Lim le Ceptehna (Signs and Symbols)

Lim le Ceptehna (Signs and Symbols)

Lim (Signs)

Ong pai ding, ong tung ding, ong piang ding thu khat ong thei sak pen kihilna (indicator) kici hi. Tua kihilna in ong piang ding ong tung ding ahong lak khol hi a, tua lahkholhna pen a lim (signs) kici hi. Tua a lim in a taktak pen pel loin ong tung ding hi. Meii bang hi leh guah zu ding a cihna hi. Meikhu bang hi leh mei kuang om a cihna hi ci-a, tua bang daan a, a kikhen khia thei lo meikhu (smoke) le mei (fire), meii (clouds) le guah (rain) thute ah ahong kihilna (indicator) in pel loin ahong tangtun nading lim (signs) ahi hi. Kawlgam Vaai gam, Maang gam, Zogam hi ta leh guah a zuk ding leh meii kaai hi. Mei a khut leh mei kicih om cihna hi. Mei a khut leh mei kicih om a, meii a kaai leh guah zu hamtang hi. Tua bangdan kihilna lim pen Lai Siangtho ah kammal zat in na kinei pha mahmah hi. Lim le nalamdang (Signs and Wonders). hi. Topa Jesuh in cina dam sak, misi tho sak, tua bang nalamdang sep theihna pen Pasian’ Tapa ahihna Lim (Signs) ahi hi. Pasian Tapa ahih manin zong amah bekin tua bang nalamdang a sem thei ahi hi. A lim le a taktak kizom tawntunga kikhen khia thei ngei lo hi. Kihilna Lim pen tua ahong piang ding thu tawh a patcil pek panin a kizom tawntung khinsa na hi a, tua bangdaan kizopna pen Pello-kizom (nonarbitrary) kici hi. A langkhat leuleu ah, a lim (Signs) le Ciaptehna (symbols) a kizat theihna kibang lo hi. Ceptehna pen symbol kici hi.

Ceptehna (Symbols)

Pel loin, a kizom sak Lim (nonarbitrary signs) pen ceptehna (symbols) thu tawh ihkhen siam ding thupi mahmah hi. Mun khat, gam khat, thu gui khat ading beka a kizang thei lo kihilna pen ceptehna (Symbols) kici hi. Leitungah a taangpi a cepteh nadingin a kizang na pawlkhatte in, mawtaw lamlak mei (traffic code), Meileng lamkan ding theihsakna mei (railroad crossing indicators), Palik mawtawte’ zat a san a eng mei (flashing red or blue lights on police vehicles), kitengkhin cihna khutzungbuh (wedding rings), le gam ceptehna dial (national flags) te a hi hi. Ceptehna (symbols) khat pen mun khempeuh, hun khempeuh, thu khempeuh ah kizang kim thei lo hi. Kamdang khat in genleng ceptehna pen khat bek tawh kizom tawntung thei lo a, a dang khat adingin zong kizang kawikawithei hi. Tuadante ah ceptehna (symbols) cih kammal kizang hi. Gentehna in, khutzungbuh pen kiteng khin cihna lahna in kizang a, ahi zongin khutzungbuh bulh khempeuh a kiteng khin cihna hi lo hi. Tua mah bangin mei san tawh ceptehna a lah ciangin lam kikan thei nai lo khawl ding (stop) cihna hi. Ahi zongin mei san (red lights) khempeuh ih muhna mun citeng ah khawl ding cihna hi lo leuleu hi. Ahi ta zongin mei san (red lights) le a san tawh kihilna lim (red signs) te pen mawtaw lam kanna tawh kisai ah kizang ahi hi. Gamdang mun khat ah mawtaw khat le khat ki-ot diamdiam thei nadingin mei naipak (blue light) zang uh, hi ci dih ni. Ahi zongin tua blue light mei naipak pen India te ading in vei lam ah awn in cihna hi dinga, Kawlgam te adingin taklam ah awn in cihna hi thei hi. Tua bangdan a utut dan a kizang thei ceptehna pen symbols kici hi. Signs kici lo hi.

Eimau ut dan le eimau zatnop zia lampi zui sakin ih zat nate pen symbols ceptehna kici hi. Hih bangdan a, ceptehna (symbols) le cepteh lahna (the things they symbolize) pen a tawntungin kizopna nei lo hi. Amaute gel kikal bek ah kizopna om lo hi, cihna hi. Meii le guah in a tawntungin kizopna nei-in amaute geel kikal bekah kizopna om hi. Sanna (red) le khawlna (stopping) a tawntung in kizom lo hi. Mipawlkhatte’ adingin na khutpi na lah leh hoih ei a cihna hi a, pawlkhat adingin na khutpi na lah leh ngap maw a cihna hi thei hi. Ahi zongin cepteh lakna in khutpi kizang tuak hi. Pawlkhatte adingin na khut mee na lah leh hong pai in na cihna hi a, pawlkhatte adingin na kidawm in a cihna hi thei hi. Ceptehna tawh theihsakna tua ceptehna (symbols) pen a zatna le a zeek zia kikhel khel thei ding hi. Symbols can be changed. Ahi zongin meikhu le mei, meii le guah kizopna pen kikhel thei ngeilo ding hi. Banghang hiam cih leh tua pen amaugel kizopna tawh a kizom tawntung uh hi a, tua pen kizop hamtangna thu (nonarbitrary) kici hi.

Lai Siangtho sungah Noah tawh leitung bup tuicin a tun nawn loh nading Pasian’ thuciamna lim (signs) pen sakhituihup ahi hi. Sakhituihup ih muh sial sial in leitung bup tuicin tung ngei a cihna ahih banah leitungbup tuicin tunna tawh kisia ngei nawn lo ding a cihna zong ahi hi. Thuciam thak sungah lenggah tui le khomun pen Topa Jesuh eite tangdingin a hong si ahihna a si le a sa tangin ih nek ih dawn na ah, si taktak sa taktak a dawn a nete ih hih loh hangin a taktak tawh a kizom thute a kipsakna in Lai Siangtho in Lim (signs) cih kammal na zanga, (symbols) na zang lo hi. Symbols ceptehna ii a kizat a kizeekna a tuam hi a, signs aLim tawh kizopna a tuam hi in, kibang lo hi. Signs pen kizopna kipneihna munte bekah kizang hi. Lim pen a taktak ahih pah lian nai loh hangin a taktak ii khu, a taktak ii meii, a taktak ciamna kip thupha laakna le a taktak si le sa tawh kizom khomun le lenggah ahi hi. A taktak kizopna thu tawh kisai hamtang hi. Khomun le lenggah pen si le sa taktak hong suak thei uh hi lozaw in, khomun le lenggah in a taktak thupiang, thuciamna le a taktak tawh kizopna lim (signs) hong hilh khol tawntung ahi hi. Meii kai leh guah a zuk pelmawh, mei a cih leh a khut pelmawh mah bangin Topa’ thuciamna limte zong tua bangmah in ahong kizom pelmawh ding ahi hi.

Evan. Suang Dal