Khangthak le kum zalom 21 kantanna ~ Lian Tuang

Khangthak le kum zalom 21 kantanna ~ Lian Tuang

Paunak khat ah Mikhat ngasa na piak sang in ngasa mat dan hilh lecin ama adingin man neizaw in sawtvei nuntakpih zaw ding hi acih mah bangin tu le tu in nekpah theih ding zatpah theih ding thute a malmal in I gen kei dinga ngasa matzia kihilhte bangin a lawhcing kalzuanzia le ngeina hoihte I neih theihna dingin a kisam thu pawlkhat I sut ding hi.

A masa in
Tu lai leitung khuahun khantohzia pen mipilte in a gen ciangin leitung piancil a kipan thu le vai khempeuh ah khantohna a sangpen dinmun ahi dingin kigen liang uh hi. Adiakin gam khangto khinsate nisim nuntakzia, pilna siamna hauhna te pen gen bat zawhloh in sang a, ei gam khangto taktak nailote in tua khantohna nung nungdelh in a kibuai mahmah leitung khua hun ahi hi.

Nidangin khua khat le khua khat kizopna kithuzakna dingin kamtai kizang hi. Khe tawh kipai ngiatngiat hi. Tua khit ciangin laikhak kizang hi. Hun tampi bei in tha zong tampi bei hi.

Ahi zongin tu hun ciang in ahih leh tu laitak mahmah a i hunzatna i omziat nangawn leitung bup in a mu thei pah hi ta zen hi. Abeisa 100 pek hi loin a beisa kum 10 hun nangawn tawh kilamdang vilvel ta hi.

Cidamna lam ah, sum le pai zonna lam ah, kumpi kiutna lam ah, leitung pilna tuamtuam khempeuh ah I tel batzawh pak loh ding zah in khangto hi. Tua bang khuahun sungah a om ei te in I mailam nuntakna ah koi ci bangin kalsuan in nungta ding I hi hiam.

Manlang le khauh takin a kipei valval leitung khantohna tuihualte kawmkal ah ong kinelhsiah in bei mang lel ding I hiam ahih keileh khuahun zui in tuate siksan in kilamsang toto ding i hi hiam cih pen tu lai khangthak eite khat ciat khat ciat liangko tungah ong kinga ta hi.

Kum zalom 21 I kantan pih theih ding thu ( 8 ) khawng kikum nuam hi.

1) Vision behlap ding

Khangthakte in a tunga I gensa tu lai khuahunpi kum zalom 21 I kantanna ding a masa in I vision I behlap loh phamawh dingin ka um hi.

Behlap ding cih ciangin thudangpi hi tuam lo hi. Abei sa le tu ni ciangciangin I vision neihte pen ahuampi in gen leng a kimu thei thu le van leh nate tungah kinga hi. Gtn; Siavaun sem ding, Dr ngah dong sang kah ding hi.Mipil hi dng mi hau hi ding, mi minthang mahmah hi ding. Biakna pawlpi te bang hileh Biakinn hoih mahmah nei ding, mission tampi khah ding, hall nei ding…, a bei theilo zah dongin tam hi. Kipawlna tuamtuamte zong tua mah bangin utna lunggulhna vision hoih nono kinei ciat hi.

Ahi zongin mai lam ah hih bangdan ngimna namte bek tawh kikal suan kimualsuak thei lua nawnlo ding hi. Bang hang hiam cih leh na khempeuh kikhel in a thak zaw a hoih zaw om toto den a, tu ni ading ahoih pen ahih hangin zingcianga dingin a zumhuaipi zong ahi thei ding khuahun hi ta hi.

Tua ahih manin I vision I ngimnate pen mihing mimal tung a kinga nam zong ahih ding kisam kha ding hi. Gtn: ka na sepna peuhpeuh ah a thumanmi ka hi ding hi. Nasep a hanciam mahmah den khat ka hi ding hi. Alungduai mahmah khat ka hi ding hi. Kiniamkhiat ding a hanciam den ka hi ding hi. Midangte a nawngkai sak loh khat ka hi ding hi. Mitawh kipawl ding a hanciam den khat hi. Mipi phattuamna ding ma apang den hi ding cih bang in sunglam a bulpuh
Vision tuamtuam te i behlap ding kisam kha dingin ka lam en hi.

