Tuni Zangkong Ahlone township a om Word of Faith pawlpi ah ka hunzat asim nuam azanuam a om khak leh ci’n hong hawmsawn ing. Paunak 29: 18 bulphuh hi in athulu “Vision” hi.
Proverbs 29:18 Where there is no vision, the people perish: but he that keepeth the law, happy is he.
သုတၱံက်မ္း ၂၉:၁၈
ဗ်ာဒိတ္ေတာ္မရွိလၽွင္၊ လူတို႔သည္ အက်ိဳးနည္း ျဖစ္ၾက၏။ တရားေတာ္ကို ေစာင့္ေသာသူမူကား မဂၤလာရွိ၏။
Ih Zolai ah acihnopna taktak dawk phakei in kei’ teldan ah acihnopna pen “Vision a om kei leh mihingte ki siacip hi. Pasian’ thukham azuite mi lungdam ahi hi” cih himai hi.
Vision Nam tuamtuam.
– Tangval/nungak khat in ama’ ai bek mah vision neimai khading hi
– Nupi/papi te’n innkuan khat ai vision nei ding hi
– Pastor te’n pawlpi khat ai vision nei ding hi.
– kawlgam zong tulaitak Than Shwe i vision tawh a kalsuan ahi hi. Than Shwe in kum 13 sung bang hoihtak ana gel a vision tawh tu’n kawlgam akalsuan ahi hi.
– Nidang in U Newin i vision tawh ki kalsuan ngei hi. Newin pen pil mahmah a ama’ vision bang a akibawl gam thukhun pen kum 14 bek kimang mawk hi.
– U Newin i ma a Thakhin Chan Htun leh Aung San te’ vision tawh 1947 kum a kibawl gam thukhun pen zong kum 14 bek mah kimang hi.
– Thakhin Chan Htun i gam thukhun bawl 1948 kum pan 1962 kum dong kum 14 sung bek kizangh. Newin i bawl pen 1974 kum pan 1988 kum dong kum 14 bek kizangh. U Than Shwe in 1994 kum pan 2007 kum dong kum 13 sung adeih bang a abawl gam thukhun pen 2011 kum pan tuni dong kizangh lai. Kum bang zah kizangh lai ding kithei nailo. Peelloh bel nikhat niteh kizangh nawnlo veve ding.
Mihingte’ bawltawm Vision pen kip zolo in sawt kimang zolo hi. Atang tunna ding in zong hanciam mahmah kul hi.
Vision taktak pen Pasian’ kiang pan a hong pai ahi hi.
– Noah in mualtung ah tembaw lam ding vision nei peuhmah lo hi. Pasian in Ama’ vision Noah tung ah aguan tak teh Noah in mualtung ah Tembaw lam hi. Mite in haisa mahmah uh hi. Ahun leh atha angalte pammaih sa mahmah uh hi. Ahi zong a tembaw lam zawh kum 120 teh tuiciin hong tung mawk a anuih sansan hai asa mahmah teng sicip siacip in Vision anei Noah te innkuan bek suakta hi.
– Joseph in Egypt gam ah Prime minister suah ding vision nei peuhmah lo hi. Pasian’ piak ahi hi.
– David in kumpi suah ding vision neilo hi. Amah gen loh apa in zong muang vetlo hi. Ahih hang Pasian in pia a kumpi suak hi.
– Moses akum 80 bang cing ta. Nisim tuu teng tawh buai den. Amah mahmah zong tuu nam philphel lel hi. “Kum 80 bang kiphata aih teh ka nuntakna hih ciang hita mailo dia. Tate beek ki khuasuah zo leh hoih ding hiven” ci khangel ding hi. Ahi zong nikhat Pasian in vision pia mawk hi. “Ka mite Egypt gam saltanna pan in na makaih khiat kul ding hi” ci hiau mawk hi. Amah zong kimuang hetlo hi. Ahi zong in Pasian’ piak vision tawh akiton in a nuntakna system sung ah application thak khat hong ki install hi.
Android Phone sung ah a omlo app khat Play Store pan download in install leng ih ut bangbang in ih zattheih mah bang in (gtn Zolai Siangtho) Moses’ system sung ah app thak khat hong ki install ahih man in tuusatna ding a abawl aciangkhut tawh San Tuipi satkham ziau hi. Tuusatna ciang khut tawh suangtum asat leh tui phuul mawk hi.
Tuni in na system sung ah app thak khat hong install ding pen Pasian’ kiang pan a hong pai Vision ahi hi. Tua vision in na khang hong ki lamdang sak ding hi. Kum tawm kum tam tawh kisailo hi. Tu mahmah in na Vision ding Pasian’ kiang ngen in. Hong hilh hamtang ding hi.
Pasian’ Hopihna Ngahngiat In.
Amen !
Lungdam
Mung Laan Thang
Comment piaknop aomleh...