Yangon Khuado Pawipi etphatkikna le lungdam kohna Meeting kibawl
Nov 18, Yangon: Abeisa November 3, 2017 ni in akibawl Yangon Khuado Pawipi tawh kisai Nungetkikna le Lungdamkohna pen tuni, November 18, 2017 ni in TBCY Meeting Room ah kibawl thei a vaihawm Committee tanute le thudotpi te kim tak in kihel thei uh hi.
Khuado Vaihawm Committer Chairperson Pa Captain Pum Khan Pau in Khuado Pawipi lawhcing takin bawlzawh nading in ei hih theih na mun tek pan in, a sem a bawl, a gim a tawl te, a mau talent te tawh hong kihel lasiam te, musician te hong kihel mipi te tung ah Committee pan in lungdamkohna genna nei hi.
Maikum Yangon Khuado Pawipi pen Zomi sung ah sumbawl minthang khat ahi Pu En Za Kap (Taungzalat) in abei khempeuh hong sik ding ahih man in lungdamkohna zong nei hi.
Meeting sung ah tukum Khuado ading Sumngahna, Zatnate, Program sung ah tha-hatna tha-nemna te, kipuahphatna ding kikupnawina kinei hi. Mailam Khuado Pawipi ah zong picing tak in akibawlzawh toto nading thu te vuicing takin kikupna kinei hi.
Hun man ciang in, lungdamkohna angkuang kiu umkhawm thei hi.
Yangon Khuado Pawipi pen TA, GZA, ZOMUS, ZSK-YGN, ZYA-YGN, ZNTL, ZNCM summapang khopna tawh kibawl khawm ahi hi. Zingsol
Yangon Zomibup Khuado Pawipi ah Sapna
Zomite ngeina lak ah a thupi pen ahi “Khuado” pen Zangkong khuapi sung a om,Zomi innkuan, mimal kim khempeuh tawh nopcitak in bawl khawm ding ihih man in, a nuai a hungeelna bang in nong kihel hamtang nading un itna tawh kong sam uh hi.
- Nimit : November 3, 2017 (Friday)
- A hun : 12:00 Noon – 4:00 Pm
- Amun : Judson Memorial Hall, MBC Huang, 143 Min Ye Kyaw Zwa Road, Lanmadaw Township, Yangon
*Zongeina lam tuamtuam te lahna, Ngeina puan te a khang a khang in hong kikhelzia, Pasal puan, Numei kician tak in a nei te ihihna, ngeina puan te a mun a mual tawh kituak in dik tak in i silhzia dingte liapaal taangpal ten hong nei ding uh hi.
*Tukum Tan 10 a zo sangnaupang khempeuh PAHTAWINA thupi tak in kipia ding hi. Koi koi pan a ong ahi zong in, min sazian pia a, a kihel thei khempeuh kipia ding hi.
Min apia kha nai lo te in Tg Gin Deih Mung (June Pi) President, Zomi Siamsin Kipawlna – Yangon (Phone : 09766841004) le ZSK-Yangon Siamsin Makai te kiang ah min sazian kipia thei ding hi.
*Zomi te nidang lai nuntakna, ngeina, tatdan te Drama lahna om ding a, khangthak momno, seinogual te in hih thu te amuh khak a theih khak ding un innkuan kim in i kihel ciat nading kong sam uh hi.
*Kawlgam, Zogam Zomi sung Lasiam minthang te, Music tumging siam te in itna le deihsakna tawh hong kihel ding uh hi a, hun sawt lo sung in nopci thei pen in kibawl ding hi.
*Zogeina Vaimim huan zong a deih te a ding kingah ding hi.
*A hih thei leh – Zongeina nikten puansilh te tawh hoih tak kizem in a manpha Kumkhen Khuado nuam tak zangh khawm ni ci in zahtakna tawh kong sam uh hi. Yangon Khuado Pawipi Vaihawm Committee Source: Zingsol
Comment piaknop aomleh...