Makai Nam Nih ~ Pu Thangboi

Makai Nam Nih ~ Pu Thangboi

Biakna makai leh Leitung lam makaite i ki lamdanna tawm lungngai khawm zual peuhmah dih ni e maw.

Leitung lam makai hoihte in atup angimna aih kei leh ama’ kipawlna i tupna ngimna kungmui peello tunpih hi. Kungmui tunpihte makai hoih kici hi. Gtn. in Aung San pen kum 100 val sung (1924 – 1948) kawlte a ukcip mikangte’ khutsung pan in kawlte suahtak khiat pih ahih man in makai hoih in ki ciamteh hi. Kungmui tunpih pa hi.

Biakna makai hoihte, adiak in Pasian’ nasem makai hoihte, leuleu in pen aseppihte’ siamna leh kivakna (skill and capacity) te akim in suukkhiatsak (unleash) thei hi. Cihnopna ah ama’ kungmui tunding sang in mi’ kungmui tun ding hahkat zaw hi. Kammal dang tawh genpha lai leng;

Leitung lam makai hoih khat in aseppihte’ pilna siamna tha leh ngal zangh in kungmui tunpih hi. Pasian’ nasem makai hoih khat in ama’ pilna siamna leh atha angalte zangh in aseppihte a kungmui ciat uh atunna ding in huh hi. Mi pantah hi. Gtn. in Moses in a mission maban a zom ding in Joshua pantah hi. Abeh aphung atanau cihtawh en hetlo hi.Topa Zeisu zong makai ahih man in ngabeng kimlai miman asuah dong anungzuite pantah hi.

Atomzaw in makai nam nih te i akilamdanna uh genpha leng;

Ei’ kungmui tunna ding a mite zatna leh mite a kungmui uh atunna ding a ei mahmah kipiakkhiatna hi.

Leitung lam makai khat a ding in a kungmui atun ding athupipen hilel hi. Kungmui Mitsuan (Goal-oriented) nasep ahi hi.

Biakna makai khat ading in bel athupi penpen mihing’ nuntakna ahi hi. Mihing sang athupi zaw omlo hi. Ama’ hang in mi bangzah in nuntak lawh; mi bangzah in a kungmui tun lawh; mi bangzah mitkeuh sak; mi bangzah honkhia cihbang hi. Mihing’ Nuntakna Mitsuan (Life oriented) nasepna ahi hi.

Leitung lam makai khat pen makai lawhcing khat ahih nak leh hong minthang in zong hong hau mai ding a hong kidawk velval ding hi. Hong vaangpha mahmah ding hi.

Ahi zong in biakna makai khat alawhcin leh lawhcin loh pen akiim apaam a mite’ nuntakna bang zah in ki lamdang sak hiam cih tawh kiteh zaw hi. Mawtaw khawng inn leh lo khawng bangzah nei hiam cih tawh ama’ lawhcinna teh theih hilo hi. (Tuate neihna in mawhna bel hituanlo hi).

Amah hong minthang in zong hong hau mai napi anaseppihte innsap khawng sawlbukno khat a omlai khawng ahih mawk leh makai lawhcing ki cithei lo ding hi. A mah mawtaw hoih nono tawh tai vauvau napi aseppihte siksakol (bicycle) khawng asik luailuai lai mawk leh ngaihsuthuai hi.

Leitung lam makai te’n bel amah alaih ding mi deih hetlo uh hi. Mi’ ma khak hamtang uh hi. A gaol/kungmui atun ding bek mitsuan den hi. Tua tunna ding in mihing’ luang phah akul leh zong phah ngam lel uh hi.

Biakna makai hoih te’n bel mi’ ma khaklo bekthamlo in hontheih tawp in honsak a dom akul leh dom in puak akul leh pua hi.

Kawlgam a om Zomite’ sung bang ah biakna makai (or) Pasian’ nasem lawhcing cih theih ding pen FGA founder Rev.Dr. Dam Suan Mung @ Sia Mungtawng bek mah kathei mai hi. Bhh cih leh;

Seppihte’ siamna leh kivakna (skill and capacity) amah bang a suukkhia thei Zomi sung ah midang ka theikha hetkei a zong ka zangei hetkei hi.

A kilangh mahmah khat gen leng;

Tulaitak kawlgammi thu-um khangnobup in apaktat mahmah Thang Tawng pen Sia Mungtawng tawh kithuah kha hikei leh tu a tan tung hetlo ding cih ka genngam mahmah hi. Apa Pu En Khan Nang tawh kithuah mahmah kahihna tawh amau’ innsung thu leh a pilna asiamnate uh bang ciang cih theihna ciang khat nei kahih man a genngam kahi hi.

Adang Full Gospel pawlpi a Sia tampite zong tuadan mah hi. Ka khankhiatpih ka theih mahmah pawlkhat om a Sia Mungtawng tawh kithuah kha kei le uh tu a ciang atung hetlo ding ka theih tampi om hi. Makai hoih khat tawh ahun lap a na kithuah kha uh ahih man un hampha mahmah uh hi.

Ih thulu ah ciahkik leng;

Biakna nasem na hih leh na naseppihte’ siamna leh kivakna bang teng om hiam cih kankhiat sawm masa zaw phot in. Aneilo mihing omlo hi. Tua asiamna leh akivaknate uh na suukkhiat sak zawh leh makai hoih nahi hi.

Leitung lam makai leh biakna lam makai alawhcing taktak ih om nai samkei hi. Ih gawmkha pahpah zawlai a ih lumlet kha pahpah lai hi.

Gending bel tam mahmah laisam naven hong saulua kha leh hizah tawh khol phot ni. Mimal kuamah kawk nopna hi hetlo in ngaihsutna anuamtuam ding deihna bek hi.

Nasep nabawlna khempeuh ah lawhcinna thupha Pasian in hong pia ngiat hen.

Genkhialh a om leh ngai dam

Lungdam

Mung Laan Thang
Zangkong