La tawh kisai ka phuutkhak thu tawm

La tawh kisai ka phuutkhak thu tawm

La pen kanu’sungpan kasi kasa in asuahkhiatpih hi dingin um ing.Kum 3/4 naupang nipi sang nangawn ah keima khuak ii bat tantan phatna la ka phuahtawm la va sasakhin cih ka nu’n honggen ngei hi.

Zogam kha khan’lawhna mei hong kuang a,1971,Sept,11 ni,kum 9 mi ka hih laitak in Zeisu ka Hon’pa leh ka Topa in ka sang a, tu laitak a EBC Siapi Rev.Go Za Kham leh Rev.Hau Lian Kham (phamsa) te’ nung tawlpi khat lasa in (Lamka,1975 dong) ka zui hi.

1980 kum takciang in Tedim Bethel AG in Rev.Gin Za Lian (phamsa Sia Lianbawi)makai in Agape Itna late cih min in Series cassette bawlding cih za ka hih manin utluatna hang tawh kei le kei kana ki lamenkha mawkmawk hi.(Tua hunlai dinmunh pen studio ah lakhum khading, Zangkong paikha laiding cihpen,vai teng i man khitteh Muat pahding kici lezong aki zuingam laiding ahi hi.)

Lawmte paikhin,kei hongki samlo, kei ka omna munah na Muat dektak veve ing.(Rapture kihel khakloh ding bang hizah val a ana nawnlo ding sa phial zawzen dektak ing).

Tua Agape Vol 1. ah U SuaMang (TheinKhai’pa)mahin a Bass tum hiven,1981 kumteh amah mah in thuhoih lapha khat hongthei in, Tamu a teeng Pa,Pum Kap(phamsa leh tu laitak a Zamnu pa)kiangah U SuaMang in kei’laphuah/lasak thute ava gen cianga, gam le nam a it avei Pa Kap’deihsak vaihawm’geelsiam na hangin,”LENGTONG”late ava ki khumthei suak a,kuamah bel Muat samlo hi.

Tua hi a keipen La a it a uuk limlim kahih manin,hia hunlai a Agape te’ hongsap khakloh pen,naa kasak mahmah hangin,tu a hibang late a sa,aphuak dingmah leh Zomi’ ading a Pasian hongteel,Pasian geelna hi dingin um in kasang hi.

Leitung mihing te’n bil a i zaktheih Pasian minphatna la ahih leh (tamlua cih omkei naven)kicing mahmah a kicinglai laidinghi.Mihing te tawh aki khenthei ngiatlo,Zawlla, Tunlezua,Gamlenam Itna,Naupang, Khangnotuailaite thuhilhna,Innkuan nuntak,Pilna sum/paii zon’na Mimal Pawlpi Laisiangtho sang Tagah keem……cih bangin khat le khat ki pahtawi na La nam tampi i kisam lai hi.Tu hun ciang aneu alian in lasa leh pulpit la bekbek,Zomi nam ni ah zong pulpit la,Khuado,Sialsawm leh kumcin’ lungdam’kohna tuamtuam kibawl ta leh pulpit la hiden keei…., hi te na biakinn tek vuah nasa sa lel vevua cihhuai peuhmah hi.Ki it ki ngaihna ahih nak leh zawlla zong Pasian in amah phatna in za hi.Vasa haam leh luiging bek nangawn zong Pasian in amah phatna in za hi.

Pulpit labek isak na pen Pasian tunga i kingakluat na hang hituanlo in thu le la lam ah nam picing i hih nailoh man hilel hi. Zawlla deihlo Pastor te ka mawhsak hetkei hi.Muh theihloh Pa sang’ muh theihte’ziak hizawkha ding hi.A hua taktak uh hileh zi/pasal zong neilo ding uh hi.

http://www.youtube.com/watch?v=TrAQmdL-Kcw

Kei’gennop taktak pen,lasa dingmi bel om sazaw ingin laphuak dingmi tampi kisamh lai hangh.Khangthak te hong hanciam un.Pu le pa te’dawi biaklai a i ngeina te zong Pasian biakna suakkhin ta ahih manin, Pasian minmah paulam bulphuh siksan liansak in khuado sialsawm a kipan minam ngeina late phuak a ahun amun zui a,Pastor 1000 mai nangawn a saktheih ding, nungak tangval itna ngaihna late zong Pasian deihna tawh kituak a phuak ding sading hihangh.Gtn: Ka Meitei gun la bangpen Pasian in sathau hong nilhsak lam tel ing.A sazian ka kaihkhop loh hangin hi la hang a ki it ki ngai a nupa pumkhat asuak tawm lo hi.I khuaveeng unau,i innnuai lam te leh i phaitam lam te’n zong deih mahmah uh hi.Biakinn 20 val bangah ahun zil in ka sakhin hi.

Bangbang ici ta zongin Pasian in ei hongpiak talent ciat om hi.Kei’kiang bang ah Kha thu lam a mihau pawl khat in:”Leitung la tualleeng na phuahbek zong a zate a khitui uh luangzo mawk ahih teh phatna le biakna(praise & worship)la te hong phuakmawk lecin na U ThawngKim a te sang…nasia zawding cipong uh.Gtn:Phatna laphuak kei mimal muhna ah Sia David Kham siamsa ing.Lakam kilawm tak tawh thuahlai hi.Ahi zongin ke’n tua Siapa dem nuam in phatna la phuah ka kipat hang….cikmah hun a phazo ngeilo ding hi ing.Amah zong kei hongdem nuam in Zawlla hong kipat hang a mawkna hive ve khading hi.Cihnop na ah i awmsung suak a i phuahla khat pen mi’ndeih hen minthang hen a za mite akhitui uh luang hen cih mawk om thei hetlo hi.Hipen Pasian nasep hi.Tua hi in zawlla khawng Pasian in aphuisam’ding peuh sakha nawnkei un.Pasian in thupha apiak ciangbek a anungta aki lunglut hipan hi.

Ka thu tawpna dingah kei hibang a zawlla ah Pasian in thupha hong piak hang….kei’thuhilh leh kei’ hanthot hi vetlo in, ka tapa U pen MunKhai lungsim leuleu ciangin zawlla sa vetlo ding(amah pen guitor bass leh drum uuk cileeng) Bass tumding drum satding hong kicial lezong …..Zawlla ahih leh tum/sat loding ciziau ahih manin ama a pen Tua hipah lel hi. Anuai a tapa tenih bang hong uuk diam theinai lo maw.

Tua hi in bangla sa taleng zong Pasian tanphanat(foundation)in nei photphot peuh leeng,MAILAM HUN KHEMPEUH ZONG TUA TOPA’ KHUTSUNG’OM AA……………….!!!

Mun Khai’pa.
Miharja Apt,Cheras.