Lungsim hoihte ading thupha om ~ Dong Mung

Lungsim hoihte ading thupha om ~ Dong Mung

Nitak lam khuamial ding kuan in America gam Philadelphia khuapi kuamah guah le huih kithuah in nakpi tak a zuu a nung hi. Tua laitak in kum 70 gual a pha puteek khat le piteek khat hotel neu khat kiang hong tung uh a, amaute pen guah le huih hangin kawt gawp uh hi. Guah tui kawt piippiap kawmin tua Hotel neu Counter lamah hong pai phei uh hi. Tua ciangin Counter a om kum 25 gual tangvalno pa kiangah zan a giah theih nadingun a ngen uh hi.

Tua tangvalno pa in hih khuapi ah thugenna pawipi mun thum ah om ahih manin hotel room khempeuh dim khin ahihna thu zahtakna le kamnem takin a gen hi. ‘Tua bang ahih takin mundang ah pai mai nung ei,’ ci-in Puteekpa in gen in paikhiat a sawm uh hi. Tua ciangin tangvalno pa in amaute tawmkha na khawl lai un a cih kawmin hibangin a gen hi.

“Pu le pi aw, a pualam ah huih lah nung, guah lah tam mahmah ahih manin lauhuai kha ding hi. Tua ahih manin ngaihsutna khat nei ing. Banghiam cih leh Hotel nunglam ah kei lupna room khat om hi. Hotel room danin bel nuam khol ken teh! Ahi zongin khualum sakna set zong om a, puanza zong om hi. Kei lah zintung a tam tawh tuzan ka room ah giak manlo ding ka hih manin giak mai un. Room sap piak kul lo hi,” ci-in a gen hi.

Puteekpa in, “Hicih lel o… Lungdam ei,” ci-in Hotel pan paikhiat a sawm hi. Ahih hangin a pualam ah guah le huih khauhpai mahmah lai hi. Tua bangin guah le huih a khauhpai mahmah laitak ahih manin tangvalno pa alung nuam thei mahmah lo ahih manin, ama room ah a giah nadingun a genpih hi. Tangvalno pa in lah naak genpih, guah le huih lah naak nasiat lua ahih manin a tawpna ah puteekpa le a zi zong tangvalno pa room ah a giak mai uh hi.

A zingsang ciangin puteekpa le a zi in tangvalno pa tungah a lungdamna thu uh koko kawmin Hotel pan paikhia dingin a kithawi ta uh hi. Kongkhak kiang a tun taktak ciangun Puteekpa in a gal panin Counter a om tangvalno pa kiangah, “Nang pen Hotel nasia mahmah khat ah Manager sem dingin kilawm hiteh! Ke’n nang adingin Hotel khat hong lamsak ning,” ci-in a gen hi. Tangvalno pa in, nuihmai kawmin a khut a lapsan hi.

Tua zawh kum nih khit ciangin tangvalno pa min tawh a Hotel vuah laikhak khat hong tung hi. Tua laikhak pen New York khuapi pan ahi hi. Tua laikhak pen a beisa kum nih lai a ama room a a giahsak Puteekte nupa tungpan ahihna thu zong a thei hi. Amaute nupa in New York khuapi ah a va hawh nadingin sapna a khakna thu uh zong a thei hi. Tua lai sungah New York akuan lam leh a ciah lam Vanleng Letmat ding nangawn a om pah hi.

Tua ciangin tangvalno pa in ama nasepna pan khuan ngen in New York Khuapi ah a va zin hi. Vanleng tual ah puteekpa’n a na dawn hi. Tua ciangin New York khuapi sungah a paipih hi. Mun khat a tun uh ciangin Puteekpa in Motor hawlpa kiangah motor a khawlsak nading a gen hi. Motor tung pan hong tuak khia uh a, tangvalno pa khut ah len kawmin a thak liklek leh inn nasia mahmah khat ah a pai pih hi.

Kongkhak kianga kisuang laigual a muh ciangin hih innpi in Hotel khat ahi, cih thu tangvalno pa in thei a, lamdang sakna le thupisakna tawh a en kawikawi hi. Tua zawh tawmkha khit ciangin Puteekpa in tangvalno pa liangko beeng kawm keuhkeuh in maitai takin hibang in gen a:

“Hih Hotel pen nang ma makaihna le ukna nuai ah om ding ka deih manin ka lam ahi hi. Ahi zongin inn lamna kum nih tak hong sawt kha mawk ei,” a ci hi.

Tangvalno pa in, “Pu aw… ahi theilo ding khawng mawk gen dah mai o,” a ci hi.

“Kong ciamnuihna sa na hiam? Ka taktak aive… Hibang in a lian a thupi Hotel pen nang dan a, itna, deihsakna, lainatna lungsim a nei mite bek ii ukna le makaihna khut sungah ka koih nuam hi,” ci-in Puteekpa in nui luahluah kawmin tangvalno pa kiangah a gen hi.

Tua Puteekpa min in William Waldorf Astor hi-a, mihau mahmah khat ahi hi. Tu-a i gen Hotel pen America gam sunga Hotel hoihpen, tam man pen le thupipen Waldorf Astoria Hotel ahi hi. Tua Hotel ah a masa penpen Manager a sempa in den a i gengen Hotel neu a zin muak, counter a nasem George Charles Boldt ahi hi.

Lungngaih Ding

• Lungsim hoihte ading na hoih om den hi.
• Lainatna neite ading thupha om gige hi.
• Neupen pan zong a lianpen kisuak thei lua ahi.
• Dinmun gina kei phial mah taleh lungsim gina peuhleh thupha om lel hi.
• Itna in itna mah hong ngahsak kik a, lainatna in lainatna mah hong ngahsak kik hi.
• Hehpih theihna lungtang in ei adinigin I gualzawhna kalpi khat na hi thei hi.

Lungdam, Dong Mung (January 15, 2019)