Hong Kong ah innteeng nasem khat naupang asilsak laitak Videoh khahkhia in “Child Porn” tawh kiman

Hong Kong ah innteeng nasem khat naupang asilsak laitak Videoh khahkhia in “Child Porn” tawh kiman

Hong Kong ah innnasem, innteeng Domestic Worker in aom numei khatin naupangte apumsil laitak in Facebook tawh Live Video khahkhia ahih manin kiman cih SCMP pan kiza hi. Hong Kong, North Point Area sung ah thupiang hi a, innteeng nasemnu in apu te naupang 3 asilsakkawm in Facebook Live Video akhahkhiat manin “Child Pornography” tawh akiman hi ci’n Police te’n Monday ni in genkhia uhhi.

Tua innteeng nasemnu pen Indonesia gammi kum 28 aphakhin numeikhat ahihi. Tuanu pen Selfies kizaih a ukmahmah, bekthamlo Social Media tungah Photo leh Video khahkhiat a ukngiat khat kici hi.

Abeisa Friday nitaklam in innteeng in aomna Electric Road aom Flat sungah naupang te aki silsakkawm in Facebook Broadcast in khahkhia sese hi. Tua Facebook Live Video sungah naupangte aguaktang in dawksakmawk ahih manin cimphawng in Live akhahpen thulianpi piangsak mawk a, “Child Pornography” Case tawh mat thuak hiaumawk hi.

Naupangno apumsil tepen kum 7 leh kum 8 kikalpawl kici hi.

Tua Facebook Live Video pen akigawm in Minute 17 bang sawt a, ahi zongin tua Facebook Video tepen Monday ni in ki phiatkhia khinta hi.

Live Video sungah naupangno thumte lakah khatin Video hongzaihkawm nahiam ci’n donga, hongzaih nahihleh khawl in ci’n gen hi. Ahi zongin innteengnu in khawltuanlo in zaihsuak teitei hi.

Hih Live Video aki khahkhia anu in amuh ciangin Police Report bawlpah a, katanu leh katapa te akisil laitak in ka innteengnu un Facebook Live Video tawh khahkhia hi ci’n Monday sunlam in Police Station ah genkhia hi.

Tuazawh asawtlo in Police te’n tua innteeng nasem Domestic Worker nupen “Child Pornography” tawh mankhiapah uhhi.

Hong Kong Employment Agencies Association chairman Cheung Kit-man in agenkhiatna ah hih nasemnu in thukham palsat ahihlam kitheilo hikhathei hi ci’n genkhia hi.

“Prevention of Child Pornography Ordinance” tawh kizui in kumcing nailo naupangno te ii zahmawh adawk Photo leh Video khatpeuh Online ah akhahkhia tepen kum 8 sungbang thong kiathei a, liasumzong HK$2 Million bang ki liausakthei hi. Hih Indonesia nasemnu pen bangciciang thu kibawlding cih kitheician nailo hi.

Behlapna: Hih thuthang tawh kisai in Zomi sungah innteeng nasem pawlkhatzong ki om ahih manin theihhuai, zuihhuai ihgennopnop thupawlkhat tawh kong behlapnuam hi.

Amasa penpen in midang tate cikeini, eisungpiang ihtate ii aguaktang Naked Photo leh Video khatpeuh nangawnzong Social Media leh Website, Online khatpeuh ah khahkhiattheih hilo hi. Tuabang in ih khahkhiatleh “Child Pornography” ci’n mat aki thuakthei dinmun higige hi.

Tuaban ah tulai khangno te bekthamlo, khanghamkhin te nangawn Facebook kilimzat mahmah hi. Facebook Live Video khahkhiatpen tulaitak kidemna in ki ngaihsunphial hiam, kikhopna, sihvuina, kimawl laitak, annek laitak, etc… avekphial in ki khahkhiata hi. Pawlkhatbang Live taktak athupi akhahding omlo ahih manin, Video khatpeuh hongtawm, Play tawm in Facebook Live ci’n khahkhia pongmawk uhhi.

More: Sanginn dailenbuk “Toilet” sungah CCTV kikoihmawk ahih manin ki lungkimlo

Tuabang in Live khahding bekbek a uk mahmah te kidoptheih nadingin hih thuthang hongki luikhia ahihi. Gamkhat leh gamkhat thukhun, thukham kibangsamlo a, ahi zongin tuhunciang akhangto gamte ah Privacy pen ki thupisak semsem hi. Guaktang ahih zenzen lohhangin nulepa pawlkhatte’n atate Video leh Photo akizaihding adeihlozong omthei uhhi. Sawltak #zomidaily