Kimpu leh Kimpi – 34
Guahtui te hong luang, ann kungte hong khang in tangmai leh mai te hong gah a, mehteh mehgah hong nopci mahmah hi. Sangkahna zong kumlui mah bangin gualnop hunte hong kizom toto a, Siamsin Sports, Siamsin Seminar, Siamsin Maithak Muakna, etc cihte hong om to kik hi.
Kimpi leh a lawmte in laisim zong nuamsa, lai lah zo, ci lah dam, nek leh dawn lah hong nuam mahmah ahih manin guahzu taleh lungtai, ni sa taleh khuahek nuam hi. Lo leh huan ah annteh hing silsialte in thalawpsak in nuntak gimnam sak hi.
Kimpu ahih leh khuahun kihei in nopna a piak zelte kumlui bangin nei nawnlo a, a hekna peuh dahna, maigumna vive suakta hi. A lawm ngaih Nuamno in lah maitai nawnlo, khua lam pan a thuzak in lah a lungsim gimsak. A laisim lah lunglut theilo, sangkah lah nopsa lo; lawmte kiang om leh lah kumlui bangin maitai zo nawnlo hi.
Aw! Kumkhat sungin hun leh vaite kinak lumlet man si e maw.
Mihing i nuntakna limtak kem kei lehang nopna i cih zong lopa bang hul pah thei himawk a maw. “Mi bawl in kisia lo a, ei leh ei kibawl bek in mihing kisia hi,” khangluite in a cihte uh Kimpu tungah hong tung taktak himawk. Bangcih ding. Sangkah ding kipat lai kumlui in nuam asaksak mai zeen tawh maw. A khuapihnu Kimpi nangawn hawmthawh a ‘taw-ta’ a sakmahmah hunte ngaih huai ta si e maw. Kimpi lah a sangkah limtak zom, a laisim hoihtak zo, a minam leh a biakna mah thupi bawl in mite mit muh ding kilawmlo om kha ding ciin kikhual takin gamta hiathiat a, mite in ‘taw-ta’ ci taleh phamawh sa seselo in ama hihna kithei in om hit hiat lel hi. Kimpu ahih leh mite om zia thei kisa in a pua tham bek ah lu-lee gawp in pheng tat gawp a, lu leh taw zong phawk lo in kiliansak, kithupisak, ki-style sakin a om gawp hi.
Tu in a nuntakna uh hong kikhai deuhdeuha, sanginn khat ah kah khawm ahih uh hang a tawpna ah a gah a lawh ding uh a kibang nawnlo hi. Khat in a nuntakna ah lametna, lungnopna tawh kidim a, khat lah lungkiatna, dahna, maigumna tawh kidim hi. Kua mah sawl hilo a, amau leh amau hoih a sak a teel uh, hoih a sak a zuih uh ahi hi.
Kisik mahmah ahih manin laikhak hong gelh a,
“Dearest Nuamno,
Sorry. I cannot love you. I am sorry. Very sorry. Hong maisak in. Nang tawh kingaih laitak in khua lamah ka ciah sungin lawmngaih nih tak na nei kha ing. Laikhak ka ngahna ah anih un tangzanglo cih za ing. Tua manin nang tungah muanhuailo hita ing. Nong maisak ding hong thum ing. Kikhen mai ni. All the best. Kei bel ka sangkah zong zom suak thei ding maw, zom suak theilo ding cih kithei nawnlo hi. Inn ka ciah zong kul kha ding hi. Ka nuntakna ka siasak kha hi.
College kah ciin ka kithupisak kha a, a taktak ah lut lo in a pua tham bek ah nuam kasa a, nungak leh zu te tawh ka kidiah a, ka theih ngei loh cell phone leh internet te tawh hun ka beisak a, ka nu ka pa sum neih khempeuh ka bua sak ta hi. A nek taang uh khua-ul luang ngekngek a Let-Li paia a thalawh uh sumte ka thelthangsak ta a, kei adingin maizumna bek longal ka masuan a om kei hi.
Ka sangkahna khatvei kipan pha kik thei leng ut sam ing ei. Kumlui a bul pan kipan kik thei leh ut buang ing ei. Tun lah kumte hong bei khin a, ka lap loh tampi ka delhpha nawn kei ding hi. Gualnop ka masak a, laisim ding ka nunun kha hi. Ka neu muh mahmah ka khuapih Kimpi nangawn a pha nawnlo ding ka hita a, ka khangno hun ka siasak hi. Zu lah ka ngawl thei nawnkei a, laisim lah ka thadah cipta hi. Bangin hong phong kik thei ding ahi hiam?
Ka tangthu na zak nawn kei a, khua lam ka ciah khit ciang nong phawk leh lai hong khak in maw. Hong it, nang adinga cing zo lo……
Tg. Kimpu
Zomimio College
A exam khempeuh ah fail ahih manin sang zom kik nawnlo in, a khualam lawm ngaihte lah kha 9 pha nuam ciatta ahih manin a nu leh pa laikhak mah bangin “Inn lam ah tawmvei (hong) ciahpak in” dingin a puanlom a zialta hi. Tua ni pen Zomimio College ah a khantawn a muhtawpna ahih ding lam a thei kei hi.
Inn a tun ciangin a lawmngaihte gel lah baloon mut puak mah na bang ta uh a, zu sa mutpuak mahmah bangin na bem kiu keu ta uh hi. A nu leh pa in inn ah na puisak vetta uh ahih manin zi 2 nei suak pah a, a sangkahpihte lungsim ah phawk kawmkawm in a nu leh pa nasep mah a seppih kik hi. Khuapi pan van zuak ding va la a, let-li in khuano lam leh saklam khawng,khanglam khawngah a zuak kawikawi hi.
A tate nih a gol sim ciangin thu zong hilh theihta ahih manin,
“Noh zong kei na bat uh leh kisik ding hi uhteh” ci pong zel hi. A lawmte lah khuapi sung vive ah teengta uh a, vanla dingin a pai ciang Mutpu te inn bangah a zintung thei bilbel hi.
Lia Kimpi ahih leh Pasian a zahtak mahmah khat tawh kigawm in tano hoih mahmah nih nei uh a, Zomimio College ah laihilh in nisim nisa guahzu thuaklo in a kuan hi. The famous Tg. Kimpu bel a sangkah sung a minthan pak tomvei sung cih loh mite in phawk kha nawnlo a, a lawmte in a kituah uh ciang a lungkimna dingin, “Nang sangkah ciil lai a melhoih pen hi cin a, nungakten hong ngai mahmah ci uh hilo hia” cih khawng a kamsiam ngah hiden ta hi.
(zop lai ding)
Hau Za Cin
Phuitong Liim
Comment piaknop aomleh...