2) Lungkimna zong ding

Mipil Albert Einstein in A gualzo khat na hihna ding hanciam kei in la a manpha khat na hihna ding haniam zaw in a cih mah banign hih lai ah tawm I behlap nuam hi. Guahzawhna zong kei in la lungkimna ding zong zaw in I ci nuam hi.

Leitung pilna siamna hauhna a sang mahmah banah nisim naisim a khangtoto leitung laizang ah ei khangthak Zomite in tua gualzawhnate nung I delh luah leh tawmvei sungin I bah dinga, lungkia in leitung nangawn I ciimtak pak kha ding hi.

I pastor pawlkhatte in thu a gen ciangin Pasian na ka sep khak mah hampha kisa ing. Kisik kei ing. Ka lungkim mahmah hi a cih pen I za zelzel hi. Hih pen a man mahmah hi. Banghang hiam cihleh amah pen Tua bang nasep a uk khat ahih man ahi hi. Ama uk mahmah khat a sem khate pen lungkim nuamsa mahmah uh hi. Lawhcin le lawh cihloh minthan le minthanloh zong phawk khalo uh hi. C Ronaldo, Messi, …,cih leitunga kimawlna lam a aminthang mahmahte pen kimawl a ut mahmahte hi zaw uh a, sun tawh zan tawh kimawlin nuam sa mahmah uh hi. A uk khat a semsem ahih manin lungkim mahmah uh a, guawlzawhna lawhcihna hamphatna tampi ngah veve uhi.

Siavuan uk lo khat in siavuan ong sep ciangin, sangsia uk lo khat in sangsia ong sep ciangin, lai uk lo khat sang a kahkah ciangin, lo khawh uk lo khat in lo ong khawh ciangin, engineer uk lo khat in engineer ong sep ciangin, .., amah lah hehpihuai in a kim le pan zong buaina nawngkaina tampi ong piangsak zawsop uhhi.

Hunthak khangthak sungah nasep khempeuh a thupitna kibang ta hi. Nasep thupi cih pen a nasep sangin a sem mite lungsim le ngaihsutna tungah kinga zaw hi.

Gamvai minamvai, sunzonpaizonna, Kumpinasepna, campany nasepna, kimawlna, kizep kipuahna, NGO nasepna, khuazin gamvakna, lokhawhna, huanbawlna…, avekpi in a thupi ahi hi. Tua hi a, ei khangthakte in maban khat peuhpeuh I sep ding ciangin I ukna I lungkimna ei le ei kitel in tua mah zuih sawm zaw ni. Tua hi leh i sepna i maban peuhpeuh ah muibun in kimazang thei ding hi.

A nasepna ah a lungkimte pen mi hampha hi lel hi.

3) Thuhoih masak ding/ positive thinking

Innkuan sung, minam sung kipawlna sung le mimal vaite ah buaina a kipat ding ciangin thuman kituhna ong om masa zel hi.

Thunman tawh kisai mipilte tangthu sutna ah mipil Socrates hun lai a kipan mipil Isaac Newton hundong muhzia namnih bek kibulphuh hi. Thunman le thumanlo cih ahi hi.

Tua khit ciangin philo khantohna ong om to a tua lai ah zong thu namnih mah om a ahih hangin tua thunihte kidodo kinawtnawtin atawpna ah a thumanzaw pen gualzo den hi cih thupomzia Win-Lose -theory hi leuleu hi.

Ahizongin galpi nihna khit lam ciangin thuman pen nam khat bek om lo hi. A gualzo pen zong thuman hi khin tuan lo hi. Thuman tampi om thei hi. I theih nailoh thuman nangawn tampi om lai ding hi. Tua ahih manin vai khat peuhpeuh ah a thuman pen cih sangin khat le khat kitheihsiamna thuhoihna a hoih dingin leptuahna ( win-win-theory ) cih lam kihei leuleu hi

Hih lai ah tawm gen beh leng thuman a kilim zatna pen thukhen zum bek ahi hi. Nungak le tangvalte a kingaih mahmah hun laitak pen khat le khat ki itna kitheihsiamna, kikhualna a neih mahmah hun laitak ahi hi. Ahi zongin amaute kikal ah thuman zaw ding a kituh uh ciangin kikhenna kisiat kiho zawh nawnlohna piang ding hi ta hi.

Nungak tangval kikal, kipawlna, pawlpi le minam sungah thumanna piciang I nak zat luat leh kikhenna kisiatna tawh ong kizom hamtang ding hi. Apiang khin sa tampi I mu khin ta hi.
Thumanna pen thupi lo cihna hi lo hi. Thuman I cih pen mimal muhna tung kinga in nam tampi om thei hi cihna hi zaw hi.

