Ka Nu ~ Deih Tung

Ka Nu ~ Deih Tung

Guahzu lak ah innka ciah leh ka sanggam pa in “Banghang a lukhu pua lo na hiam?” hong ci hi. Ka sanggam nu in “Guah theu ngak phot lo a” hong ci hi. Ka pa in hehkawm sa in “Na ci a vot mangta ve” ci in hong tai hi. Ka nu in ka sam hong nul keu sak kawmin “Guah zong ka tapa inn hong tung khit ciang a zuk pat lel ding hi” ci in Guah tung ah ka nu heh hi.Ka nu in kei a ding a hih nak leh na khem peuh langpang ngam hi.

Sanginn pan in sangtuah hun teh Guah a zukciang ka Nu in sangtuah hun thei ahih manin sang inn ah tuipuan tawh hong dawn a, ka lawm te muh na ah angtang ka ki sa hi. Ka lawm te a nu te un sangtuah ciang a dawn cih bang ka theih omngei lo hi. Ka lawm te in nang’ hampha tak cei ci in hong phat den uh hi. Sang ka pai ding ciang in zong Guah a zuknak leh sang inn ah nai lap ding in ka Nu in hong kha hi. Guahzu ta leh nailap ham tang ding hi teh ci in hun maan in sang inn ah hong kha den hi.

Nitak ka vak ciang in inn ka ciah hak ngam kei hi. Banghang hiam cih leh ka Nu in inn ka tundong hong na ngak den a hih man in ka Nu ka lungkham sak nuam kei hi.

Lungdam bawl zanhak, mopawi, sih zanhak na khawng ka pai ciang in zong zan tha pai in ka inn kong uh hon sa in na koih den a, ka Nu pen ka ciah hun ding ngak in zan tha paai in na ih mu lo hi.

Mikang paunak khat ah “Love is Blind” ci in naki gelh hi. “Itna Mittaw” a cih na hi a, hih kammal pen maan ka sa mahmah hi. Bang hang hiam cih leh ka Nu sungah ka om lai pek in ka Nu in hong mu nai lo hi ta se mah leh hong it a hih man in Itna mittaw a cih pen maan ka sa lua hi.

Hih leitung ah ka ngaih masak penpen kua hiam ci in hong kidong hi leh ka Nu ka cih ding sim loh a dang ka thei kei hi. Ka mit kahah theih ma nangawn in kanu a aw tawh ka thei khin zo hi.

Ka Pa in na a sep ciang man hun, zawh hun nei hi. A hi zong in ka Nu in kei ading in man hun, zawh hun cih bang om lo in a tawntung in nasem den, hong kem den,hong ngaih sunden hi.

Nute in katapa in sem zo in teh a cih leh a tapa in sem zo takpi hi. Na Nu muang ding in na om hiam? Na Nu ki muangsak in. Ih Nu te lungkham saklo in ih Nu te maitai sak ni.

Ka Nu in ka thu im sim te na ngawn hong thei hi.Ka ci a natciang, bangmah gen kul lo in hong thei a, ka gil a kial ciang, haksat na khat peuh peuh ka neih ciang in zong hong thei hi.

Ka Nu hoihna leh hong itna te gengen ning ci leng gen zawh, gelh zawh ding hi lo a, ka Nu hong it na pen tehpih ding om kasa kei hi.Ka Nu in mizawng te, ko sang a neilo zaw te pen heh pih thei mah mah a, it thei mahmah hi.Hih leitung ah ka Nu bang vive nupi tam pi a om ding ka deih hi. Topa’n ka Nu khansau na thupha hong piaksak lai ta hen. Deih Tung