US Appeal Court in gambeel te aki lutsakloh nading dal

US Appeal Court in gambeel te aki lutsakloh nading dal

Feb. 5, 2017: Trump administration in US Department of Justice tungah Muslim gam sagih – Syria, Iran, Iraq, Yemen, Somalia, Libya leh Sudan gambeelte US gamah ni 90 sung lutsak lohna ding leh a hunciam om loin Syria gambeelte lutsak lohna dingin January 27 in a thupiak pen zan nitakin US appeal thukhenna innpi in dal hi. State of Washington sitni (judge) ten zong na dal khin zo hi. Ahih hangin Trump in hih Muslim gam sagihte panin gambeelte lutsak lohna ding thukham kikoih kik veve dinga, i gam bit theihna dingin gualzawhna kingah ding hi ci-in a Twitter ah tuangsak hi.

Trump in Iran, Iraq, Libya, Somalia, Sudan, Syria leh Yemen panin gambeelte tawl khat lutsak lohna ding pen Islamic terrorists (ngongtatte) panin US humbitna ding hi ci-in gen hi. Ahih hangin ama’ geelna langpang leh gensia ten bel hih bang geelna pen minam kideidantuamna hi ci uh hi.

State of Washington judge order leh US court of Appeal in Trump in gambeelte lutsak loh ding a dalna hangin gambeelte lutsak lohna ding thukham tawl khat sung dal zo dinga, hih gam sagih panin khualzinmi leh green card neite US ah tawl khat lut thei kik ding uh cihna suak hi. Ahih hangin thukham tawh kituakin lut thei in, om thei ding uh hiam cih kitel tuan lo hi. San Francisco a om 9th U.S. Circuit Court of Appeals leh State of Washington judge ten a thupiak uh Trump administration in nialna/selna a neih nop leh a hekna theihna dingin zasak uh hi.

#Behlapna: Trump in leitunga terrorist-te lupna lumte (hot-beds) Syria, Iran, Iraq, Yemen, Somalia, Libya leh Sudan panin gambeelte lut ding a dal pen minam kideidanna hilo hi cih theih veve kha ding hi. Ahih hangin hih thu pen thu buaihuaipi ahi hi.

More: Malaysia aom Rohingya Refugee te March khapan nasemthei tading

Hih gam sagihte pen Islamic terrorist kipatna bulpi hi takpi mah a, ahih hangin Islamic terrorist-te lut ding a dal nop taktak leh Islamic ngongttate sum leh galvan tawh huhna pia den Saudi Arabia, Qatar, United Arab Emirates leh adangdangte a lutsak loh zawk ding hoih zaw dingin lamethuai tham hi. Source: The Hindu/ Thang Khan Lian