Kawlgam Politics zingno khat pan-in Zomite ~ Zokhai

Kawlgam Politics zingno khat pan-in Zomite ~ Zokhai

Laisim Sanggam Ngaihteng, 2015 Kum ahong bei peetmahding hita: Pasian upna-lah kilamdang tuanlo, thaksuakna leh nosuahna-lah om tuanlo: Ki-ukna leh suahtaakna lamsang phalammanawh kikheelna-lah tuciangciang kimu naailo: 2016 Kum’ ading phalammanawh kikheelna ding-a lamet tampi’ lak-ah nengcik khat kumbei ma-in enpak lehang…

Tulel-a Kawlgam Gamukpawl (Myanmar Government) te-in Kawlgam milip buppi naupang kimawlpih ahihkeileh teengta kineihpih bang-in maaizum lohial tak-in hong kimawlpihna: Lpd ~ Gamukpawl mite’ pension sehgiapna (ahithei thu-tawh akisut hang-in kum 5 bekbek aseem uliante-in atuulza-asim pension ngahding, kum tampi saangsia, zato siahuan, pyadaa, cbt-a kipan khanhuh langdeeng phialphial aseemte’ ading-e….)

Thukhunpi-ah, “Aseem khinsate nungsuul zuuikiik loding, khialhna omsate’ tung-ah panlaakna phuangkiik loding” ci-a maaizumlo tak-a behlap giapna (Lpd: U Than Shwe’ khut-ah meelmawl mi atuul-asim akithat, akikhihcip, akikhumcip mite’ nuntaakna alaainatpih mi-thukhual tampi hong om peelmawhding cile’ng…..)

Thuneihna kipiakkhiat ma-in Kawlgam buppi’ gamh ahi leisung sumpiangte Seente’ khut-ah manmawh tak-a aluut zangzangna (Lpd: Phakant suangmanpha tawhna pan-in asuang-tawh aleitang mahmah-tawh dump-truck lianpipi-tawh Seengam-ah anawn-a kinawn ziahziah., U Thei Sein-in, “aw, aw, kikum mahni” cih-tawh ahun uai toto cbt,…..)

Hihte ngaihsun lehang Kawlgam Kiukna limcitak leh piicing tak-a thuneihna kipiakkhiatna hongpiang takpi dinghiam, ahihkeileh hongpiang henla, mipi’ sosaanna (phulaakna) hong kipanleh Gaalkaap-in gamdang kihtaakna leh zahtaakna-tawh lungduai tak-in athuak keeikaai dinghiam cih thute gamdangtung Kawlgam level politicians (non-Zomi) te’ kamkumna-ah aginsaan laaitak thu-khat ahihi. Tua hunsung mah-in U Khin Hngunt’ mite-in DASSK’ NLD-tawh luankhop nading avaaihawm hunsung-in U Than Shwe’ mite nana manlaang zaw-in nana kimuhpih vat uh-a, U Than Shwe nangawn-tawh kimu cihthute-in Kawlgam Politics’ Uncertainty guipi khat-hi ci-in ki-ummawh laaitak-hi.

Tua hun sung-in Leitung leinuai kipawlna adiak-in kiukna lamsang leh singnuaimi kipawlna tuamtuamte’ geelnate amunmun-ah asimtham pianpian leh khenkhat akilanghtang-in phuul litlit-a, Zomite ahihleh Pu Cin Sian Thang’ ziak bekbek-in I-lungmuang uhhi. Pu Cin Sian Thang mimal lian-in ahihleh Kawlgam level politician leh democracy’ ading Ngalliam khat hi-a naakpi-in khamuanhuai mahmah-hi. Anungthuap ding leh khut kiletpihding kipawlna dang-ah kizopna cilehang NLD-mah hi-a, amimal-in DASSK leh Khun Tun Oo te-nih khawngbek ahihi.

Tribal Affairs lian-ah DASSK, Pu Cin Sian Thang leh Khun Thun Oo lobuang amuanhuai leh ahihtheihna ciang-tawh amapang theiding midang a-omlo cihtheih ahihi. Tua sung-ah, DASSK-pen biaknalam leh social lam-ah flexible (amahle-amah kici ngiat) khat hi-a, flexible cihciang-in hi kawikawi-thei cihna hi-in, ahoihlam-ah hoih-a, asialam-ah sia-hi. Ama’ tung bek-ah Zogam vaai kingak-theih omlo cihna ahihi. Khun Tun Oo-pen Shanmi hi-in Khun (Shannampi) hi-a, biakna lam-ah a flexible phial zong-in Kawl-tawh biakna-khat ahihi. Pu Cin Sian Thang-pen biakna lam-ah Khazihmi hi-a, amah anungthuap zoding Khazihmi adang Kawlgam level-ah om nawnlo laaitak phot-hi.

