Zomi leh Tedim – Koi masak ding? ~ Pau Khat Suan

Zomi leh Tedim – Koi masak ding? ~ Pau Khat Suan

Tedim mi pen Zomi hi a, Zomi pen Tedim mi hi. Zopau common language pen Tedim pau hi a, Tedim pau i cih pen Zopau hi….

Tedim i cih pen Zomi khempeuh in i neihkhop hi a, Tedim pau i cih pen i pautaang Zopau hipah hi. Minamke leh pauke namkim kikaihkhopna, thugenna, vaihawmna khempeuh ah i taangpau i zat ding ahi hi….

I cihtheih mateng Zomi sung ah kipumkhatna om ngeilo ding a, ma pankhop theihna zong om ngeilo ding hi.

I sanggam dangte ei’n Falamte, Khalkhate, Matute, Mindatte.. etc cihbang a i theih ziau, i genziau mahbang a Tedimte ci a ong kithei Zomi namke ( Sihzang, Teizang, Dim, Khuano, Vangteh, Phaileng, Losau, Zo, Saizang, …. etc etc ) i hihlam thei gega a nial teitei pong pen…… (aban na ngaihsun in. Ke’n ong gensuak le’ng kha asa lua omkha inteh..)

A taktak in hih mite bangci bang a khangto, nuamsa, madawk thei ding cihpen makaite’ nasep masuan ah hih mite bangci bang a kithei, kilo cih sang azah tul sawm tampi in thupi zaw thamtham hi.

I masak ding leh i thupi ngaihsut zawk ding teelsiam huai mahmah hi.

Nanghang a midang namdangte’ lak ah Zomi a minpha a ong kithei ding na ut leh…

• apil in minthang in!
• ahau in minthang in!
• asiam in minthang in!
• a muanhuai in minthang in!

Tua i hihzawh kei leh ( 99/100 hih a tung a i gente dan hi zolo hihang, incl. me )… mindaisak kei beek ni!

Ei’n i khenkhen hang midangte’n ong khen hetkei. Amau’ ana kikhenkhen uh ahi phial zong in e’n zong khen hiau khang. Gtn… Falam leh Laizo, Khalkha leh Lai,…. etc… nak khenloh hive hang. Tua genloh Mizo leh Lusei nangawn khen kei lai hang.

I masak ding leh i thupi ngaihsut ding mah masak in thupi ngaihsut leng adangte ei’ tangko kul lua mahmah khollo lel ding hi.

(At beh kik…)

Hih kagen thu pen Kawlgam tan 10 zo in university kah a, Zomi Siamsin activities leh ခ.စ.ယ khawng ah a kihelte, minam vai khawng a buaipih a politics a uukte’ ading in telnop mahmah ding hi.

Kawlgam University kah ngeilote ading in telhak pian khathei ding a, university akah hang sangnaupang hun a Zomi Siamsin activities leh ခ.စ.ယ khawng ah a kihel ngeilote ading in telhak kha ding hi.

University kahngei napi hihthu telhak asak leh sangnaupang hun a milak kihel lo, minam vai leh politics kinlo, politics ah mimal meetna lam-en a a khuanung buaipih saan hiding hi. Uukna leh veina sang angsung lam-etna masuan buaina hizaw ding hi. Pau Khat Suan