Khakhat sungin OT nai 159 sungtak sem ahih manin sihlawh
Japanese Reporter numei khatin khakhat sungin Overtime (OT) bekbek akigawm in nai 159 sungtak sem ahih manin sihlawhliang cih AFP pan kiza hi. Hih numeinu pen nasep hun sawtlua in alungtang in thuaklah “Heart failure” tawh simawk ahih manin, Japan’s public broadcaster te’n anu apa te kiangah thuumna nei uh cihi.
Tua numeinu pen kum 31 aphakhin Miwa Sado akici khat hi a, NHK akici “Japan’s national public broadcasting organization” te kiangah Reporter asemkhat ahihi.
Hih numeinu ii asihpen July 2013 kumsung hi a, ahi zongin asihna athupen asihzawh kum 4 khitciang in NHK te’n mipi theihding in pulak khiapan uhhi. NHK Chairman ngiatin anu apa te kiangah nung Friday ni in vapai a, atanu sihna vaitawh kisai in anu apa tungah mawhmaina ngenta hi. Hihbangdan apiankik nawnloh nadingin kadalcip ding uhhi ci’nzong genkhia hi.
Miwa Sado pen 2013 kumsung Upper-house Vote hunlaitak in Tokyo khuapi sungah Political News akankawikawi in aom hi a, akhut sungah Mobile Phone humcipsa in siliuleu cimawk hi. Anu in agenkhiatna ah ka tanu asih madiak in Phone tawh kamkhatbeek hong hopihnuam khangelngel dinghiven maw ci’n khasia mahmah hi. Ka tanu asihzawh ka pumpi phellang hongki balkeksak tawh kibang a, kanui zongin lungsim taktak tawh kanuizo nawnkei cihi.
Kumpi thunei te’n hoihtak athu akancian ciangin hih Miwa Sado kici Reporter nu in khakha sungin tawlngak hun “Day Off” pen ni 2 bekbek ngah cimawk hi. Tuabang in OT nai 159 bang semin, gimlua tawllua in alungtang in thuakzolo in asihlawh ahihi.
Video: Japanese journalist Miwa Sado ‘dies from overwork’
Japan gamsung ah nasep gimluat tawlluatna hangin asi pen tammahmah hi. Tuabang in asi tamlua ahih manin, tuapen “karoshi” cih min kivawh a, nasepna hangin asi cihna ahihi.
Related: Japan gamsung misipuah kidemna kibawl in numei khatin akhatna ngah
NHK tepen Japan gamsung ah nasep hunsaulua “long-hours culture” pen hoih hetlo hi ci’n agenkhiakhia, Campaign abawlbawl Company khat ahihi. Tuabang in Company te’n nasem te hun saupipi asepsak pen agensiatsiat kawmkal ah amau Company sungpan in nasep hunsawtlua in sihlawh ahih manin, NHK te maizum mahmah uh cihi. Sawltak #zomidaily
Comment piaknop aomleh...