Italy meileng lampi tungah akiasuk naupangno khat ahunlap in ki honkhiathei
Italy gam Milan khuasung aom meileng aki lehziahziahna Subway Station khatah naupangkhat ataileh kiasuksuak mawk hi. Tua naupangno pen kum 2 bekbek aphapan hi a, anu tawh aomkhawm kimlai, taikhia in meileng Station panin meileng taina sikzawn tungah akiasuk ahihi.
Acih nading theilo in anu lungkham in aomlaitak pasalnokhat athongkuah suahkhia in kumsuk tingteng a, tua naupang meileng lamzikpi tungpanin domkhia in, Station ah koihto hi. Tuaban ah naupangno ii alimtawi zong topsak in, tuakhit ciangin amahzong laupipi in Station Platform tungah kahtokik saisai hi.
Tua ahonkhia tangvalno pen kum 18 aphakhin sangnaupang khat kici a, hihpa ii gamtatna, naupangno ahotkhiatzia tepen CCTV Footage panin akimuhkik ciangin kipaakta mahmah hi.
Milan’s Repubblica Metro Station te’n tuamunsan ah akithuah CCTV panin Video Footage amuhkhak uhciangin mipi muhding in khahkhia uh a, amukha mipi khempeuh in tangvalno ii gamtatna, micimawh ahutkhiat nopna lungsimpen thupi samahmah uhhi.
Metro Station thunei te genna ah tua naupangno akiatsukzawh Minute khatzong asawtlo in meileng atungding hita cimawk hi. Tangvalno in ahunlap in honkhialo himawkleh, naupangno pen meileng lampi siksawn tungah…..
Tua ahonkhia tangvalno pen amin Lorenzo Pianazza kici a, anu apa tetawh tua meileng Station geinai ah akimuhkhit uhciangin aciahding in apailaitak cihi. Tuapa ii genna ah tua naupangno pen meileng lampi tungah akiasuk, acimawh in aom kamuhkhak ciangin ka nuntakna lauhuai cihzong kaphawkkha nawnkei a, thakhatthu in kakumsuk hi ci’n Local Media te tungah genkhia hi.
Video: Toddler rescued from train tracks by quick-acting student in busy Milan subway station
Meileng pen Minute khatkhitdeuh in hongtungding cihzong kathei a, ahi zongin ahun lapin tua naupangno ka honkhia theidinghi cihpen kathei hi. Tuaban ah ageinai ah adingte pen kuamah agamtang omlo, dingcip uh a, en ngeingai bek uh ahih manin, kuamah ahotsawm aomloh ciangin thakhatthu in akumsuk kahihi ci’n genkhia hi.
Meileng Station ah tuabang buaina apian laitak in Station Manager asem ahi Claudia Flora Castellano inzong Control Room sung aom Monitors panin namukha hi. Tuabang in naupangno meileng lampi tungah kiasuk cih amuh ciangin amanzong meileng te akhawl nadingin “Red Button” pen namek in, meileng hawlte zaksakna nanei theipah cihi.
Milan khuapisung ah Mayor asem laitak ahi Giuseppe Sala pen hih thupiang atheih ciangin, meileng Station Manager leh tangvalno te tungah lungdam mahmah hi. (Photo: tangvalpa, meileng nasemnu leh Milan khuasung Mayor pa)
More: USA, South Carolina ah Amtrak te meileng tuahsia, mi 2 si, 116 liam
Milan’s Mayor Giuseppe Sala in tuategel azumah samsak a, lungdam akoh banah nohangin naupangno in anuntaklawh hi. Milan City khuasungmi khempeuh tangin nogeel tungah lungdam kongko hi ci’n genkhia hi. Sawltak #zomidaily
Comment piaknop aomleh...