Kipumkhatna (Oneness) ~ Pu Zokhai

“Kipumkhat” cihciang-in lian akisazaw, hau akisazaw, pil akizasaw mi khat ahihkeileh kipawlna/pawlpi khat’ cihbangbang manna, zuihna, “he, hi, aw” cih kalsuanna kisa kha ahihman-in kipumkhatna leh I’ minam kigamla seemseem-hi.

“Kipumkhat” cih kammal-pen minam khantoh nading thugen lasakna peuh-ah kipaksak mahmah-a, akhiatna “Definition” taktak akitheihloh man ahihi. Minam Hunlehmual (Context)-ah akizangh theilo kammal hi-a, nupa nangawn a-kipumkhat nading baihlo-hi.

“Kipumkhatna” atun ma-a kahlei cial tampi (many steps to oneness) te apaizia thei, saang, um, zuui… tuateh kipumkhatna lam aki-manawh hipan dinghi. Tua kahlei cial tampite’ lak-ah themcilik khat ensuk khawmding hihang:

Kopsepna (Partnership)

Kopsepna kammal thak hi-a, masuan khat-ah mi/pawl nih’ sang-a atamzaw pangkhawm cihthu genna ahihi. Kopsepna paizia sung nangawn-ah:

• Strategic Partnership
• General Partnership
• Private Partnership
• Limited Partnership
• Civil Partnership
• Joint Partnership

cihbang-in anamnam aciicii-in kikhen diimdiam laai-hi. Hihpen nasepkhop paizai khat hipan-a, masuan adiak-in sumsinna leh sumbawlna (Economics & Business) lam-ah company tuamtuamte ahihkeileh kipawlna tuamtuamte’ kizopna guipi khat ahihi.

Hih Kopsepna bekbek nangawn-ah pawllim (group) zuui-a kopsep ahihleh pawllim nih ahihkeileh nih tungsiah kikopkhawm hi-a, amau’ pawllim ciat-ah lamkhun (policy) kician aneih baan-ah gentehna-in: Pawllim 3 kipawl-a kopsepna ahihleh tua 3 te-in azatkhawm ding-uh lamkhun (policy) geelkhawm-in gelhkhawm uh-a, kipsak-in zuui-khawm uhhi. Amau’ aituam lamkhunte ahihleh amau’ sung bek-ah zangh uh-a, amau’ pawllim (group) pualam-ah kizangh theilo-hi.

Kihualna (Harmony)

Kihual (Harmonious) cihciang-in atelnop penpen ding-in: La akisak ciang-in mimal kimciat-in amau’ zuihna ciatciat kician tak-in hong sakkim-uh ciang-in zaaknop mahmah-a, tua-pen “La-aw Kihual” kici-hi. Apaisuak bekbek kiza buabua ahihkeileh a-alto bekbek kiza nguaunguau, ahihkeileh a-tenor bekbek kiza cuacua, a-bass bekbek luum dumdum cihbang hileh la kihuallo, zaaknop lo-hi.

Tualleenphung milip kalsuanzia-zong tuabang teekteekmah ahihi. Khamtheih, thauvuui thautang cbt-tawh sumbawl-a ahau khat-in biakna makaai hong sepnop ciang-in; mi-kheem thapaai, polhteh paktat khat-in makaai upa hong sepnop takciang-in; mi haza-a mi-lehheek akiva mahmah khat-in upa makaai hong sepnop ciang-in; sitni seem-a sum tampia zawzaw thu azosak niloh ahihkeileh zudawn muiciai-a ciak lualua niloh khat-in makaai upa hong sepnop takciang-in hihte khempeuh kihualna asusia guù khauhpente ahihi.

Kihualna-pen mimal kimciat leh kipawlna/pawlpi kimciat-in amau’ mapanna adiak-in tualsung phatuam sak-thei masuan ciat-ah kiciantak leh muanhuai tak-a mapan diimdiamna hipipen-a, amau’ kipawlna-a kihellote’ ngeina leh lamkhunte sukkhaak saklo-in zahtaak siam-a, amau’ pawlhuang pualam-a mite-tawh akilawm kizopna-tawh amau’ lampi ciat-ah thahaatna hipipen-hi. Athahaat kipawlna khat-in athaneem kipawlna khat nuaisiat, paaipaih cihte om hetlo-in, amau’ thahaatna-bang ciatciat-ah maainawt cihna-hi.