Paunak khat ah Mihing le buaina pen a ki unau hi a cih mah bangin, buaina hamsatna tawh kidim leitungah thumanna akl kei thubek I cih teltal leh buaina apiangsakte kihi zaw kha ding hi.

Tua ahih manin khangthakte in a telkhial thei thumanna( win-lose-theory ) cih dinmun sangin kitheihsiamna bul bulphuh in thuhoih le thuphate bulphuh leh mitsuan in nei leng cih I kihanthawn nuam I hi hi.

4) Hunthak pilna le vante zat siam ding

Leitung galpi 2 khit ciangin Zogam ah van kinuisia tam mahmah ci hi. Akigen zel thu pawlkhat lakah Cikha lam a mawtaw kinusiate bang India lam panin Vaite khawngin amawkna in la suk ziauziau hih tuak lel hi. A sawt lam ciangini I pu I pate in a mawkna in na phal nawn sam loin mawtaw khat le cii ip khat cih bangin na kikhek sak uh ci hi. Mawtaw peite longkhia in mualdawn peuh pan in khuk suk uh a tua pen muh nop sa mahmah in lungdam mahmah uh ci hi. Mawtaw pei kikhuk in takkung dawn tantan a kan ciangin nuam mahmah uh a awng zaizai uh ci hi.

Tua pen tu ma kum kum 70 – 80 lai khawng hi pan in tu bang I ngaihsut kik ciangin I nuihza in pammaih I sa thei san pan hi.

Ahi zongin tu laitak mahmah in zong tua bang khat mah ong piangkik leh kilawm ka sa hi. Leitung vatzat kizopna TV, Video, telephone, Internett, social mediaye ( Facebook, youtube,. .IT van zatte .,) computerte hoih mahmah in tuate tungtawnin leitungthu pilna thu thupiang khempeuh i omna pan in kimu thei ta hi.

Midangte in tuate zangin pilna siamna, hauhna, khantohna ngah theihna ding un a zat laitak in ei Zomite in I zatdan pen galpi nihna hunlai a I pu I pate gamtatdan tawh kilamdang lua keileng kilawm ka sa hi. I zah a kibat hangin midangte zat dan le ei zatdan kibang naikei deuh leh kilawm ka sa hi.

Tu zawh kum bang zah hiam a khangthakte in zong tulaitaka i gualnopna, i buaipih thute le Van leh nate i zatziate a et uh ciangin a maizum kha mai ding uh hiam, a nuihza mai kha ding uh hiam cih nakpi takin ki et phat ding kisam kha ding hi.

Tua ahih manin hih vanzatte khempeuh mi picing khinsate zat mah bangin i zat siam ding kisam hi.

5) Pilna thutheihna mun khempeuh pan la ding

Ka nau lai tan 2 pawl ka hih lai in sun khat vantungah vanleng leng in ging dada hi. Mi khempeuh kipatau mahmah hi. Van tung lum damdam in mi khempeuh in vantung lam nga in vanleng ki enen a, nupi pawl khat bang patua lua in an nangawn ne zo loin thu ngengen uh hi. Kua man thu kikan tuan loin putek pitek pawlkhat in galpi nihna apian dingin zong tu a bangin vanleng ong kilehleh in tua khit ciangin galpi tawh ong kizom hi ci sawnsawn ahih manin tua pen up cihtakin kium hi lel hi.

Ka neulai in huihpi le guahpi kinuai in khuahun ong kipei luat ciangin khuasungah gul / tham a man om hi ding hi. Gamsungah sihsia a si om hi ding hi ci in ka lau mahmah uh hi. Tua launate pen Thutheihloh man vive na hi bulpizaw hi.
Tu lai khuahun adingin a nuihzak huaipi khat ahi hi. Huihpi guahpi pai dingte kitheikhol theita a, leitung vantunga thupiangte tu le tu in kithei thei ta hi.

2007 kum ka nasepna ah Yasagyo a zat ding setpi le leipua mawtaw alianpite 30 val guahzu meikai nuai kawmkal pan ong tung uh hi. Lampi niplua ahih manin paingam nawnlo in kei kiangah zan ong tam uh hi. Nih ni khit khawng ciangin guahtheu a, a zan in guah a zuk kik keileh zingsangin paikhia dingin gel uh hi.

