Thupi lua ciai Pu aw! ~ Zomi Quavadis

Thupi lua ciai Pu aw! ~ Zomi Quavadis

Bai Fangli a kici puteekpa pen kum 74 pha khin hi. A neu tunga kipan bangmah nei lo ahihman in sang zong kah zo lo hi. Hong gol pian ciangin Tianjin khuapi sungah lut in khualak vaakte tuanna mihing leng akici lengpeinih neite kai in, tua tawh a innkuanpih teng vaak hi. Kum 74 hong phak ciangin gim lua mahmah tawl lua mahmah ta ahihman in nasep khawl a innlam ciah ding hong khentat ta hi. Tua pen 1987 kum ahihi.

Innlam a ciahna ah lamnawl a khua-ul sisan luanga naham sem kumcingh lo naupangte amuh ciangin a ngaihsut hong tam hi. Hih naupangte kei thuak bang a thuak ding uh phal keng, sangkah un hileh mipil misiam, gam leh minam makai, Pasian nasem mi thupi a suak thei vive uh hi. Mipi te kingakna leh gamlehlei mailam pen amaute hi lo maw cih thumaan hong mu khia hi. A khitui hong luang a, om thei nawn mahmah lo ahihman in a tuanna mawtaw khawlsak in Tianjin khuapi lam zuan in khe tawh kileh kik vingveng hi.

Tianjin khuapi a tun ciangin a sum kholsa mah zangh in mihing leng peinih neite khat lei hi. Meileng khawlmun ah nai 24 sung mi pua hi. Kuamah deih nawn loh puante silh in, a tawm man penpen anlehtui tawh kivaak hi. A sum muh khempeuh naupang sangkah zo lote huhna in zangh hi. 2001 kum in a sum kholsa khempeuh Sen sum 350,000 pen Tianjin YaoHua Middle School ah sangnaupangte zat dingin pia khia hi.

Sangnaupangte maiah thugen in “Naute aw tun kum 90 a cingh ding hi ta ingh. Nasem zo nawn mahmah lo ka hihman in ong huh zo nawn lo ding suak ingh” ci in kap ngeungeu hi. Hih puteekpa hangin naupang cimawh 300 val sangkah thei uh hi. 2005 kum Bai Fangli si hi. Asih in kum 97 bang pha hi. Francis Quavadis