Bill Gates hauh dan

Bill Gates hauh dan

Nikhat Kawlgam sum mak 100 (dollar awn 1) zangkhia ding cih thadah, khantawn i zon hang zong amu zolo ki om ding hi. Ahi zongin tulaitak in Leitung ah sumhaupen khat ahi Pu Bill Gates in ahih leh ni khat dollar million 1 (Kawlgam sum mak 100val) zangkhia ding hileh, kum 218 bang zang thei ding hi ci’n Oxfam kantel pawlin a muhkhiatna te, The Guardian thuthang in suakkhia sak hi.

Tulaitak in leitung ah a haupenpa in a kiciamteh Mexico sumhaupa Pu Carlos Slim in ahih leh kum 220 val bang zang khop ding hi ci hi. Sumbawl asiam Pu Warren Buffet in ahih leh a sumkep teng a bei siang dong nikhat dollar awn 1 zang leh kum 169 bang zang thei ding hi cilai hi.

Tuhun ciangin nidang sangin mihau, sumhau kitam zaw ta hi. A kician in gen ding hileng, leitung sumlei sumbawlna kiatsuk (recession) hun aa kipan billionaire pen a zah khat in khangto zaw hi. 2009 March kha lai in leitung bup ah billionaires 793 om mah leh 2014 March kha ah 1,645 tak om ta ziau hi ci’n zong Oxfam’ thupuakna pan kithei hi.

Mihau te a hauhna un hausak semsem uhi. Cihnop na ah mihau khat in a neihsa te tungpan in 5.3% bang hauhna ngahkik mah taleh mi mawkmawk khat in a neihsa tungpan 1.95% bek ngahkik zo hi. Gentehna in cileng Pu Bill Gates in a neihsa sumte tungpan in summet nikhat dollar awn 11.5 bang ngahkik mawk hi.

Hih bangin sumlei sumzuakna thusung ah huahluatna te tehkak na a langkhat ah a om ta zong in, kikhaihna/ kikimlohna zong kilang mahmah hi ci hi. Leitung ah sumhau pen 85 te neihzah pen a zawngpen aa a kiciamteh leitungbup miphazah i a lang tawh a neihzah uh kikim cimawk hi.

Ahi zongin Pu Bill Gates le Pu Buffet ten bel a sumte uh hibang in zangthaang nuam sam lo uhi. Hih sumhaute gel in leitung ah nasep hoih tampi semkhia uhi. Bill Gates in ahih leh Bill and Melinda Gates Foundation phuankhia in na sephoih tampi sem khia uh aa, tukum sung bekbek in zong Pu Warren Buffet kiang panin dollar billion 3 bang panpihna ngah lai uhi.

Lai-at Nk Khanno
Ref; Bussiness.inside.com