Nitak ciangin Setvan engineer pa, lambopa, kei le tuibem lam engingeer pa tawh ko teng in TV a khuahun kitangkona en kawm in zingciang pai thei in ko teng in ka kipsak uh hi. Ahi zongin ko kianga ong om den sabeng pa khat in ka thu uh ong nial bikbek hi. Guah zu in teh tam mahmah lai in teh kitawi vet kei un ong ci laizang a ko kumpi nasem teng bang ka heh sim giugiau uh hi. Ahi zongin a zan ciangin guah ong zu suk zaizai takpi a, gelna khempeuh kipelh hiau hi.

Azingciang in tua sabeng pa kiangah guahzuk ding le a tam ding mahmah ding nang koi ci theih sese na hiam ka cih leh hamsa kei e, zani zanhal teng ka thagui na lua mahmah hi. Thaguina le khuahun pen kizom mahmah lel hi ong ci citciat a kei bel ka nui heihai pong hi.

Lai Siangtho sungah miksite, kauphete kiangah thudong un a cih mah bangin khangthakte in zong a omsa pilna siamna a sangpipite bek bulphuh khin sam loin, nu le pa, u le nau, khangham khin sate ban ah kim le pam mun tuamtuam panin pilna siamnate ilak theih ding kisam kha dingin ka lam en hi.

Tulai taka leitung pilna khempeuh i thei khin phial zongin tua pilnate’ theihzawhloh pilna tampi om lai ding hi cih phawk den ni.

6) Piansakna tawh kizopa

Zomite in piansak nate nakpi takin thupi le manpha I sa lua nai kei hi. Khangthakte in hunthak sungah hih pen thupi takin I ngaihsut loh phamawh ta hi.

Labu sungah
Topa Pasian nangma khut a na bawlsa singkungte le vasa ham ngaih ka za, mualsang dawn pan guamthuk sung ka et suk ciangin lui ging za in huih dam ong nung hiauhiau, Tua ahih ciang kong phat hi Topa aw,

Cih bangin piansaknate a hoihna a it hauina thute late I zaza i sasa hi.

Nitaka ni a tum lamdang si e, zingsang ni suak zong lamdang sa pen ing

I cih mah bangin piansak nate in apaingsak Pa, Pasian mahmah tawh kinai theihna ding lampi na hi gige hi. Tua ban ah a piangsak Pa in kisam sa in hoih thu ahi hi. Ahi zongin eite in tuate thupi sim kha loin hoih sa zo taktak keileng kilawm kisa mai hi.

Ataktak in mihingte puansilh bangin leitung pen singkung lopa le piansak nate in tuam in khat le khat a kizom dimdiam hi a, tua leitung kituamna puante thudon loin I kisiaksakleh leitung zong khuadam sa in ong ci na dinga, leitung a om khempeuh in buaina I tuak kha ding hi. Tu laitak mahmah in zong Leitung ci na in leitung mun tuamtuam ah tuicin tunna, zinlinna kial tunna cih thusia tuamtuam nisim in piangpiang ta hi.

Tua hi a khangthakte in leitunga om piansak nate khempeuh a hoih bek in a om theihna dingin hih theihna tek pan mapangin I keploh phamwh ding hi. Hih pen khangthakte in i seploh a phamawh thu khat ahi hi.

7) Midang tawh kizop kul

Khangthakte in hunthak khuahun sungah I kalsuan ciangin ngalkhak bangin kitangtak theilo ding hi. Sak le khang, veng le pam tawh kipawl theih ding kisam hi.

Na tun baih nopleh nangkia pai in la, laisau na pai sawm le midang tawh paikhawm in cih paunak khat na om hi.

Tu laitak leitung a lokzo mahmah company lian le mihaupipite in na a sep uh ciangin hi zo lel ing ci in amau bek in sem ngeilo uh hi. Midang tawh kipawlkhop ding sephop ding mah thupi sak uh hi. Hau in a hat mahmah USA nangawnin vai khempeuh ah pawl le lawm loin amah kia tangtak nailo hi.

2013 kum gullu vai a kinak buai mahmah hun laitakin hih inntek Agape pawlpi ( kawlpi ) tawh kikop in mapanna lianpi khat kinei ngei hi. Tua hunlai a kibuaipih pen Gullu mual to ding maw to lo ding hi nailo in, Sen company in bang vante bangzah man la ding le mipi le kumpi in bangzah noptuampihna kingah ding cih dotna bek a kidong ahi hi. Company lam panin hih tawh kisai dawnkikna om loin kumpi tawh thukimna om sa hi ong cih san lel hi. Tua thu a kinang ahi hi.