Zomite’ lelhtaak penpen-in: athahaatzaw-a kiseh kipawlna-in athaneemzaw-a aseh kipawlna enneu sese, ciamnuih alsawhna-a zangh sese, nengniam, tuambawl, paampaih, nuaisiat sese-a, tua-in minam or tualsung-a tualleenphung dammawhna meima-lungno khauhpente suak pahpah uhhi. Tuapi-mah “Kipumkhatna”-peuh cici-laai uhhi. Kihualna nangawn mualmong et banglaai ahihleh kipumkhatna peuhmah Vaan Kumpigam tungvek phialmahle-uh om ngeilo-in Pasian’ kiang-ah kikhiakhia laaiding uhhi *:) happy*:) happy*:) happy

Kigawmkhopna (Unity)

Unity-pen Zomi ataangpi-in “Kipumkhatna (Oneness)” sa-kha uhhi. Kammal mahmah-ah aki-cilgilloh, aki-ngentelloh, aki-kuhkalloh manmah-in uutpeuh-a aciakciak kitamzaw-hi. Unity-pen “Kipumkhatna” hilo-in “Kigawmkhopna” ahihi.

Kigawmkhawm/gawmkhop (United) cihciang-in “gawmkhawm” cih nungsang akibanglo, atuamdang sil/thu tampi gawmkhawm cihna ahihi. United Nations cihciang-in “Gamzilnamcin Gawmkhop” ahihkeileh “Akigawmkhawm Namcinte” cihna ahihi. Nang leh kei-in I’ gawmkhoptheih bangteng omhiam? Hihthu-in kigawmkhop nading azangno (trigger) ahihi.

United Nations (Akigawmkhawm Namcinte)-in tua “kigawmkhopna”-ah bangteng gawmkhawm-uh, bangteng mimal vaai (individual issue)-a koih-uh, koici bang-a kigii khung-uh, cihte Zomi taangpi-in I-theihloh man-in “Unity”-pen “Kipumkhatna” asa-uh ahihi. Gawmkhop Kipawlna (United Organisation) limlim-ah “Bangteng gawm-a, bangteng privacy-a kikoih” cihthu leh “Kigii Koicibang-a Kikhung” cihthu 2-te naakpi-in theihding akisam ahihi.

Bangteng Gawmkhawm Theiding

Pawllim (group) tuamtuamte akigawmkhop theih nading-in tua pawllim khatciat’ ngiimna leh tupna (aim & objective) te’ lak-ah aguipi: gentehna-in, “Zomi…..” minpua kipawlna ahihleh amau’ mungtup lianpen “Zomi Minam Buppi Phatuam sakding Masuan khatteeiteei-ah pangding” cih hi-limlimding ahihman-in hihbang ngiimna leh tupna anei pawllim or kipawlna (group or organisation or association) nih leh thum-in mapanna-ah pankhop theih honkhat nei cihna hipah-hi.

Kigii Khunna (Setting Boundary)

Pawllim (Group) tuamtuamte akigawmkhop nading-in akigawm khawmding pawllim or kipawlna (group or organisation) te-in kigii akhun siamding naakpi-in thupi-hi. Alianzaw leh aneuzaw vaai-tawh kipawl hilo ahihman-in satanh-zong kikim ding-a, kalloh (limit) neihding, Y pawllim-in X pawllim’ sungthu va-sawk theihloh, va-kigolh theihloh cihte ciangtan kician nei-a kigawmkhop theihding athupi mahmah ahihi, banghanghiam cihleh “kalloh leh kigii” omlo pawllim or kipawlna-pen sawtlo-in kiimlehpaam-in vuknelh dinghi.

Aituamsungthu (Privacy)

Aituamsungthu-pen Zomite diakdiak-in kithei ngeilo-in minam kalsuanna leh biakna kipawlna kalsuanna khempeuh-ah kizangh hetlo ahihman-in kigawmkhop nading aliim avaang om ding-in kithawi panleh kisia kiik pahpah dinmun-ah a-om ahihi. Gentehna-in, Tuiphuum leh RC kigawmkhop nading hualpi-ah, Tuiphuumte-in Mary limte leh vaaite RC te-in anusiatding va-kal tantanleh, RC te-inzong Tuiphuum biakinnte-ah Mary lim leh vaaite va-luutpih tantanleh hih pawl-nihte kigawmkhawm ngeilo dinghi.