Kaalhelh pak-ah, Kachin leh Wa bangpen Gam phutding-mah amuiituum-uh hi-a, Kawlgam Kiukna sung-ah kigolh khollo-in, hunlem zil-in Gamukte-tawh seemkhawm pakzal zeel-hi (Lpd – Bengh-tawh sumsinna-ah SPDC leh Wa., Leisungsumpiang-tawh sumsinna-ah USDP leh Kachin cbt). Zomi ahihleh athu-in “Gam” cihcihsaam hang-in State cihthadah district nangawn Gamukte’ tung-ah akiphuul/akiphu thei naailo tadih suakphot laai-hi. Lametna leh aw-bel saang-in lian mahmah-hi. Ahizong-in 2016 March (thuneihna kipiakkhiat hun ding-a kiseh phot) masiah bangmah sep theihloh, phuut theihloh bang-in kiseh ahihman-in thunengnengte-tawh kimanlah phot hihtuak-hi.

Nang leh kei-in “denciang, ziingciang, maaikha, maaikum” aci-theibek hihang-a, anei I-hi kei-hi. Anei Pa Pasian-bek ahihi. Kha 3 sung genloh tuzaan kaal-in Pasian-in Ama’ uut bangbang piangsak thei-hi cih phawk hilehang nang leh kei’ kiphatsakna, kiliatsakna, midangte elna, midangte paampaihna, midangte nawlkhiinna cihte aseem ngam veve-ding zah-a ahai I-omkei dinghi. ZEISU-in, “mi khat-in leitung vaangliatna khempeuh ngah henla, zaankhatthu-in sileh akimanna omkei,” acih thu limtak-in ngaisung lehang Zomite kitot kiseel, ki-el, kigaalbawl zawzeen nading bangmah omlo, om ngeilo-in ka-sehhi.

Zomi-pen Kawlgam Kiukna nuai-ah om-a, tua Kawlgam Kiukna-pen aliing lengleng khuam, ahuang diaidiai pumpeeng-tawh kisuun-hi. Zomi namnam zil-a khantoh nading (Health, Social, Spiritual, Educational Development etc)-in ahuang diaidiai pumpeeng’ sang-in nang leh kei’ tung-ah kinga zawtham-hi. Kawlmaang’ thu akpi-in phiatnelh thei zeel-a, ziingciang avomding leh akaangding kithei lo-hi.

Akaang khinsa nangawn mitphiat kaal-in vomziau theizeel I-tuak khitsa ahihi. Zomi ahihleh “Ngal hapaaksa tumkiik lo” hi-a, eimahleh-eimah kinungthuap-in, kipua, kikawi khawm-in kinehtak-a mapanna lo-tawh mual kisuak peuhmah loding-hi. Lawite ahon-in akithuah ciang-in anote alaai uh-a koih-in, apii atal teng-in akiim-ah apualam maaingat diimdiam-a a-om ciang-in huumpi sahaang te-in atate neeksak zolo-hi.

Zomi kinehtak-in mapang khawm-in minam pualam encik ciat lehang Zovontawi meelmawlte huumpi sahaangte-in hong neeksak zolo dinghi. Alangkhat-ah, minam sunglam bekbek-ah tualbial-in, ningzu aisa-tawh I-tualbial peuhmahleh huumpi sahaangte-in I’ vondeihte hong neeksak dinghi. Tua neekna thuakna-pen sih’ sang-in siahuai zawtham ding-a, gú akizuut ling-in lungtang hong dawt zakzak bang-in khang tampi kithuak dinghi. Tua ahihman-in, akimu kholthei thuakna siahuaipi hong tunloh nading-in khuadaak khia-in I’ vondeihte huu-in humding hihang! Zomi Pasian’ Thupha! Zokhai (60 Narr-Maen Drive, Croydon Hills VIC 3136, Melbourne, AU)