Tua bang in ma i pan ciangin ei bek hi leng kuamah in ong thusim loding ahih manin minam tampi kipawlna tampi tawh kipangkhawm hi. Khat vai singgial ah khualzinna ding khat ong om a, mawtaw loin piang theilo ding ahih manin ci in Sia pa Sia Go Nang kiangah huhna kingenin Sia Sawmpu in Bus khat ong vaihawm sak hi. Tua bus ong vaihawm sak pen AMC ahih hangin a tuang pen minam kim kipawlna nam kim banah kawl Phonggy 6 bang kihel a, tua sungah Naythar ponggy pa nangawn kihel hi.

Cih nopna ah nasepna khat peuhpeuh ah a ciangciang pan mapanna dinkhopna a om ciang bek in I langte in ong zahtak in I thu a paithei pan ahi hi.

Mailam ah khangthakte in zong vaihawmna khat peuhpeuh ei kia bek ci tentan loin kim le pam, khut kilem I kalsuan theih ding thupi ding hi.

8) kidempih ding kua

Leitung pilna siamna khantohna tawh kisai a kigen ciangin a khangto sate mite gamte kipawlnate gamtatzia le mimal mahmah zong midangte nuntakziate tawh ki enkak , ki genteh in i gamta hi.

Tua hang mah hi ding hiam i minam sung i pawlpi sung i kipawlnate sungah a kisam ding zah sangin buaina gamlumna kitoknawina kisiatna tampi kinawk kha in a ki it mahmah u le nau khua le tui sung nangawn ah ut lo pipi in kikhenna kisiatna nangawn i sinsin kha hi.

Kuama delh lohpi in i taitai a, kua ma phawklohpi in heh in i kitawngtawng hi.

Ahi zongin mailam ah khangthakte in I kalsuanzia iI khelloh ong phamawh ding hi.

Khanthohna le i lungdamna pen midangte tungah kinga loin i kalsuan ding kisam hi. Vai khat peuhpeuh midang tawh kiteh loin ei le ei kitehkak ding cih thu hi lel hi. Gtn: zani sangin tuni ka hatzaw hiam, Nungkum sangin tu kum an ka hau zaw hiam. Nungkum le tukum sumpi koi tamzaw hiam cih lam hi sak zaw ding hi hang.

Hih bangin ei le ei ki enkak in hanciam thei lehang tu laitaka I buai pih mahmah thute kantanin mailam hun saupi ah lawhcinna tampi ngah toto zaw ding hi hang.

Thu khupna
Hih huh tomno sungah I kalsuanzia nam 8 tawh kumzalom 21 khangthakte in i kantanzia ding i kisung khin hi.

Hih lai ah ka tawpna dingin Pa Thang Do Khen in Fb a a lai at hat tawh kei hun a zo ta ong hi ning.

NA GUALZO NUAM HIAM?

1. Gualzawhna-ah tawldamna om hi.

2. A gualzo pen in Pasian ahi hi.

3. A gualzo pen tawh a omkhawmte a gualzo pente ahi hi.

4. A gualzo pen pa’ sep bangbang a thukim’pihte a mau zong a sem ahi hi.

5. A gualzo pen pa in na khempeuh nei ahihmanin, i galte zong ei tawh hong neih khop i hi hi.

6. A gualzo pen pa mitsuan ciat leng, i pawl, i gal cihbang i khen tuam thei kei tek lel ding hi.

7. A gualzo pen pa, ka pa hi, a cithei khempeuh unau khat ahi khin uh hi.

8. A gualzo pen pa i etleh i gualzo ding a, ei i ki-etleh in lung kia-in, mi i etleh i guallel ding hi.

9. A gualzo pen pa, i pa ahihleh, a gualzote-innkuan i hipah ding hi.

10. A gualzo pen pa’ tate i hihleh, neulai taleng i lungsim a vanglian veve ding hi.

“Pasian’ kiangah nai un. Tua bang na hih uhleh nomau kiangah a hong nai ding hi” (Jeim 4:8).

A tawpna taktak dingin

Tedim labu 388 na ” Topa tawh tonkhawm In” sa khawm ni. “Tonkhawmin hangtak mainawt in. Na tha hong khauhsak ding hi. Nisim in amah tawh pai in, na khualzinna lam hong pi ding hi. Lungdam, Lian Tuang