Hehpihna tawh khatvei ong post kik nuam ing ~ Cing Van Kim

Hehpihna tawh khatvei ong post kik nuam ing ~ Lia Cing Van Kim

Tedim le Kawlpi ah COVID tawh hong nusia tam tektek ta banah zato lah kizuan theilo ahih manin, Biakna kipawlna/Biakinn khempeuh in Oxygen concentrator/Oxygen cylinder kigin kholh huai mahmah ta hi. Oxygen cylinder bel thun kul zeel ding ahih manin meiset tawh kizom thei Oxygen concentrator 10 L/5L te peuhmah neih huai hi. (Edited: Tu-in ahihleh Covid kisit ding bek thamlo, zato zong zatding kivaihawm ahih manin i lungdam hi.)

Pawlpi mite lam pan zong ahih theih liai leh a hun a kiteel thei mipi a kikaikhawm sak i vai tuamtuam te khawlbawl/khiinto phot in i biakna makaite i telsiam ding thupi ding hi. I sap tentan teh aanaa/lung noploh na tawh hong kithawi thei uh hi. Tua ahih manin amau te zong telsiam ding hanciam ni.

Deihloh pen i tuahkhak leh zong i tuah bangbang thute le a hang (reason) te siangtak in pulak lel ni. Tua pen maizum huai hilo a, hong it hong ngai hong pha/hong phaak sawm mi khempeuh a kidop theih nading amau i khualna ahi hi.

Tua banah pawlpi siate in nopna dahna ah, a diakin sihvuina ah mawhpuak kipeel theilo ahih manin surgical mask ciang bek ahilo, level 2 PPE ciang peuhmah silh zo leh ka lunggulh mahmah hi. A zenzen in COVID natna tawh hong nusia a omleh, “natna gil neilo a thahat sia KHAT” in hoihtak kituam-in vuina bawl buai hi. Tua puante zong pen a inntekte le a vaisai te mah in pilvaang takin i geelsak/ i kigin ding zong lunggulh huai mahmah hi.

More: Natveh/ Siatvat khawlbawl phot ni ~ Lia Cing Van Kim

A pai tentan mipi a omleh zong kineh sesu lo-in mask thuah kinken huai hi. Mikim in handgel tawh khut sawp PAHPAH huai hi. Tua banah natna kilawhna tha a pia thei sum tawh kigalna te ah zong a sang thusa te in mask le faceshield, khuttuam cihte thuahsa-in san huai hi.

Hithei leh bang mobile banking cih bangin Online pan sum piak theihna digital payment te zat huai hi. Meltheih naihuai te in zong misiluang lawnna a kipan natna kilawh sak thei i ngeina te i kideek phot ding kisam ding hi. (I biakna makai tampi in hong mualliam san khin uh ahih manin lungnop lohna tawh a kigelh ahi hi.) Lia Cing Van Kim