Kizopna Lei ~ Khat Thang

Kizopna Lei ~ Khat Thang

Hun khat lai-in, lokho unau pasal nih om hi. A lo uh kizomin khat le khat a kitangsapteuh kihuh, kipanpih tuakuh hi. Lokhawhna a tu, a hei, a lengte uh kikawmin an lim zaw diak a huanuh leh kikholh tangtangin nuam hongsa khawmuh hi. Kum tampi nuam a sa unaute in ni khat kitel khialhna vai poipi khat hong nei citciat uh hi.

Kum tampi a kihuhna, a kipanpihnate uh a mai mang hong suak ta hi. Kihopih nawn lo bek tham loh, a kigal muh ding na ngawn hong ut lo tuak zen uh hi. Zingsang khat a U zawpa’ lo bukah carpenter (let-ta-mar) khat hong pai dihdihin, “ni nih sung khawng nasep ding a zong pak hing, kong sep sak theih ding khat peuh a om diam Sia aw?” va ci hi. Lokho pa zong hoih ta ngei ei ci-in;

“Nasep ding om lian mah ei, hua gal khat a lo na mu hia? Ka lo veng pa, a tatakin bel ka nau hiven, ka kigi vuah hawkguam khat a om hi a, tua hawkguam sungah tui luan lohna ding ka khaktanna leisaii teng ka naupa in a leito set tawh na nawt khia in, ka kikal vuah lui a piang dingin hong bawl sese veh aw, kei hong el bawlna hi zen in, ka nopmawh suak lua peuhmah hi.

Hih ka lonawl a ka sing cianteng zangin la, dintan sang’ a sang zaw dingin dai umna hong bawl sak le cin, ka gal muh mahmah zong ka thadah ta” a cih leh carpenter pa in zong “hong telsiam ing ei, van kisamteng a om leh nasep kipan pah ning” ci-in dawng hi.

U zawpa zong, dai-umna ding kisam vanteng lei sakin, “a hoih leh a kip theithei dingin na bawl sak oo leh, kei tu ni zum pai na ding nei ing-in nitak teh hong ciahkik pan ning” ci-in vaikhak hi.

Carpenter pa zong nasep hong kipan pahin a sep ding teng hong sem zetzet hi. Nitak khuamui kuan ciangin lokhopa hong ciahkik hi. A dai-um sak mu lo in, a lonawl a hawkguam lui kan na ding Lei hoih tak kidawh sitset hong gal muh hi. A lu pei-in heh lua kisa nui kha liang hi. Tua Lei lam hong naih phei leh a nau pa in a khut hong vanin Lei tung tawn-in hong pai phei hi.

A U pa zong a nau lam hong naih in unau nihte tua Lei thak tungah hong kituak ta uh hi. A nau in a U khut len kawmin “U aw na lungsim picing taktak kong sa hi. Ken hih zah a ka ut bang kong cih gawp banah lungduai zo lo a, ka gamtatna khempeuh siat lak het lo cin-a hih bangin I unau a kizopna ding deihna tawh Lei nong bawl” ci-in hong hopih hi.

Lokho unaute in carpenter pa omna lam hong galet uh leh let-ta-mar pa a vanteng pua in a ciah gal muh uh hi. Uzawpa in “Sia aw, Sia aw, tawmvei na khawl lai dih in, koi tawh ni khat bek hun zang khawm lai ni, nasep ding dang zong nei lai ing” ci-in a khoh leh, carpenter pa in “Hun ngah hileng om nuam mah ing ee, a hi zongin hibang a Kizopna Lei ka bawl sak ding kisam tampitak om lai in ah na pai suak pah ning” ci-in paisan hi.

Tua let-ta-mar siampa, I innkuan sungah I kisam hiam?, I pawlpi sungah I kisam hiam? I minam sungah ee I kisam hiam? I nupa kawmkalah zong Kizopna Lei kiptak hong bawl sak thei ding hi. Tua let-ta-mar pa Jesus himawk lo hiam? A mah in a siangtho Pa Pasian leh ei leitung mihingte kikalah zong Kizopna Lei hong bawl sak khin zo hi. Khat Thang