Gawmkhop ding-a kilawmteng kigawmkhawm ding-a, aituamsungthu teng ahihleh aituam-ah akikoih/akikep/akizuih siamding naakpi-in thupi-hi. Aituamsungthu-pen mimal vaai nangawn-ah akhangkhin gamliante diakdiak bang-ahpen naakpi-in kithupi sak-a, “mi-khat’ aituamsungthu leh nang akisailo” cihthu kithupi sak-hi. Aituamsungthu sunna/pulaakna ami atuam-in mimal ciat-in teel-a, “Muanna leh maaingaapna leh itna” tung-ah kinga-hi.

Zomi sung-ah “Taangpi vaai leh aituam vaai” akitelloh man-in makaai upate-khawng bullehbaal omlo, aituamsungthu peuh-tawh gensia zaanzaan, khat-in nana pumgup ahihciang-a kinial, aituam thute hong phulaam nianua, atawpna-ah aki-zuakzuak kisuak-in “Critique” suak zolo, kitotna-peuh suakden-hi. Tua-tawh ton-in “Critique Kiciantak-a akibawl” te-zong aituam vaai-in mipi-in la/seh pahpah-uh ahihman-in “Makaai gensia, makaai hawmthawh…” cih-a kipan alum-alet kammalte-in lampi khaakcip pahpah-hi, hihte-pen “Aituamvaai leh Taangpi-vaai” akitheih hetlohman ahihi.

Kigawmkhawm ding cihciang-in ka’ aituamvaai khempeuh, na’ aituamvaai khempeuh kong’ ken, nong’ ken kuullo-a, na’ aituamvaai khempeuh kong’ theih kuullo-in, kei’ aituamvaai khempeuh-zong nong’ theih kuullo-hi. Akituak I’ lungtup guipi: gentehna-in “Social Revolution” ahihtuakleh hih Social Revolution alawhcin theih nading I’ septheih omsunte I-gawmkhop ziauding ahihi. “Na’ zii’ thu manglua veteh-aw,” kong cihcih akuul ahihloh mahbang-in, “Laigelh kinlua veteh-aw,” nong’ cihcih-zong kuullo-hi. Eite-nih’ hihtheihna-tuak ki-tawsawn, kithapia-a kalsuanding cihna ahihi.

Kigawmkhopna (Unity)-ah, “kigii khunzia leh aituamsungthu” cihte akitheih man-in UNO sung-a kihel gamte enlehang, amau’ hihna/panna ciatciat-ah pangkhawm uh-a, tua nangawn khatveivei USA-in thuneihkhum-nuamzeel taleh ahunzuui-in amau’ rights ciat-tawh kuankim-uh ahihman-in kizawhthawhna, gamneu ci-a kipaampaihna om tuanlo-in tonkhawm thei-hi. Tua kalsuanzia Zomi sung-ah akisam penpen ahihi.

Kigawmkhop man-in ka’ khasum nang-tawh kisai tuanlo-a, nang’ khasum kei-tawh kisai tuanlo-hi. Kigawmkhop man-in nang’ upna kong’ zuih sese kuullo-a, kei’ upna-zong nong’ zuih sese kuullo-hi. Upna leh zuihnate-in “amaan, akhial, uptaak/taaklo” mimal kim’ khensatna zuui-a uptheih zuihtheih ahihi. Kigawmkhop man-in na’ vanzuakte kong’ lei hamtang akuul hilo-a, ka’ vanzuakte nong’ lei hamtang akuul hilo-hi. Ka’ album “Zomi Zogam” bang nong’ leiloh hang-in apoi hi peuhmah lo-hi *:) happy*:) happy*:) happy

Thukhupna:

Kopsepna, Kihualna, Kigawmkhopna cihte kal-khatbeek suanthei naailo-a “Kipumkhatna” cih limlim-in khiatna neilo-hi. Tua ahihman-in nang leh kei kipumkhat kuul sese lo-in kopsep siamding, kihual siamding, kigawmkhop-ding thumasa ahihi.

Zomi Pasian’ Thupha!

Zokhai
60 Narr-Maen Drive
Croydon Hills VIC 3136
Melbourne, AU