Global Zomi Idol vai (a kicianzaw in dotna leh kuppihna)

Global Zomi Idol vai (a kicianzaw in dotna leh kuppihna)

A piangthei ding in gen phot leng

1. Step masa penpen leh a vai sah penpen innteek kua in hong sem ding, cih ahi hi. HIh tawh kisai in ih GS pu, Central ZOMUS in hong genkhiatna ah, innteek hong sem ding in ZIUSA tungpan approval kingah khinzota hi ci ahih manin, ih lungkhampi ding kal-khatna a zota hi hang. Lungdam mahmah hang. Innteek mawhpuak ding khempeuh a dangte buaipih theihkim zong hikei, amau muang mahmah pah hang.

2. Global Zomi Idol ih cih mah bangin, leitung pian zawh Zomi te tangthu ah amasa penpen ding hi a, pawlpi khat in vaihawm in mipi sam, khuapi khat hanciamna tawh bawlin mipi sam, gam khat hanciamna tawh mipi sam cihbang hilohi. Central ZOMUS in vaihawmna bulpite hong petkhia uh a, leitung bup Zomi khempeuh sungah lasiam penpen telkhiat ding cih ahi hi.

Tua ahih man in, leitung gam bup Zomi te omna ah Central ZOMUS te in judge vasem kim ding cihna hipah lo a, ahizongin Global Zomi Idol a khat veina bangci bangin ki bawl thei ding cih pen ngaihsutna ah a piangthei ding ciang mu khinzo cih pen mipi in theih huai hi. Gam khempeuh (continent cizaw ni) ah ZOMUS branch omkim hi, ZOMUS Branch a omlohna ah a lem thei dingin kivaikhin uh hidingin um ing (a teel dan, judge).

3. Top ten and top three te tawh kisai in, Tulsa, USA khawmpi pan khensatna neidh ding pen ahaksa khatzong omlo hi. Myanmar, Thailand, India, Malaysia pan Zomi khat peuh telcing hong hih a, visa a ngah kei zenzen leh livestream pan or a lemna tampi om a, visa a ngah lawh bang zong omlo ding cih kiciam hun nailo hi.

Ih thuzakdan pen laklawh simsim veve

1. Global Zomi Idol a demnuamte kuaciang la ding (qualifications?) cih ih thu kizaksakna ah kihel khalo ahih manin, Central ZOMUS leh thunei ten aman lang in zaksakkik hileh hoih mahmah ding hi (Gtn)
a. Studio lut khinsa khat peuh in a dem thei veve ding hiam?
b. Idol contest mun khat peuh pan Idol ngah, 1st runner, 2nd runner a ngah ngei khinsa cihte in a demkik thei diam?
c. Kum (age) ciangtan hi leh a hoih diam, or ki ciangtanlo maw?
d. Gam (or post) khempeuh pan Top Ten (each top ten from each country) telciangin, judge khempeuh (gam khempeuh a) pan telpih hi leh ahoih tam?
e. Lamka ah a kibawl ciangin, ZAA (Zomi Artist Association) tawh kop khawm ding ahi hi. Manipur Zomi a kicihna sungah Mizo, Thahdo, Kom, Simte, Gangte, Zoute, Teizang, Dim, Saizang, Dapzal, Valte, Hmar, Paite etc khempeuh akigawm ahi hi. East Zogam ah bang cih ding? Kahbiate?
f. La kidem ding pen Central ZOMUS in tengkhia ding maw, or amau deihciat sa ding, lalui, lathak? Track bangci bawl ding?
g. 2015 Zomi Idol ding in telsawm ziau maw, Global Zomi Idol a khat veina ding telsawm? Hun bangzah la ding: ni, kha, kum?

Central ZOMUS te zahtakpiakna

1. Zomi khempeuh hong gawmkhawm thei pen la bek mah ahi hi. Minam thu ah: Pawlpi in hong khenkham, politic in hong sehsat, business in hong balzan, aw-kaih paute in hong gikhen, ahizongin Lakam kibang Zosuante hi hang. ZOMUS pen Zomite hong gawmkhawm kik ding van manpha mah mah khat bang hi a, la-uk te kipawlna hilo in, Zomite hong gawmkik ding gamh (legacy) khat ahi hi. Tua ahih man in vaihawmna khatpeuh ah hong lungkia peuhmah kei un. Mainawt Zomi mainawt.

2. Sun leh zan in hun, thatang, sum tampi bei in maa hongpang Central ZOMUS leh Global Zomi Idol vai ah a gimding a tawl dingte pen Zomite neihsa ZRA, ZRO, ZYA, ZOFA, ZORO,Zonu tongluan, tuate tawh a sepdan akibanglo ahih hangin, tuate zah in muibun Zomite adingin a manpha mahmah ahih lam mipi in theih huai a, makaite in zong pan hong la mahmah lai un.

Rev. Dr. Suan Za Khup
Seattle, WA