Kimpu leh Kimpi – 35 ~ Hau Za Cin

A sangkahzawh uh kum 5, kum 6 sunga hihzaha a nuntakna a kikhel mawk pen Kimpu in theisiam theilo in a zu dawn lah nasia semsem a, a lunggimna lah kiam tuan peuhmah lo hi. A lawm lui Nuamno te bangci nuntak cih zong a theih nawnloh hang amah leh amah lungkham khop mahmah a, a cihtheih lah om tuanlo hi. Kimpi bel a sangkah lai vua mite simmawh leh cilphih, taw-ta a sakna te khempeuh uh ama thupha suak in ama ading khop in nuamsa, mite englo in innsung ah nuamtakin nasem in a pasal lungdamsak, a tate kem in, a inn kiim a hah hi.

Kum 5 dang hong bei kik khit ciang…………

Zomimio Hospital ah cina gim mahmah khat om, na meltheih ngei, na khuapihte khat hi cih Kimpi in a zak ciangin a Honda Car san liklek tawh va delh in a va lut leh a sangkahpih Kimpu zu lungvei, zu nekna hanga gilpi na na hi a, a mitkha ah a sangkah khop lai khawng uh hong suak in, a khasiat bang hong suak mahmah hi.

“U Kimpu, na nop tuam deuhta hia?”
“Hei, hei, gim peuhmah ing ei Kimpi, noh damdam maw…”
“Koh dam liamliam ung ei, biak Pasian thupha hi..”
“Kei bel a si ding hita ing…. ka hinna a bei ding bekbek in ngaihsun ta ing”
“Si baihlo e u Kimpu, bangmah ci lo ding hiteh… na natna hong bei pah ding hi… thungetna i nei khawm diam?”
“Aw, hong neihsak o. Sang i kah khop lai, ka nuntakna hoihtak ka kep loh, ka ut bang ka gamtat, biakna na ngawn ka thupisimloh te ka kisik mahmah hi…”
“…………………………. AMEN….”

“Lungdam ei Kimpi….. mi tampi in ka damna dingin thungetna hong neihsak uh a, nang kekkek in nong neihsak nop pen ka lungdamna lian tuam se hi. A hang bel ka gamtatna khempeuh a thei cianpa nang na hi a, ka angtang mahmah hi. Ka dam kik leh Topa nasep ding lunggulh ing. Mihing siamna leh mihing bawlna tawh dam ding ka hih leh bel a damkik nawnlo ding hi ing. Pasian na khempeuh a bawlpa in hong damsak nuam ahih leh bel a piang theilo khatzong om kei….”
“Vantung leitung a bawlpa adingin a haksa khatzong omlo hi. Ama theihloh in a piang khat zong omlo hi. Nang natna zong a theilo hilo hi. Topa muang ni. Amah in hong damsak kik thei hi…”
“Ka lungdam mahmah si e maw Kimpi. Ka tate leh ka zite ka khual nop hang ka nuntakna hi bang hi a, ka sih leh zong na hilhsak, na makaihsak in la, ka hih khialh, ka gamtat khialhna te pan a kipengh theihna ding un na hilhsak in maw…. ”
“Nang adingin ka hih theih khempeuh ka hih ding hi, lungmuang in, hong muang in maw u Kimpu”

“Them khat tawldam nuam ing, nang zong na ihmut theih leh na gimna te hong phatuam ding hi ihmu in maw u Kimpu”
“Hi ei, Kimpi hong ciahsan in maw… damkik ka hih leh i kimu kik dinga, ka sih leh zong vantung gamah kimu kik ni….”

(zop lai ding)

Hau Za Cin
Phuitong Liim