Tuang tun muang zaw ve ni maw!

Gamdang a om Zomi papi tingteng thum leh nupi khat in a kizom phialin a lipkhap huai mahmah sihna tawh leitung hong nusia uh a, ka laitang na in ka heh bang suak zawzen hi. 2003 kum in kei zong ka pianna ka pa in hong nusia hi. Vuibawlna hun sungah ko unau leh tanau naihuai tengin MV Pauno laphuahsa ahi “Zuanem pham sa’ng kei pham zaw leng maw” cih pen ka sa uh a, a tawp dong ka sakpih suak zo kei hi. A lathu ong hawmsawn ning:

• Zua zingzin tuang tung mawh e,
• Koi kuam sawl bang na hei hiam?
• Koi ah vai bang hong thaam na hiam?
• Lailungah hong ngilh ta na hiam zua aw,
• Siang lam zong khau bang ciah aw.
• Gual zua zingzin tuang tung e,
• Ka zua zingzin tuang tung ding sa’ng,
• Phamna sinthu tuang tung ciaiciai,
• Albang dahna lah mel a thei tuan lo,
• Ka tunnu’n luankhi hong nul.
• Zuanem pham sangin kei pham zaw leng maw,
• Laizom tuai nihthum ading,
• Albang dah lungzuan nun in nuam tuam ding,
• Zua phamsa zuang hong tho aw.
• Laizom ka ciin leh ka tuai aw,
• Ih zua in hong phamsan zongin,
• Lailung zuang ken simlei ngeina,
• Ei zong pham nua ciang thangvan tualnuam ah,
• Tuangtung muang zaw ve ni e.

Hih la ka sak simin tuni dong mahin ka khitui luang zo lai hi. Ko innkuan adingin a kiphuak hi liang ahiam ka cih hun om hi. Ka pa khualzin pen tuni dong hong tungkik nai lo hi. Ko unau in ka thuak bang lian a thuak Zomi innkuan thumte hehpih huai ka sa mahmah hi. Lasiam Tuatuang leh Peter Lian pen a innkuanpihte adingin innpan a vaak khia uh hi a, a tungkik nai lo suak mawk uh hi. Nu Piang Ngaih Don zong a tano leh a pasal adingin inn a tungkik nai lo ahihi.

Tua mah bangin Pa Pau Thual (Zampi) zong ngabeng a gamsung pai pen hong ciahkik nai lo hi mawk hi. Bang zah takin khasiat huai hiam? Nikhat ni ciangin azi leh a tate un apa sihna leh a nu sihna thu uh gen a kul hun hong om ding hi. Tua hun ciangin bang zah takin a khitui uh luang ding hiam? Mite innlum lolum sungah ahikeileh Zato sungah si uh hi, bang hangin ko aa tuaci sih se hiam! Bang hangin hun lo phat lohpi in Pasian in ka pa uh, ka nu uh hong laksak se hiam? A lunsim sung vuah thulehla tampi hong kikengkalh keei ding hi.

Bang bang hitaleh Pasian theihpih lo a thupiang bangmah om lo hi. Pasian in Pa dinmun Nu dinmun hong luahto ding cihna hi. Tua hikei leh bang hangin mi om muang kim lai, mi it mi ngaih khat tua bangin mawk laksak miau ding hiam? A nusiat a zi/pasal a tate uh Pasian lamto dinga, mite nuaiah om sak tuan lo ding hi.

Zomi ten bang khialhna nei liang ih hi hiam cih lamin thu sawilak ding hi lo zaw hi. Hoihna phatna bek tawh akidim Pasian in ei adingin asia bangmah geel ngei peuhmah lo ding hi cih pen kei Upna hi. MV Pauno laphuah sunga bangin eizong Pasian in hong laakni ciangin vangtungam ah hong na muak ding a om khin na hi khinkhian zaw hi! Tuang tun muang zaw ve ni maw!

Zomi Quavadis