1. Pasian’ Gal Lianpen — Satan.
Pasian’ gal lianpen in Satan ahi hi. Pasian’ bawlsa na khempeuh a lumlet mangpa ahi hi.
2. Mihingte’ Gal Lianpen — Amah.
* Gal lak, sa laka omte thukhatin koih leng…
(1) Pumpi a’dingin hoih lo hi cih thei napi-in ka zang teitei-a, hong siasak kua dang hilo-in, keimah!
(2) Ka deih khat kangah nop manin lau pipi-in ka pumpi ka tah gawpa, hong man, hong hen, kua dang hilo-in, keimah!
(3) Ka ngim’ ka tup khat ngaklahin thasit lo-in ka dianga, hong khanteek sak kua dang hilo-in, keimah!
(4) Uplahna tawh tonton-a mailam ka nopsak nading a om gigete hong kipatpih ngam lo pen kua dang hilo-in, keimah!
(5) Nuntak tawntungna Vangam thute, gim tawntungna Hellkhuk thute, thei napi-a hong donpih nuam lo pen kua dang hilo-in, keimah!
Na pumpi na hehpih nop-leh:-
(1) Hoih lo cih thei napi-in thunthunin bak’bak’ lecin a thuak ding nangmah!
(2) Zo lo cih thei napi-in sawnsawnin suan’suan’ lecin a lel ding nangmah!
(3) Ki zongsang thei cih thei napi-in ciamciamin tahtah lecin a awk ding nangmah!
(4) Khantom thei cih thei napi-in utut-in ki zang lecin a si baih ding nangmah!
(5) Na na cih thei napi-in don kei lecin a zawngkhal ding nangmah!
Na Pumpi — Nangmah:-
(1) A cidam’ nadingin a vaihawm ding kua dang hilo, nangmah!
(2) A tawldam’ nadingin a vaihawm ding kua dang hilo, nangmah!
(3) A thahat nadingin a vaihawm ding kua dang hilo, nangmah!
(4) A khansau nadingin a vaihawm ding kua dang hilo, nangmah!
(5) Pasian a phat sak dingin kua dang hilo, nangmah!
3. Ganhingte’ Gal Lianpen —Mihing.
Ganhingte’ gal a kici sungah zawhngeu, sangak, sahangte kihel mah hi. Ahi zongin amaute pen a gilkial mahmah uh ciangin khatta bang a ne zel uh hi lel hi. Tua nangawn ai-san(thungen) photin, a kipiak ciangin a ne thei uh hi pan lai hi.
A gal lianpen mihingte ahihna:-
(1) A sa a nek ciang tawh lungkim lo-in, a ki, a vun, a sinkha, a guhte a deih man un, a om bangbang a zong thapai uh hi.
(2) Gal mat, sa mat, kidemna in ki nei in, nekkhop valval a ki sulum hi.
(3) Thangte kisiahin, gute kitah kibuakin, i-deihzah val, a kisai lopi dongin a ki sulum khin hi.
(4) Mihingte lobuang gam a kang sak thei dang om lo hi. Mihingte in gam i-kat sak ciangin, ganhing neu nono dongin bangzah i-sulum tam!
(5) Ganhingte in, “Pasian’ tate a muh kal dinguh ngaklah” (Rom 8:19) a cih mah bangin, gamsate in ei mihingte pen na khempeuh-ah thukhen a hih lam a thei gige uh hi. Tua ahihmanin sa dangte in a delh uh ciangin, mihing ahi-a, khua sung ahizongin, hong tuh thei uh hi. Tua bang hun ciangin hong muan’te muan i bang hiam?
Nih genni:-
KHAT…..Mizogam-a Pasian nasem masa pen, Pu Chawngkhup a zinna, gamsung a nawk laitakin, bilpi khat sahang in a delh a mu hi. Tua bilpi in Pu Chawngkhup a muh ciangin ama’ lam zuanin hong tai a, a khephungah a bok hi. Sahang in delh nawn lo-in a kileh kik hi. Pu Chawngkhup in hunkhat sung bilpi om’pih lai-in a gei khawng lopa pet ciauciau kici hi.
NIH……Mizo gam sung mahah sum thalawhin gamgiak mi nih in luigei-ah giahbuk a lam uh hi. Tua laitakin sano ham khat za uh a, nai tektekin luidung zui-in hong tai suk hi. Sakhi khat na hi-a, tua giahbuk-a mite a muh ciangin a kiang uh zuanin a khawl hi. Tua mite in a gen uh ciangin sakhi pen a nawi ki-ne lai khat hi-a, a no nei hi ding hi a ci uh hi. Tua sakhi in a belhte belhtak’ mah a sa ding hiam? A no a puksi ding hi.
*** Austria gam khuapi khat, etnop tuamtuam etna mun (ပြခန်း) khat, a kong tungah, “GANHINGTE’ GAL LIANPEN”cih lai ki suang hi. Tua sungah a lut peuhpeuh a nui sa in hong pusuak den uh hi. Bang hiding hiam ci-in, mite thalawpin a lut naunau uh hi. A sung tawngah Limlang lianpi khat na kitung hi. Bang dang kimu lo…Eimah! ***
Tdkhen
Comment piaknop aomleh...