Khat guak kisa kei in (You are not alone!)

Khat guak kisa kei in (You are not alone!)

Mi khat a nu sungpan a suahphet in naungek khat leh mit muhtheihloh Kha khat tawh a ki suakkhawm a hihi. Akimuthei pumpi khat bek a pusuak hangin hong cingding Kha- vantung mi zongh tua hunlaitak mah in ei a’dingin omkhin zo hi.

Mihing sungah nuntakna nih om hi. Khat pen huih dik in anletui tawh a nungta pumpi a hihi. A dangkhat pen a hihleh Kha pianzia tawh nungta hi. Hih nihte pen a kikhentheilo mihing khat pianzia a hihi.

Ei le ei i kingaihsut ciangin khatguak bek ombangin lungzuang in ki om thei hi. Lawmlegual te tawh i kigamlat hun, inn tawh i kigamlathun, hong huhding hong panpih ding i neihloh hunciangin ki lungnem thei hi.

Meltheih omlohna mun, hong thei a omlohna mun leh haksatna i tuahciangin thanem in ki om thei hi.

Mikhempeuh in hong taisan in, hong nusia zongin Pasian in hong nusia lo hi. Pasian in a mapianzia a nei, a ma limlemel sun in hong bawl hi. A ma Kha ih sungah hong pia aa tua Kha pianzia nuntakna tawh hong omkhawm den hi. Khat guakbek omlo in Pasian Kha in hong ompih den a hihi.

Ei le ei i ki et ciangin mikhempeuh tawh a kibang bangin i ki ngaihsut hun om hi. Ahizong ih sungmi deihna leh tupna pen midangte tawh kibang thei peuhmah lo hi.

Tua sung Kha deihna bangin a kinungta hi zaw hi. Tua Kha tha sungah mihing khat kimciat aa ding a kisam hatna, pilna, septheihna a kicingtak in om hi.

Tuahiaa nangpen khat gauk na hikei hi. Na lungnem hun ciahgin thala in. Haksatna kizo sak kei in. Na sunglam nuntakna in hih leitungah a kiciang tak in na deihna te hong ngahpih ding hi.

Na sepsawm tantan, na tupna tantan, na ngimna tantan na tuntheih nadingin hong panpih den ding hi. Khat guak kisa kei in. Khat sungah nih om hi. By Thang Bawk/ Siamsin Library