Yangon thuthang: inn kicim, hotel meikang, gamdangsum tawh kiman

Yangon khuasung ah innkhat kicim

Myanmar, Yangon khuasung aom miteenna taihinn khat kicim cih Yangon Police te tungtawn in kiza hi. Tuni September 17, sun 12:50pm hunpawl in Yangon, Botataung Township, 55 Street aom Apartment innkhat akicimsuk ahihi.

Hih buaina thupiang Incident akizak ciangin Botataung Township Police te’nzong delhpah uhhi. Inn dawltunglam te anhuanbuk akiasuk hi a, sual akibawl Concrete te luilua mahmahta, akum beita ahih manin, akicimsuk hihtuak mawk hi. Hih innkicim hangin asi aliam kuamah omlo cibilbel hi.

Yangon ah Hotel khat meikang

Yangon International Airport, Terminal 2 mailian ah aom Hotel khat tuzingsang 08:45am hunpawl in meikang cihi. Tua Hotel sungaom suangmanpha, vanmanpha zuakna Jewellery Shop sungpan Electric Short Circiut hangin meikuang akipan ci a, Hotel ii atunglamteng kuangto cihi.

Hih meikat akizak ciangin Fire Engine 3 tawh kidelhpah in, 08:55am hunin meikuang ki phelhsiangzopah hi. Meikatna akipatzia athu ala leh meikatna hangin bangteng bangzah supna piang cihte thunei te’n kansan uh cih kiza hi.

Kawlgam ah gamdangsum hangin akiman omzeuhzeuh

Yangon International Airport, Terminal 1 ah zanni September 16 ni in Kawlgammi khat gamdangsum tawh kiman cihi. Tuapa pen Thai Lion Airlines tawh Thailand zuanding in alenkhiatsawm hi a, X-Ray Screening akibawl ciangin avanlak ah India Rupee leh Thai Baht sumhonkhat ki mukhia hi.

Tua akiman sumte pen India Rupee teng 520 leh Thai Baht 14,000 tak ahihi. Kawlgam sumin akituat ciangin Rupee tengpen Ks. 109,200,000 tawh kikimding ci a, Thai Baht tengpen Ks.546,000 tawh kikimding cihi.

Kawlgambup ah gamdangsum tawh kisai in septheihna Licence ihneikeileh bangzah bangzah ihpua zongin hongki manthei ahihi. Adiakdiak in gamdangpan Kawlgam aciah te’n theihhuai, kidop huai hi.

More: Yangon aom “The Iron Rose” Journal Editor athatpa ki theita, zi angkawm vaihang akithat nahizaw

Hih thuthang tawh kizom in, gamkhatpan adang gamkhat ah vanlengtawh nazin ciangin sumtang (cash) bangzah kipuathei cihzong kanmasak huaihi. Gamdang te’n sumtang (cash) in tampipi puavakvaklo uh a, Credit Card leh Debit Card cihte zangzaw uhhi. Tua ahih manin, vanleng tungah sum Currency pen atampen bangzahciang puathei, aki ciangtanzah sangin atamzaw napuakleh pulakkhiat kul “Declaration of Currency” in buaihuaituam hi. Sawltak #zomidaily