Update: USA ah mawtaw in hong taihlupsak Lun Nuam vai ~ Tungzang Innkuan

Lia Lun Lawh Nuam Thang @ Lun Nuam vai genbeh na: (Georgia state Atlanta khuapi ah Tungzang te Dahna:)

Pa Zam Tuang & Nu San Niang te tanu nihna Lun Nuam (kum 4) pen Indian Creek Elementary School ah Mucu @ (Pre-K) akah laitak hi aa, tuni Oct 18, 2017, 6:45am hun in a inn le sang kikal sangmai ah lam akan laitak in alamkan na veilam pan motaw khat hat takin @ hight speed tawh hong tai khat in phukha aa laam 5-6 ding bang lawnmang hi. Lamkan laitak in honkhat in akan hi aa mawtaw dangte zong akhawl dimdem kimlai ahi hi.

Lun Nuam te sangkha apaipih ah pi, Nu Suumnu in mawtaw hatlua amuh vat teh naupang teng alam kanna sa lam ah aleh kaih vat hi aa LunNuam! UMangnu leh apuno Zopi tawh kilen diitdeet hi aa, Mawtaw khauhlua ahih manin Lun Nuam nawkkhia suak hi.

Tua ciangin Sang sia ten delhsuk pahin 911 sampah aa thakhat thu in emergency te le police te hong tungvat in Emory Children Emergency ah manlang takin puak pah uh a, Sia Pauci te nupa, Nu San Niang, Pa Khaipi le kei tawh zato ah Emergency mawtaw nungdelh in ka taisuak pah uh aa, ah Pa Zam Tuang pen ah Sushi sai panin hong taisuakin zato ah ka ki tuntuah ngei ngai uhhi.

Emergency room ka tun ciangun a nu le pa le Pastor hong samtuam aa tuakhit sawtlo deuh ciangin Pastor pa zi lutthei ci in hong sam kik aa adendeuh teh adang teng hong lutsak hi. Ka lut uh ciangin Dr te in khasia takin hong gen aa it huai Ngaihno Lun Nuam nunna na beikhin ta mawk hi.

Sang siapi te aa kipan kumpi thunei te na ngawn in hong delh ciat uh aa Khuapih te le Atlanta Zomi tampi in itna hong lakin hong dah pih uhhi.

Hong nusiatna thu zaksak kawikawi khitteh zato aa kidelh kitam semsem ta aa Lun Nuam luanghuam ahih leh avot khan aa koih dingin paipih ta aa Lun Nuam delh aa pai mawtaw 10 val ding teng ( Lun Nuam)Pa Zam Tuang te innlam kazuan uhhi. Inn tun ciangin Zomi le namdang te inn sung innpua na dimkhin aa dahna puaknuam tuam hi.

Mawtaw hawlpa taisuak ahih manin police ten Helicopter tawh atung pan delhin anuai pan mawtaw tawh kidelh uhhi. (Ahong matsak hamtang ding thungetna ah phawkni).

American Media te:
Amau te ahih leh sang naupang khat sangmai ah accident asi ahih ziak in lunglut takin

Fox 5, Chanel 2, Chanel 11 te leh CBS news te abanban in hong pai in interview hong bawl ciat uhhi.

Hunbawl ding leh sihvui hun ding ahunzui in hong update toto nung.

Atlanta Tungzang innkuan
Updated: October 18, 2017, 5:30pm