Kawlgammi SEA Games kimawlna enin apai te naki satgawp

SEA Games kimawlna pawi enin apai Kawlgammi 11 te satthuak

Malaysia, Selangor sung aom Shah Alam Stadium ah Monday nitaklam in SEA Games Football kisuihna om a, Myanmar Team leh Malaysia Team te kidem uhhi. Myanmar Team te thapia in apai pawien Kawlgammi pawlkhat aciahlam ciangin satthuak uh ahih manin, liamgawp uh cih DVB pan kiza hi.

Myanmar leh Malaysia Football Game pen nitaklam 11pm hunpawl in manpan a, Shah Alam Stadium panin innlam ciahding in Myanmar Team te thapia in apai Fans honkhat mihonpi lakah aom uh ahihi.

11:30pm hunpawl in Myanmar Fans te mihonkhat in singkhuah tawh sat uh a, amawtaw te uhzong suangtum tawh densak uh cihi. Tuabang in Myanmar Fans te abawlsia tepen Malaysian Fans te hi ci’n DVB te’n genkhia hi.

Hih buaina hangin Kawlgammi akigawm in 11 bang liam uh a, tualak ah khatpa pen liamngawh phadeuh ahih manin zato ah kikemsuak cihi.

Kuala Lumpur khuasung aom sisan akisamte ahawmkhiazel Blood Donor Orgainzation khat ahi “Lovely Heart” panin President asemlaitak Ko Thet in agenkhiatna ah pawi amankhit ciangin Myanmar Fans tezong aciahding in akithawi ngeingai uh cihi.

Pawlkhat te aciahnading uh Bus omna te zuanin pai uh a, pawlkhat te’n mawtaw akoihna uh Parking lam zuanin aki paingeingai laitak in mipi lakpan in Malaysian gammi pawlkhat in Kawlgam mite asat uh cihi. Ami asat atuk khitciangin akhe tuatsak, alu tuaksak in, tuabek thamlo asumbawm leh phone cihte zong laksak uh cimawk hi.

Min Soe acihpa khatbang liamngawh mahmah ahih manin, zato kipuaksuak in, zato panin aliamma te kikhuisak hi.

Akhaguh kilawi in, aha pawlkhat zong kiakhia, kitat cimawk hi.

Ko Thet in agenkhiatna ah Kawlgam in 1-3 tawh kimawlna alel uh hi a, abanghang in Malaysian te’n Kawlgam mite hongsatsakgawp uh ahidiam cihpen telzokeng ci’n genkhia hi.

Hih thuthang pen Malaysia gamsung SEA Games kimawlna panin Kawlgam mite tuahsiatna thuhoihlo, thuthang Bad News khat aki behlap leuleu ahihi. Hihtawh akigawm in Kawlgam mite tuahsiatna 3 veibang hitota hi.

Amasapen abeisa Thursday nitaklam in Myanmar Women’s Football Team te nitak aciahnading Bus Driver pa mangcipmawk a, athu aki khuanung zakna ah tua Bus Driver papen guta nahimawk in, Driving License zong aneilopi in SEA Games mawtaw ahawl nahimawk hi. Hihpa hangin Kawlgam numei kimawlte Hotel ah aciahding hun uh ziakai sakgawp hi.

Related: SEA Games kimawlding te apua mawtaw 2 kiphukha, Kawlgam mite aliam om

Anihna pen Monday zingsanglam in Squash Players te kimawlding in National Squash Center ah apailaitak mawtaw kiphukha uhhi. Kawlgammi Players te pawlkhatzong liam uhhi.

Note: Hih Myanmar leh Malaysia Football Match pen akhauhpai mahmah, kimawlna khat cihtheih ahihi. Malaysian gammi Football Player te ngiatzong tualpi sungah gilo mahmahmawk uh a, Referee in gumsawnsawn ahih manin, Football Match enleng hehsuahhuai mahmah hi. Myanmar Team te’n azo himawkleh thuakbaihlo khading uhhi. Sawltak #zomidaily