abei sa aa kigal neih nate mangngilh bawl in a mawhna uh ki maisak tuak uh hi. Kumpi pa in a ma mawhna ki maisak in, aman zong mite’ mawhna amaisakna hangin bangmah tawh akiteh theilo lungnopna hong ngah hi.

Kumpi pa zong a theihnop thu thum te mipil pa kiangah a dong kik hi. Tua ciangin mipil pa in nui hiuhiau kawmsa in na theihnop teng na thei khinta hi ci-in a dawng hi. Kumpi pa in bangmah lah nong gen kei aa, bang ci theih ding ka hi hiam ci-in lamdang a sa mahmah hi. Mipil pa in, “Kumpi pa aw, zanni in lo ka khawh laitak in hehpih huai hong sa na hih manin lokhawh nong huh hi. Tua hangin inn na ciah hun ding zekai na hih manin na ciah nawn kei hi. Kei hong huhlo in innlam a ciahkik pah hi lecin tu in na si khin kha thei ding hi. Bang hang hiam cihleh den aa tangval pa in nang that dingin lampi ah hong pang na hi gige hi.

Tua ahih manin na theih nopnop ahi a thupi penpen hun pen zanni in nasepna hangin a gim atawl ahi keimah nong huh HUN laitak hi pah hi. Kei pen nang aa dingin a thupi penpen MIHING ka hi hi. Lokhawhna hangin a gim a tawl ahi keimah nong huhna pen nang aa dingin a kilawm pen leh a thupi penpen NASEP a sem na hipah hi. Tua khit ciangin a liam tangvalpa hong tun ciangin, tua tangvalpa’ liamma ih bawlsak hun pen athupi penpen HUN hi pah a, tua tangval pa pen nang aa dingin a thupi penpen MIHING ahi hi. Tua tangvalpa’ liamma a damkik na dingin na kumpi puan balkek in na bawlsak pen nang aa dingin a thupi penpen NASEP a sem na hipah hi.

Tua ahihmanin kei nong huhna hangin na sihna ding panin na suakta aa, a liam tangval pa na kep na khoi na hangin na galte tawh kilem in mawh na kimaisak thei uh hi. Tua ahih manin nang na pawkkhak loh hangin nang aa dingin hun a thupi penpen hun in “Tu laitak hun” hi a, “Tu laitak na gei ah a om mite khempeuh” pen nang aa dingin athupi penpen mite hi in, “Tu laitak aa na nasep hoihtak in nasepna” pen nang aa dingin a thupi pen leh ahoih penpen nasep ahi hi”, ci-in mipil putek pa in a dawng hi. Kumpi pa zong hi sa lua in, a theihnop teng thei lian ahih manin lungdam mahmah kawmsa in a kumpi inn lam hong zuan pah hi.

A thupi penpen “Tu laitak hun”

Khat veivei ciangin, tu laitak aa na neih na hun na dinmunte thupi kisa lo in ka tangval teh, College ka kah teh, ka buaih ngah the, nasep hoih ka neih the, zi leh ta ka neih teh, ulian zalian nei khat kisuah teh, sum leh paai ka hauh teh ci-in tu laitak hun na mangngilh kha thei den hi. A hih hangin mihing te aa dingin athupi penpen in tu laitak hun, tu laitak na dinmun, tu laitak na hihna athupi penpen ahi hi.

Tu laitak in na neih leh na zattheih pen tu laitak hun lian bek ahih manin hoihtak in zangsiam inla, a manpha a thupi leh mite’ phattuamna ding, nang ii pilna siamna a khantohna ding, nang ii hangin mi dang khat peuhpeuh in hamphatna angah ding, mite tawh kilem na ki itna dingin zang siam in. Tu laitak hun pen nang aa dingin athupi pen ahi hi. Hun paiza kila kik thei nawnlo hi.

