Kumpi Phiangsiah (Government Tax)

Kumpi Phiangsiah (Government Tax)

Kumpi Phiangsiah Sipin te’n kumsimsim hong don pen tun hong dong kik ta uh hi.

2017-2018 Fiscal Year ဘ႑ာေရးႏွစ္ pen 2017 April pan kipan aa 2018 March ciang ahi hi. Tu aa kong don uh pen 2018 April pan September dong kha (6) ai tangding ahi hi. Nungkum aa zah i a lang hong hipah ding hi.

Kumpi Fiscal Year ဘ႑ာေရးႏွစ္ kilaih nuam ahihman in kha (6) ai bek hong ki dong phot hi. 2018 October pan 2019 September kumkhat ai tang ding hong ki dong leuleu ding aa 2018-2019 Fiscal Year ဘ႑ာေရးႏွစ္ hong suak ding hi.

Tua hong ki dong Phiangsiah thulu te pen i theihtheih sa teng ahi hi.Nam(4) in kikhen hi.

• (a) Inn leh leitang sap
• (b) Tuisap
• (c) lammei-sap
• (d) Ninbuak/paih man te ahi hi.

Banghang in intui lah lalo tui sap kipia, banghang in ninbuak/ paihman kipia cih te leh lammeilah omlo (or) lampizik aa tenglah hilo piak kul ding a hiam? Ci’n lungkimlohna (complain) a neite a ding hih Tedim Municipal page ah tamveipi hong ki telgen khinzo hi.

A telpipi a telo kineih aa hong phin bawlbawlte leh a tello kineih aa nai (1) bang hong dong niloh te’n limtak nasimkik unla na tel zawh tuan kei uh leh zum ah hong pai in hong dong un.

Nungkum aa sumngetnalai (ဆင့္စာ) pen vanmel (blue colour) hi in tukum kha (6) ai hong kidon nading pen ankampakmel (yellow colour) ahi hi.

Sumngetnalai kong hawmkawm un a piapahnuam te’n kipiapah thei in sumpiakhin cihna (voucher) zong kipia thei pah hi.

Zumpaipai sang ci’n hong pia pah tamzaw hi. No inn lian hong kipai nailo bek hi kha ding hi. Leilum,Lawibual,Khuapi (Myoma) leh Sakollam vengbup ah hong ki vakvak ta hi. Sumnapiak khitnalai (voucher) pen limtak na kepsak un. Khatveivei mihing i hihna teh ki telkhial thei aa tuahun ciang tualai nalak theih kei leh nang hong gum zolo kha ding hi. Tedim Municipal