Kawlgammi innteeng khat Singapore ah bawlsiat thuak

Kawlgammi innteeng khat Singapore ah bawlsiat thuak

Anhuanbuk sungah kuangteng asawp laitak niangtuihai khat aki tapsakkhak bekbek hilel hi. Ahi zongin athuduh mahmah innteeknu Zinnerah Abdul Majeed in amuhciang in ki hehsakgawp a, asa vitvit sikkeu khattawh akhutteng depsakgawp cihi. Tuapen nungkum August khasung ahihi. Atung alim pen innteeknu ahihi.

Innteeng nasemnu pen Kawlgammi hi a, amin May Thu Phyo ahihi. Kum 23 bek phapan hi. Hihte inn ah nasep akipatzawh khakhat khawngbek hipan a, tuahun akipan bawlsiat thuaktopah ciatciat hi.

Tuabangciang bektawh phasak hetlo in innteeknu in nasemnu tungah agamtat siatna tampitak zanni in District Court panin ki zakbehlai hi. Guapum tawh asat hun om in, kawnggaklu tawh azep hunlah omzel, setbing tawhkalhna “Bicycle Lock” tawh avik hunzong om cimawk hi. Tuabang tengtawh liamma zong tampitak apumpi tungah ngahlawh hi.

Athuak hamsapen leh akhasiat huaipen ahihleh innteeknu in sikkeu asa mahmah khattawh nasemnu ii amautang depsak mawk hi. Tuazong ahangpen thupi hetlo hi.

Innteekpa in a annek khamval nasemnu kiangah ne in acihpen nasemnu zong gilkialsimsim hiding hiven anekleh innteeknu in aguknek in ngawhbawl in daan apiakna in sikkeusa tawh adep ahihi.

Zanni thukhenzum ah hih innteeknu pen kha 20 sung thongkiading in thukhenmang te’n thupiata uhhi.

Bawlsiatna tamthuaklua mahmah ahih manin nasemnu zong thuakzonawn mahmahlo in nungkum September 04 ni in anasepna pan taisim hi. Khuasungmi khatin hih nasemnu amuh ciangin bawlsiat thuak hiding cih thei a, palik te zasak in tuapan in innteeknu bawlsiatna aki theikhia hipan talawmlawm hi.

Hibangdan bawlsiat athuak simsim tampi omkhalai dinghi. ZD Sawltak #zomidaily