Kawlgammi innteng nasem khat bawlsiatna hangin Singapore nupa’ kopkhat gilbem ah kikoih

Kawlgammi innteng nasem khat bawlsiatna hangin Singapore nupa’ kopkhat gilbem ah kikoih

March 19, 2019: Thukhente nangawn in a lipkhap gen mahmah uh, “Kibawlsiatna nam tuamtuamte sung pan a om ngei mengmeng lo a lipkhaphuai le cizekhuai “ a cih liang uh ahi Singapore gammi Chia Yun Ling leh apasal Tay Wee Kiat te nupa tungah kha 24 (kum 2) sung gilbem ah kulhbang zut ding leh a nasemnu uh tungah a kilawm kituak liausum pia ding in thu khenkhum uh hi.

Thusia tuamtuamte sung panin a suksia phadiak, thukhente nangawn in “The Worst of its Kind” a cih liang uh ahi kawlgam mi innteng nasep sem Moe Moe Than, kum 32 a bawlsia nupa te pen abeisa kum 2 lai in zong amah banga innteng nasep asepsak numei dang khat vuagawp, suigawp bek thamlo in a pheituam sungten nangawn tawh inn a nawtsak manun thukhenna a thuak ngei zo uh ahi hi.

Tua bang mah in Moe Moe Than, 32, zong nisim in ann nek ding khamkhop pia lo uh a, kisil buk leh dailen buk nangawn a zatnop bangin zatding phallo ban pan in, hibang bawlsianate innlamte kiang a tut peuhmah leh kawlgam a om a innkuanpihte thah ding in a vauna thu uh thukhenzum ciaptehna laibu sungah tuang hi.

District Thukhen mangpi Olivia Low in zani-in hih kum 47 a upa Chia Yun Ling le Tay Wee Kiat, IT Manager a semngei khat zong ahi, apasal pen kha 24 sung gilbem bangzut ding leh siatvatna sum pia ding in thutankhum hi.

Hih bang thu a pianna pen kum 2012 kum in Moe Moe Than, 32, innteng nasep sem ding in amau kiang kum khat dektak a om sung thupiang hi a, 20 vei sanga tamzaw mawhsakna thu kiciamteh hi.

Hih thu tawh kisai in nupate in a innteng nasemnu uh Moe Moe pumpi tung leh lungsim ngaihsutna limtak gelkhawlhna tawh bawlsia in gawtuh a, nisim hunsim in omkhawngsak lo uh hi ci-in sitnipa in zong gen hi.

More: Singapore ah innteknu athatlum Myanmar innteng Zin Mar Nwe pen sihdan kipia theiding

Hih mawhsakna thu te lakpan in munkhat ah, Hun khat lai in Vanzuak nasep semin manager dinmun a len ngei Chia kiangah a nasemnu in ann khamlo ahih lam a zaksak ciangin, huham takin ann leh cikhum pawisak in a kamsungah Kadawh “Funnel” zangin sungsuk a, tua kadawh in a dang tawng sun ahih manin a nasem nu awk in ekbuk sung tumin a luak teh saphuklai dawh ding in sawla, a sawl bangin a dawh hi. Tua bang in luakhia ding in a pailai tak in a nasemnu va zui-in a taigawp bek thamlo in beng gawp a, tua saphuklai sunga a kholkhop a luaksate nesak kik hi cih ngawhna zong kibehlap lai hi. Courtesy: The Sun On Tuesday, March 19, 2019 Page 8 Translated by: Zonu’pa