USA, Los Angeles sanginn ah kum 12 aphapan numei khatin thaupua in sangnaupang mi 4 kapliam

USA, Los Angeles sanginn ah kum 12 aphapan numei khatin thaupua in sangnaupang mi 4 kapliam

USA, Los Angeles khuasung aom sanginn khatah thau kikapna omin, sangnaupang mi 4 liam cih LA Times pan kiza hi. Tua aliam sangnaupang 4 tepen kum 15 gualpawl hi uh a, Thursday ni in sanginnsung laisinna Classroom sungah aki kapliam ahihi.

Hih thautawh kikapna sanginn pen “Sal Castro Middle School” hi a, thautawh akappen numei kum 12 aphapan khat ahihi.

Los Angeles police Officer Drake Madison in agenna ah Thursday zingsang sangdak aginkhitdeuh in thau kikapna apiang hi a, sangnaupang te patau in taikek ngeingai uh cihi.

Kum 13 aphakhin 7th Grader akahlaitak ahi Benjamin in agenna ah sanginn huangsung ah mikhat in thaupua in, ngimmelzong neilo in aphialkapgawp hidingin ka ummawh cihi. Amasa in thau atuh “Fake Gun” hiding in ka ummawh uh a, ahi zongin Classroom sungah ka omlaitak un thau kikapna apiang ahihi ci’n genkhia hi.

Hih sanginn sungah thua kikapna apian ciangin kumpi thunei te’n 8:55am hunpawl in delhpah uhhi. Sangnaupang kum 15 pasalno khatpen alu liamin, adang kum 15 numeino khatzong akhut kikapliamkha hi. Tualo adangzong mi 3 bang aliam om uhhi ci’n thunei te’n genkhia uhhi.

Alu, atalbuk ah akikapkha sangnaupang pen bangmah cisamloding in ki lamen a, tuciangciang Stable Condition hi ci’n Thursday sunlam in Dr. Carl Chudnofsky (L.A. County-USC Medical Center) in genkhia hi. Akhut akikapkha numeinu zong zatui hoihtak kibawlin, Fair Condition kici hi.

Dr. Aaron Strumwasser in Hospital pualam ah News Conference bawlna pan agenkhiatna ah atal akikapkha kum 15 naupangno pen kampha mahmah hi. Thautang in alu asunglam ah lukhalo, siatna lianpi piangsaklo bilbel ahih manin, bangmah cidingin ka umkei a, hoihkikding in ka lamen hi ci’n genkhia hi.

Thautawh akappen numei, samsau khat hi a, Police te’n akhut kolbulhsak in sanginn huangsungpan paikhiatpih uhhi. Los Angeles Police Department te’n hih thau kikapna vaitawh kisai in banghang kikap cihte athu akician in genkhiattheih bangmah omnailo, hunnailo hi ci’n genkhia hi.

Los Angeles School Police Chief Steve Zipperman in News Conference ah agenkhiatna ah hih numeino in bangci bangin thau tawitheihiam, koipan ngahtheihiam cih kitheician nailo hi. Khuasung mipi thau aneite’n nathau te uh hoihtak, muanhuaitak in nakepding uhleh naupangte laktheih zattheih, mutheihding munpan in na hepkhiatding uhhi. Los Angeles khuapisung aom thau anei khempeuhin hoihtak nakepding uh mawhpuak ahihi ci’n genkhia hi.

More: USA, Kentucky sanginn khatah thaukikap, sangnaupang 2 si, adang 18 liam

Sanginn huangsung School Campus pen bangmah lauhuaina omnawnlo a, ahi zongin ki khakcipphot veve hi. Sangkahhun pen agei mahbangin sangnaupang te aciahding ahun ngeina in ki ciahsakding a, ahi zongin alungnuamlo nulepa te’n atate uh dawnbaih theihi ci’n thunei te’n zingsang News Conference ah genkhia uhhi. Kum 12 aphapan numeino nangawn in sanginn ah thaupua in, phialkap kipanta uhhi. Sawltak #zomidaily