Chin State khuapi Hakha khuasung aom inn 2 meikang, mi 3 si

Chin State khuapi Hakha khuasung aom inn 2 meikang, mi 3 si

Myanmar, Chin State khuapi ahi Hakha khuasung aom inn 2 meikanggawp in mi 3 takin sihlawh cih Chin Journal pan kiza hi. Tuni May 31 zingsanglam 1:30am hunpawl in meikang akipan hi a, mi omna inn 2 leh vanzuakna inndawl te akanggawp ahihi.

Hih meikang pen huaisia mahmah in, zingsanglam 5am hunpawl in kiphelhsiang zopan hi. Meikatna hangin asi mi 3 tepen numei vive ahi uhhi.

Hih meikatna tawh akinai vengkhat ah aomkhawm ahi Pi Cer Cuai in agenna ah meikatna pen mi omna inn 2 leh vanzuakna saidawl pawlkhat akanggawp cihi. Inn akangte pen Pearl Store (Pale Store) te inn leh Rev. Mang Kio Thang (tleicia) te inn 2 akang ahihi.

Adang akang vanzuakna tepen Za Za zatui zuakna, mehteh mehgah zuakna, nektheih tuamtuam zuakna, nikteen puansilh zuakna, puankhuina sai cihte ahihi.

Inn akang 2 te lakah akhatzaw sungah kum 90 aphakhin Pi Vui Cer leh kum 45 aphakhin atanu Van Bawi Zi te aom, agiak uhhi ci’n ameltheih te khatin genkhia hi.

Video: Hakha khuasung aom Pearl Store (Pale Store) meikat laitak

Tua nuta te omna mei akatkhit ciangin zingsanglam 3am hunpawl in Van Bawi Zi ii aluanghawm innsung pan kimukhia masa hi. Pi Vui Cer ii aluanghawm pen zingsanglam 7am hunpawl in kimukhia panhi.

Inn akang akhatzaw pen Pearl Store te hi a, tua innsung ahzong nupikhat asisa in kimukhia hi. Tua asi nupinu pen amin Pi Angua (Ahan’ nu) kici a, kum78 aphakhin khat ahihi. Ama luanghawm pen zingsanglam 7:30am hunpawl in aki mukhia ahihi. Pearl Store innsung ah aomkha Sui Sui aki numeikhatzong liamgawp in tulaitak zato ah gimmahmah in aki keplaitak cihi.

More: Hakha Myone, Bungzung khua ah Kawl pasal khatin numeino kum 6 khat buan

Hih meikatna munpen khuasung lamkabom Lansong gei, khuasung naitaupi geilian hi a, khualaizang mahmah ahihi. Meikang akitheih ciangin meiphelhding in meiphelh mawtaw Fire Engine 8 kizangin kiphelh himahleh meikuang khauhlua ahih manin, ki phelhsiangzo paklo hi.

Pearl Store kici vantuamtuam zuakna innpi pen Hakha khuasung ah van kicing bekthamlo, vanmanzong tawmsak uh a, akithei mahmah, aminthang mahmah vanzuakna saikhat ahihi. Meikatna ahang taktak pen kitheician nailo hi. Sawltak #zomidaily