Kawlgam ah alamdang nupakop in akiciamteh te’n ta nihna neithei

Kawlgam ah nupa lamdang mahmah in akiciamteh nupakop khat omhi. Tuate nupa pen apasal Ko Saw Tin Tun kici a, azipen Ma Tandar Soe ahihi.

Banghang in lamdang kisahiam cihleh apasal pen atun asanna Pi 5 leh letmat 4 hi a, azipen Pi 2 leh letmat 4 bek phamawk hi. Atun asanna uhpen Pi 3 tak kikhai mawk hi.

Hihte nupa pen Irrawaddy Region sung khuaneu khatpan hi a, 2011 kum in kiteeng uhhi. Akiteenzawh 2013 kumciangin tanu khat neithei uhhi. 2017 April khasung in tanu khat neikik leuleu uhhi.

Atun asanna akikhaibek hilo in akum uhzong kikhai sawnsawn hi. Akiteen laitak un apasal pen kum 28 hikhin a, azipen kum 18 bek hipan hi. Kum 10 kikhai uhhi.

Azi in agenkhiatna ah kaki teenzawh uh kum 5 cingkhin in, innkuansung buaina lianpi omlo hi ci’n genkhia hi. Khuakhat kahi uh a, ka pasal in hong teenpihding acihciang in kazia uh kibanglo ahih manin, ngaihsut hamsa kasa mahmah cihi.

Ahi zongin kha 6 aki ngaihkhit uhciangin kiteeng uhhi. Khuasung venglehpaam te’nzong lamdangsa in, atun uhzong kikhailua ahih manin, innkuansung nawngkaina omkhading, innkuan kiploding hi ci’n aki genngeingai hangin amau nupa pen ki it mahmah uhhi.

Atanu agolpen anutawh kibangleh kilawm kici hi. Alam paizia leh akhe omzia pen anumah bangkhading hi ci’n apasal in genkhia hi. Atanu nihnapen ahihleh ngeklai in, aminzong vawhnailo. Bangcibang hongpiangding cihpen ki genthei nailo cihi.

Khuaneu khatah midangte lo khawhsak in akivak innkuan khat ahihi. Nikhat tul 3000 pan tul 5000 cihbang ngahthei in, tuatawh akivak uh ahihi.

Atanu agolpen agailai in asuahdong Maternal & Child Health (MCH) te’n sumbei khempeuh huhin panpih uhhi. Ahi zongin atanu aneupen asuah ciangin teng 5 kabei uh cihi. Ref: LyMo

Tusungteng nupa lamdang tuamtuam kiza hi. French President pa leh azipen kum 24 val kikhai uhhi. Japanese Princess khatin “Royal Status” nusia in mimawkmawk khat teenpihding cihi. Kawlgam ahzong tuncinglo Pi 2 valdeuh apha nupi khatin ta nih neithei lel hi.

Related: Chicago hospital ah palik te’n thongkia zatolum khat kaplum

Itna mittaw, itna ompeuhleh nakhempeuh lemtang mahmah hi. ZD Sawltak #zomidaily