A thupi penpen “Ih kim ih pam aa om mite khempeuh”

Nang aa dingin a thupi penpen in nangtawh a kithuah kha, na kim na pam aa om mi khempeuh ahi hi. A pil ahai, a hau a zawng, a siam a mawl cih bangin omlo in mi khempeuh pen nang aa dingin a thupi penpen te ahi uh hi. Na taklam aa om mihau pa leh na veilam aa om mizawng pa pen nang aa dingin a kibangin athupi tuak in na san ding ahi hi. Et tuam mai-et tuam deidan tuam neilo in mi khempeuh tungah itna tak tawh ahoih nate na sep ding a thupi penpen ahi hi. A pilte bek thu aa sim, a haute bek mi aa sim, a siamte bek lawm dingin deihna pen a hoihlo a paikhial lungsim puakzia hi in, tua lungsim puakzia in nikhat niteh na nuntakna ah kiamsukna leh siatna lam ah hong paipih zaw kha ding hi.

Nasepna ah na seppih khempeuh pen amau’ mun ciat ah nang aa dingin mi thupi te vive a hi uh hi. Tu laitak aa na nasepna na pute, na pite, na siate, na tungsiah na nuaisiah te khempeuh pen nang aa dingin mi thupi vive hi in itna taktawh akilawm akituak in zahtaak theih ding pen athupi penpen ahi hi.

Amau teng tawh hoihtakin kithuah thei in, na nasep khop theih dingpen na nuntakna ah thupi penpen na vaipuak ahi hi. Na innkuanpih, na zi leh na tate, na sanggam na u na naute, na beh na phung te khempeuh pen nang aa dingin mi thupi pente ahih manin hoihtak in it siam in, deidanna nei hetlo in na huh na panpih theih bangbang tawh na huh na panpih ding pen mihing khat aa dingin a thupi penpen nutak khuasak zia ahi hi. Nang aa dingin amau te sangin a thupi zaw midang leitung ah om tuanlo hi.

A thupi penpen nasep “Tu laitak aa na nasep”

Tu laitak aa na nasep pen na ut pen leh na ngim na tupna hi masa khalo thei ding hi. Ahih hangin nang aa dingin tu aa nasep, na maban pen athupi penpen hi photphot hi. Mihing khat na hih nakleh ngimna tupna neihna pen a thupi penpen leh neihloh aphamawh hi mah hi. Tua na ngimna na tun theih na dingin tu aa na nasep pen a hoih penpen a gina thei penpen in itna deihsakna taktawh na sep theih ding a thupi ahi hi. Tua na ngimna na tunteh hoihtak in sem pan ding na cih zenzen khak leh, tua na ngaihsutzia pen a paikhial thu ngaihsutzia hi in tu mahmah in na kikhel ding thupi ding hi.

Na maban nasepna peuhpeuh ah gina leh citak takin nasepna hangin a tunga kumpi pa bangin na nuntakna ah suahtakna, khantohna leh gualzawhna thupha te a hun cin ciangin hong luang lel ding hi. Bangbang na sem zongin, Siavuan, Engineering, Inn ah na tate na pattahna, sai zuakna, puan khui, migam mi lei ah nasem, kumpi nu’ nasem, Company’ na sem etc… cih bangin bang nasep na sem zongin gina tak leh deihsakna tawh lawptak leh kipaak angtang takin sep ding ahi hi. Nasep khempeuh a thupi lo omlo in, itnaleh deihsakna tawh a kisem nasep khempeuh a thupitna a ki bang ahi hi.

A niam zaw, a sang zaw, ahoihzaw a hoihlo zaw, a ki pak huai zaw, a zumhuai zaw nasep cih bang omlo hi. Pawlpi kipawlna ah na nasepna khat peuhpeuh, gam leh minam aa dingin na mapanna khat peuhpeuh, Company aa ding nasepna khat peuhpeuh, innkuan nuntakna dingin nasepna khat peuhpeuh, tu laitak aa na maban nasep’ na khat peuhpeuh hoihtak ginatak aa sep ding pen leitung ah a thupi penpen ahi hi.

Na nuntak na ah thupi penpen hun in tu laitak hun hi a, nang aa dingin a thupi penpen mite in na kim na pam aa om mite khempeuh hi in, a thupi penpen nasep in tu laitak aa itna taktawh na nasep ahihna mangngilh het kei in. Nang leh nangin khatvei lungngai kik inla tua tawh na nuntakna na mailam a nawk kik thei dingin itna tawh a kizawn hi ni… Lungdam, Khup Lian Thang