Cikha ah Tan 10 agualzo atamtheih nading ki hanciam ~ Bob Tuangpi

2018 -2019 Laisim Kum Cikha Sangpi (B.E.H.S, Cikha) ah Tan (10) Gualzo/Aung Atam Theih Nading Kihanciam

Abeisa laisim kum 2002 -2003 kum panin Cikha Myo in tan (10/Matriculation) kumpi piak tan (10) laiphina -စာစစ္ဌာန hong ngah hi. Tua hun akipan Tonzang gungal bup tan (10) laiphi dingte Tonzang pek ah avaphikul nawnlo-in anaihuai Tonzang gungal bup in Cikha ah laiphithei ziahziah uhhi.

Ahizongin mualdawn gamla gamgi mun ahih mah bangin laihilh siam sangsia/sm gina kitamngah khalo mawk hi. 2002 -2003 laisim kum (Academic year) pan စာစစ္ဌာန akingah zawh tan (10) agualzo a omlo zah phialin (ေက်ာင္းတြင္းေအာင္ခ်က္ asangpi ah kah tektekin aphite gualzawhna -result) khasiathuai phial mawk hi.

Tua ahih manin, tutung laisim kum (2018 -2019 Academic year) ah Tonzang Myone Pyituh Hluttaw palaipi MP Pu Kham Khan Thang’ hanciamna tawh Tonzang gungal kuam ah om tan (10) sang tuamtuam omna teng ahi B.E.H.S Haiciin, B.E.H.S Tuimui, B.E.H.S Dalkhai, B.E.H.S Tuimang leh B.E.H.S Cikha ah tan (10) tukum asinlaitakte B.E.H.S Cikha ah gawmtuahin munkhat ah laihilhna kivaihawm khia hi. Tua sang naupangte’ om nading sawm ( အေဆာင္ -Hostel) kivaihawmsakin tukha November, 2018 pan akipanta ahihi.

Laihilhsia ding akisapna zui-in khanglam (Yangon) lam pan NGOs leh CSOs tuamtuamte tawh kizopna zui-in leh sia/sm kisapna (ဘာသာျပဆရာ/ဆရာမ) kivaihawmsak hi. Sang naupangte’ omna ding, neek-le-dawn ding pen tuciang Zomi pilna lam avei leh akin neih man hilo apiakhia khuanu/khuapate’hanciamna tawh kikalsuan phot ahihi.

Hih bang hanciamna ah tutawm bek hilo tan (10) te’ laiphi khit maikum March, 2019 bei dong ding ahih manin, Zomi sang naupang khuapi sungah akahzolo sumhaksate’ dia geelsakna ahih mah bangin khuanu/khuapate’ piakkhiatna leh mun tuamtuam ah om Zomi pihte’ hanciampihna kisam mahmah ahihi.

Tulaitak tan (10) sang naupang akipattah kigawm mihing numei leh pasal (130) bang laihilh sia/sm te kihello pha uhhi. Khakhat sung hih teng neek-le-dawn leh om nading geelna abeizah vekpi pen Estimated Ks. 4,000,000 (Thein 40) kizeek thei dingin kiseh ahihi.

Tua ahih manin, mun tuamtuam ah om Zomi te in hih mualdawn gamgi dungah ateeng mundang apialkhia zolo itapa tanute’ mailam ingaihsutsakna leh Zomi te pilna lam ah ikilapsang semsem nading note khempeuh in hih nasephoih pilna kiguatna (ပညာဒါန) ah na hih theih zah ciat uh tawh ma nong panpih nading uh kong zasak uhhi.

S.Africa President asem ngei Nelson Mandela in agenna ah, “Leitung ahoihlam ah kikhelsak nading ahoih penpen in pilna hi” acih mah bangin, iminam mailam igam mailam hong makaih ding ita inaute pattahna ah kihelkim ciat ni! cih ikizawn phapha hi. Hih bang pilna khaicii tuhna pen minam lamhkikna ah akisam minam phungvuhna (Capacity building//Human resource) ahih lamtak zong mangngilhlo dingin ikilamen tek hi.

Note tawh minam ading hihtheihna pan mapang, Pu Kham Khan Thang ( MP of Pyituh Hluttaw, Nay Pyi Taw) Ph : 09400301122 Bob Tuangpi Ph : 09425942446