Naupang kum 15 khatin “Pa aw, sileng nuamsazaw niteh” ci’n amahleh amah kithat
China ah naupang kum 15 bek aphapan khatin apianna a Pa simding in “Pa aw, kasihkhit ciangin nalung nuamzaw intehmaw…” ci’n laikhak nusiatin amahleh amah kithat cimawk hi. Lunar New Year akici Sen kumthak atunmadiak nikhat akisapin amahleh amah akithat hi a, hih atapa ii laigelh pen Online Social Media tuamtuamte ah manlangtak in kitheh thangpah ziahziah a, amukha asimkha khempeuh in khasiat in lainatpih mahmah uhhi.
Athu akizakna ah hih naupangpen China, Yunnan Province pan hi a, apa pen mundang ah khualzin in nasemin aomcip cihi. Apa pen inn aciah ciangin atapa itlua khollo in vuakaptheizel, bawlsia theizel cihi. Sen kumthak azingciang atungding hita a, apa inn ah hongciahleh bawlsiazelding cih a ngaihsut ciangin thuak hamsa saluazaw ahih manin, amahleh amah guza “pesticide” dawnin asi cimawk hi.
“Sen kumthak Lunar New Year hongtungleh kamawhnading nongzongzel dinga, nong otsan buabua zelding a… Pa aw, kasih khitciangin nang hong nawngkaisakding omnawnloding pahding ahih manin, nuam sazaw niteh maw Pa” ci’n lai nusiatmawk hi.
“During every Lunar New Year, I was blamed and yelled at … Dad, When I die, you will be happy because you won’t be bothered anymore.”
Tua naupangno ii laigelh pen photo kizaih in China Mainland Social Media tungah kithehthangpah a, amukha khempeuh in khasiat mahmah uhhi.
China gamsung adiakdiak in khuaneu khuata pawlkhat ah nulehpa te khualgamla zinkhia in nasem tampi om ahih manin, atate uh innah aki koihcip honpikhat om cihi. Pawlkhat api apu tetawh omkhawm in, nulehpa tawh kithuah khalo in khangkhia uhhi.
Hih amahleh amah akithatlum naupangno zong apa pen khuadang ah nasem in omcip a, amahpen kuum 70 avalkhin api apu tetawh omkhawm uhhi. Apa pen khatveisunsun adiakin Lunar New Year cihbang pawi thupite ah kumkhatin khatveikhangbek innlam aciah hihtuak hi. Tuabang in khatvei sunsun aciah hunsung in atapa in thuaklah mahmah hihtuak mawk hi. “Extreme Abuse” ciliang in bawlsia gawp cimawk hi.
Apa bawlsiat athuak sangin asihding pen kihtalozaw himawk hi.
“Kumsim Lunar New Year atunsim in kalungnop hun cih omngei lo hi. Nungkum inzong kapa in kumthak sungin hongbenggawp a, athupi hetlo nathemneu khat hangin hongtawnggawp dikdek hi. Tua kumthaksung hongtotgawp dikdekna hangin kumkhatsung tawntung kakapkap hi” ci’n naupangno in alai sungah gelhbehlai sawnsawn hi.
More: China ah ganhing khawina asimlutsawm khat Sahang in na petlum
Guai… ngaihsut huai mahmah ei maw. Inn naciahciang nazi te, natate’n bang hong lamen uhhiam? Inn naciahding apatau mahmahkhawng aomkhakding lunghimawhhuai mahmah dinghi. ZD Sawltak #zomidaily
Comment piaknop aomleh...